1 Sɔnxɔ i xuini texin na!

I xuini te han alo xɔta xuina,

i n ma yamana murutɛna fe rali e ma,

i yi Yaxuba yixɛtɛne yulubina fe fala e xa!

2 E waxi n tan nan fen fe yi lɔxɔ yo lɔxɔ,

e sɔbɛ soxi n ma kiraan kolon feni,

alo yamaan naxanye yi tinxinyaan ligama

naxanye mi e mɛxi e Alaa kiti kɛndɛne ra.

E n maxɔdinma

a n xa kiti tinxinxine sa e xa.

3 E naxa, "Nxu sunna suxuma nanfera,

xa i mi a toma?

Nxu nxu yɛtɛ tɔrɔma nanfera,

xa i mi na yatɛxi?"

Anu, ɛ na sunna suxu lɔxɔn naxan yi,

ɛ ɛ rafan feene nan ligama,

ɛ yi ɛ walikɛne ɲaxankata.

4 Ɛ nɛma sunni,

sɔnxɔ sɔnxɔn nun yɛngɛne na a ra,

ɛ bɔnbɔn ti a ɲaxin na.

Koni xa ɛ sunna suxu alo to,

ɛ xuiin mi Ala lima.

5 N na ɛ xaranxi na sunna sifan nan ma ba

alogo tun muxun xa a yɛtɛ tɔrɔ lɔxɔna nde yi,

alogo tun muxun xa a xun sin

alo sɛxɛna,

a yi sunu dugine ragodo a ma,

a yi a sa xubeni.

Ɛ na nan ma ba, a sunna,

lɔxɔn naxan nafan Alatala ma?

6 N na ɛ xaranxi sun suxu kiini ito nan ma:

Ɛ yɔlɔnxɔn ɲaxine ba muxune ma,

ɛ konyine fulun,

ɛ muxu ɲaxankataxine xɔrɔya

ɛ xun xidi wudine birin kala.

7 Feni itoe xa mi a ra ba:

Ɛ donseni taxun ɛ nun kamɛtɔne ra,

ɛ yiigelitɔne yigiya ɛ konni,

yigiyade mi naxanye yii,

ɛ dugin so muxune yii,

marabɛnna naxanye ma,

ɛ ba ɛ xun xanbi soɛ ɛ ngaxakedenne yi?

8 Nayi, ɛ yanbanma nɛn

alo kuye bamatɔna

ɛ yi kɛndɛya mafurɛn,

ɛ tinxinyaan yi ti ɛ yɛɛ ra,

Alatalaa binyen yi ɛ kantan ɛ xanbi ra.

9 Nayi, ɛ xinla tima nɛn,

Alatala yi ɛ yabi,

ɛ xui raminima nɛn a ma,

a yi a fala, a naxa, "N tan ni i ra!"

Xa ɛ konyiya feene masiga ɛ konna ra,

ɛ ba ɛ yii sonla tiyɛ bonne ra,

ɛ ba fala ɲaxine tiyɛ,

10 xa ɛ ɛ yɛtɛ fi kamɛtɔne fe ra,

ɛ muxu ɲaxankataxine ralugo,

nayi, ɛ yanbanma nɛn dimini,

kɔɛɛn yi lu ɛ xa alo yanyi tagina.

11 Alatala tima nɛn ɛ yɛɛ ra waxatin birin,

a yi ɛ rawasa tonbonni,

a yi ɛ fati bɛndɛn sɛnbɛ so.

Nayi, ɛ luma nɛn alo nakɔ ige saxina,

alo tigin naxan mi xarama.

12 Yire kalaxi fonne mɔn tima nɛn ɛ barakani,

ɛ benbane banxi kalaxine mɔn yi bɛtɛn sa,

a yi fala ɛ ma, a "Yinna yinle yitɔn muxun naxanye kirane nun dɔxɔdene rafalama."

13 Xa i yɛtɛ suxu Matabu Lɔxɔn kala feen ma,

i ba i yɛtɛ rafan feene ligɛ n ma lɔxɔ sariɲanxini,

xa i a fala Matabu Lɔxɔn ma,

a "sɛwa lɔxɔna,"

i yi a fala Alatalaa lɔxɔ sariɲanxin ma,

a "lɔxɔ binyena,"

i yi a binya,

i mi siga i yɛtɛ a kiraan xɔn,

i mi i yɛtɛ rafan fe liga

hanma i fala fuune ti,

14 nayi, i sɛwama nɛn Alatala yi,

n yi i rate bɔxɔn yire matexine fari,

n yi i balo i benba Yaxuba kɛɛn na.

Alatala dɛ xuiin nan na ra.