1 Keli i ya mangaya gbɛdɛni

i dɔxɔ bɔxɔni, Babilɔn taa faɲina.

Babilɔn kaane, ɛ dɔxɔ bɔxɔni!

A mi fa falama a ma sɔnɔn

a taa ɲaxumɛ tofaɲina.

2 Ɛ se din seene tongo alo konyine,

ɛ yi sansi kɛsɛne findi a fuɲin na.

Ɛ doma gbeene mate,

ɛ danbane xa to, ɛ xudene gidi.

3 Ɛ ragenla toma nɛn,

ɛ yagixin yi to.

N nan n gbeen ɲɔxɔma nɛn,

muxu yo mi n yikalɛ.

4 Isirayilaa Ala Sariɲanxin nan en xunbama,

a xili nɛn Alatala Sɛnbɛn Birin Kanna.

5 Ɛ dɔxɔ, ɛ dundu,

ɛ siga dimini,

ɛ tan Babilɔn kaane!

A mi fa falama a ma sɔnɔn

a yamanane mangana.

6 N xɔlɔ nɛn n ma yamaan ma,

n bata yi n kɛɛn nayarabi,

n yi e rabeɲin ɛ yii.

Ɛ mi kininkininxi e ma,

ɛ konyi wanle ragboxi ayi hali fonne fari.

7 Ɛ yi a falama nɛn, ɛ naxa,

"N luma nɛn mangayani habadan!"

Koni ɛ mi na feene yatɛxi

ɛ mi ɛ mirixi feene raɲan kiin ma.

8 Nayi, Babilɔn taana,

i tan naxan luxi alo ɲaxalan ɲaxina,

i tuli mati ito ra iki.

Ɛ tan Babilɔn kaan naxanye dɔxi makantanni,

ɛ tan naxanye a falama, ɛ naxa,

"Nxu tan, nxu ɲɔxɔn mi na,

nxu mi findɛ kaɲa gilɛne ra mumɛ,

nxɔ diine mi faxɛ mumɛ!"

9 Na fe firinne ɛ sɔtɔma nɛn lɔxɔ kedenni

sanɲa ma kedenni,

ɛ diine yi faxa,

ɛ findi kaɲa gilɛne ra.

Ne dɛfexin ligama nɛn ɛ ra,

hali ɛ kɔɛ ra feene to gboxi ayi,

hali ɛ tirin feene sɛnbɛn yi gbo!

10 Ɛ bata ɛ yigi sa ɛ fe ɲaxine yi.

Ɛ yi a falama nɛn ɛ yɛtɛ ma, ɛ naxa,

"Muxu yo mi nxu toma!"

Ɛ xaxilimayaan nun ɛ fekolonna bata ɛ xunna firifiri.

Ɛ yi a falama ɛ bɔɲɛni nɛn, ɛ naxa,

"Nxu tan, nxu ɲɔxɔn mi na!"

11 Gbalon fama nɛn ɛ ma

ɛ mi naxan nadangu xiriya kolon.

Halagin godoma nɛn ɛ ma,

ɛ mi naxan nadangu saraxan nɔɛ.

Yihadin fama nɛn ɛ ma sanɲa ma kedenni,

ɛ xaxili mi naxan ma.

12 Nayi, ɛ lu ɛ tirin feene fari

e nun ɛ kɔɛraya fe wuyaxine,

ɛ yi ɛ yɛtɛ yixadanma naxanye fɔxɔ ra

xabu ɛ dii ɲɔrɛ waxatina!

Yanyina nde,

ɛ tɔnɔn sɔtɔma e yi nɛn,

yanyina nde

ɛ muxune magaxuma e yi nɛn.

13 Ɛ bata ɛ yɛtɛ yixadan suxurene maxɔdindeni.

Awa, nayi, muxun naxanye xibarune toma sarene yi,

ne xa keli, e fa ɛ rakisi,

e tan naxanye sarene rakɔrɔsima

e fe famatɔne fala kike yo kike!

14 E luma nɛn

alo se dagina, tɛɛn yi e gan.

E niin mi tangama na tɛɛ dɛgɛn ma.

Anu a mi findima tɛɛ wolondin xan na de

burun ganma naxan na,

muxuna a maxarɛ naxan na!

15 Ɛ yixadanma muxun naxanye fɔxɔ ra

xabu ɛ dii ɲɔrɛ waxatina,

ne raɲanna ligama na kii nin,

ɛ tɔrɔma naxanye fe ra.

E birin sigama nɛn e xun xɔn e tantanni,

e tan sese mi ɛ rakisɛ mumɛ!