1 Waliyiya falana Tire taan xili ma:

Ɛ tan Tarasisi kaan naxanye kunkine kui fɔxɔ igen xun ma,

ɛ gbelegbele sununi amasɔtɔ Tire taan bata kala,

banxi yo mi fa na,

kunki tide mi fa na.

E bata na xibarun mɛ,

fata Sipiri fɔxɔ ige tagi bɔxɔn na.

2 Ɛ dundu, ɛ tan naxanye dɔxi fɔxɔ igen dɛ,

ɛ tan naxanye bata fɔxɔ igeni siga

ɛ Sidɔn taan yulane findi nafulu kanne ra.

3 Sansiin naxanye yi bima baan dɛ Sihori yi,

fɔxɔ igen kidi ma pon,

e fa ne ra e taani.

Sansiin naxanye yi xabama Nila baan xɔn,

ne yi findixi Sidɔn taan tɔnɔn nan na.

Na yamanan bata yi findi siyane lɔxɔ tiden na.

4 Sidɔn kaane, ɛ yagi,

baan xɔn yire makantanxina.

Bayo fɔxɔ igen* bata a mɛ ɛ ra, a naxa,

"N mi dii barin tɔrɔyane sɔtɔxi,

n mi dii barixi.

N mi dii xɛmɛye ragboxi,

n mi dii tɛmɛ maxuruxi."

5 Xibaruni ito na Misiran yamanan li,

e yigitɛgɛma nɛn Tire taana fe ra.

6 Ɛ fɔxɔ igeni gidi han Tarasisi taani,

ɛ gbelegbele sununi ɛ tan fɔxɔ ige tagi bɔxɔ yidɔxɔne.

7 Ɛ ɲaxaɲaxa taan nan ito ra ba,

naxan masɛgɛ xabu waxati xunkuyene yi

naxan muxuye bata yi siga

e sa dɔxɔ yire makuyene yi?

8 Nayi, nde na feen nataxi Tire taan xili ma,

naxan yi mangayane yitaxunma yamanane yi nun?

Kuntigin nan yi a yulane ra,

xili kan gbeene dunuɲa yi.

9 Alatala Sɛnbɛn Birin Kanna nan na ragidixi,

alogo a xa ne fe magodo

naxanye wasoxi e tofanna fe ra,

alogo a xa bɔxɔn muxu yitexine rayagi.

10 Nayi, Tarasisi kaane,

ɛ bɔxɔn bi,

alo e a ligama Nila baan dɛ kii naxan yi,

amasɔtɔ kunki tide mi fa na ɛ kunkine xa.

11 Alatala bata a yiini te baan xili ma,

a bata yamanane yimaxa.

A bata yamarin fi Kanan yamanan xili ma,

a taa makantanxine xa kala.

12 A bata a fala, a naxa,

"Ɛ tan Sidɔn kaane,

ɛ sumunna bata ɲan.

Yaxune bata fu ɛ taa tofaɲin ma.

Keli, ɛ fɔxɔ igeni gidi,

siga Sipiri fɔxɔ ige tagi bɔxɔni.

Hali na, matabu yo mi ɛ xa."

13 Babilɔn yamanan mato,

yamaan naxan mi yi sese ra,

Asiriya kaane bata yi naxan findi burunna subene gbeen na.

E e sanganso makantanxine ti nɛn a yi,

e yi a banxine kala,

a findi taa xɔnna ra.

14 Ɛ tan Tarasisi kaan naxanye kunkine kui fɔxɔ igen xun ma,

ɛ gbelegbele sununi

amasɔtɔ ɛ yire makantanxin bata kala.

15 Na waxatini, ɲinan tima nɛn Tire taan xɔn ɲɛɛ tonge solofere, na lanxi mangana nde nan ma siimaya ma. A ligama Tire taan na nɛn alo a liga yalunden na kii naxan yi sigini ito yi, a naxa,

16 Bɔlɔnna tongo, i a maxa,

i sigi wuyaxi sa,

i taani siga i tan ɲaxalan maɲinanxina

alogo i ya fe xa rabira muxune ma.

17 Ɲɛɛ tonge solofere na dangu, Alatala Tire taana fe ragidima nɛn. A mɔn yi a saran haramuxin sɔtɔ fɔlɔ, a yalunyaan naba bɔxɔ xɔnna yamanane birin xɔn. 18 Koni a sɔtɔ seen nun a saren haramuxin luma Alatala nan xa. E mi malanma, e mi ramarama. E soma muxune nan yii naxanye luma Alatala yɛtagi alogo e xa balo gbeen nun marabɛri ba faɲin sɔtɔ.