1 Siyane, ɛ maso,

ɛ yi ɛ tuli mati.

Siyane, ɛ a liga ɛ yeren ma!

Bɔxɔ xɔnna xa a mɛ,

e nun a yi seene birin,

e nun dunuɲa nun naxanye birin minima a yi.

2 Amasɔtɔ Alatalaa xɔlɔn godoma nɛn siyane birin fari,

a fitinan yi godo e ganle birin ma.

A bata halagin nagidi e birin ma.

A tinma nɛn e birin yi faxa.

3 E faxa muxune luma nɛn biraxi bɔxɔn ma

e binbine xirin yi mini han,

e wunle yi sa e geyane birin ma.

4 Sare kurune* birin kalama nɛn

alo se kunxina,

kuyen yi mafilin alo kɛdina,

sare ganla birin yi yolon

alo manpa binla dɛ xarene

alo xɔdɛ bili bogi xaraxine.

5 Ala naxa, "N ma silanfanna bata sarene wunla ramini han!

A godoma nɛn Edɔn kaane ma,

a yi e makiti,

n halagin nagidixi yamaan naxan ma."

6 Wunla bata so Alatalaa silanfanna yiren birin ma

a madole muxu turen na.

A luxi nɛn

alo kontonne nun kɔtɔne wunla saraxabadeni,

alo e turen naxan e gbingini.

Bayo Alatala saraxa gbeen bama nɛn Bosara taani

Edɔn kaa wuyaxi yi faxa yɛngɛni.

7 E yɛɛratine fangan gbo

alo burunna ɲingene,

koni e fan faxama nɛn bonne xɔn,

e nun ɲingene nun turane.

E yamanan nafema nɛn wunla ra,

e turen yi radin bɔxɔn ma.

8 Bayo, gbeeɲɔxɔ lɔxɔn nan na ra Alatala xɔn,

gbeeɲɔxɔn ɲɛɛn nan na ra

Siyon taan xun mayɛngɛna fe yi.

9 Edɔn yamanan baane findima nɛn dolen na.

A xuben yi maxɛtɛ dole tɛɛn na,

e bɔxɔn yi findi dolen ganmatɔɔn na.

10 Kɔɛɛn nun yanyin na,

a tɛɛn mi tuma,

a tutin yi lu tɛ kore habadan!

E yamanan yi lu rabeɲinxi

han mayixɛtɛ nun mayixɛtɛ,

muxun mi fa danguɛ na yi mumɛ!

11 Na yi findi xutunxunbane nun sagalene konna ra,

toxorone nun xaxane yigiyadena.

Ala yi a lu a yitɔntaren nun a yigenla ra

alo a dunuɲa da waxatin naxan yi.

12 A muxu gbeene mi fa luma na,

naxanye mangan dɔxɛ,

a kuntigine birin ɲanma nɛn.

13 Wudi ɲali kanne solima e manga banxine kui nɛn,

sɛxɛ ɲaxine nun tansinne yi a yire makantanxine rasuxu,

a findi kankone nun dangaranfulene konna ra,

14 burunna subene nun kankone naralandena,

burunna kɔtɔne yi lu wugɛ e bode ma mɛnni.

Kɔɛ ra yinnan Liliti yi dɔxɔ na bɔɲɛ xunbenli.

15 Saɲin fan a soden toma na nin,

a yi a xɛlɛne bira,

a yi e rasɛgɛ,

a a diine malan a nininna bun.

Sɛgɛne fan e malanma na nin.

16 Xa ɛ Alatalaa kɛdin kui to,

ɛ ito xaranma nɛn na, a naxa,

"Subeni itoe sese mi dasama na yi,

birin nun a lanfaan nan fama,

bayo Ala bata na yamarin fala.

A Nii Sariɲanxin nan e malanma.

17 A tan nan e dɔxɔdene ragidima.

A tan nan e yirene maliga,

a yi e yitaxun.

Na yamanan findima nɛn e gbeen na han habadan,

e yi lu na han mayixɛtɛn nun mayixɛtɛ."