1 Na lɔxɔni, Alatala a silanfan wure xɔdɛxɛn tongoma nɛn

naxan gbo, a sɛnbɛn gbo,

a yi keli ige yi sube ɲaxin xili ma

ige yi sube ɲaxina,

saɲin naxan a gima,

ige yi sube ɲaxina,

saɲi tinxintarena.

A yi fɔxɔ ige yi ninginanga gbeen faxa.

2 Ɛ manpa bili nakɔɔn matɔxɔma nɛn sigini

na lɔxɔni,

naxan bogiye ɲaxun han!

3 "N tan, Alatala,

n tan nan manpa bili nakɔni ito kantan muxun na.

N na a ige sama nɛn waxatin birin,

n yi a kantan kɔɛɛn nun yanyin na

alogo muxu yo nama fe ɲaxin liga a ra.

4 N mi fa xɔlɔxi a ma.

Koni xa n tansinne nun ɲanle li na,

n na e yɛngɛma nɛn,

n yi e gan.

5 Koni xa naxan a yigiyaden fen n tan yi,

na kanna xa bɔɲɛ xunbenla raso nxu nun a tan tagi,

a xa bɔɲɛ xunbenla yatin naso nxu nun a tan tagi!"

6 Waxati famatɔne yi,

Yaxubaa yamana a salenne raminima nɛn,

Isirayila bɔnsɔnna yi a sonle nun a fugene ramini.

A dunuɲa rafe a bogine ra.

7 Ala a yamaan bɔnbɔxi nɛn ba,

alo a e bɔnbɔ muxune bɔnbɔxi kii naxan yi?

A a yamaan faxaxi nɛn ba

alo a na kanne faxa kii naxan yi

naxanye yi e faxama nun?

8 Ɛn-ɛn de, koni a e makitixi nɛn

a yi e kedi,

a siga e ra konyiyani.

A e kedi a kala ti foyen nan na,

alo sogeteden foye gbeena.

9 Yaxuba bɔnsɔnna hakɛn mafeluma ikii nin,

ito nan Isirayila bɔnsɔnna yulubi xafarin mayitama:

e na e kide saraxa gandene birin findi burunburunna ra,

e Asera kide gbindonne nun wusulan gandene ba tixi.

10 Muxu yo mi fa luma taa makantanxini.

A luma nɛn nabeɲinxi

alo tonbonna.

Ɲinge diine yi fa e dɛ madondeni a yi,

e yi na findi e matabuden na.

E yi a wudi ɲingine madon.

11 Wudi yiine na xara,

e girama nɛn,

ɲaxanle yi e gan.

Amasɔtɔ yama xaxilitaren nan ito ra.

Nanara,

e da mangan mi fa kininkininma e ma.

Ala naxan e daxi,

na mi hinanma e ra.

12 Na lɔxɔni,

Alatala a sansi xabaxine bɔnbɔma nɛn

keli Efirati baan ma

han sa dɔxɔ Misiran xuden na,

ɛ birin yi malan keden keden yɛɛn ma,

ɛ tan Isirayila kaane.

13 Na lɔxɔni,

xɔta xui gbeen minima nɛn.

Muxun naxanye lɔxi ayi Asiriya yamanani,

e nun naxanye kedi Misiran yi,

ne birin fama nɛn,

e fa Alatala batu geya sariɲanxin fari Yerusalɛn yi.