1 Min xɔnla ɛ tan naxanye birin ma,

ɛ birin xa fa, igen ni i ra!

Hali gbeti mi ɛ yii, ɛ fa,

ɛ fa donseen sara, ɛ a don!

Ɛ fa minseen nun nɔnɔn sara,

gbeti mi fima, a sare mi fima.

2 Nanfera ɛ seen sarama

donse mi naxan na?

Nanfera ɛ yɛtɛ yixadanma seene fe ra

naxanye mi ɛ wasama?

Nayi, ɛ tuli mati n na ki faɲi,

ɛ yi donse kɛndɛn don,

donse ɲaxumɛne yi ɛ nii yifan ɛ ma.

3 Ɛ tuli mati, ɛ fa n ma,

ɛ n xuiin namɛ,

ɛ nii rakisin sɔtɔma nɛn.

N habadan layirin xidima en tagi nɛn,

alo n hinanna nun tinxinna naxan yita Dawuda ra.

4 N bata Dawuda findi seren na siyane xa,

e nun mangana siyane xun na.

5 Ɛ siyana ndee xilima nɛn

ɛ mi naxanye kolon,

siyaan naxanye mi ɛ kolon,

ne yi e gi e fa ɛ fɛma

Alatalaa fe ra,

ɛ Ala Isirayilaa Ala Sariɲanxina,

naxan xunnayerenna fima ɛ ma.

6 Ɛ Alatala fen

a tinma ɛ xa a to waxatin naxan yi.

Ɛ a xili,

a maso ɛ ra waxatin naxan yi.

7 Muxu ɲaxin xa xɛtɛ a kiraan fɔxɔ ra,

hakɛ kanna xa a miriyane lu,

a tubi Alatala ma,

naxan kininkininma a ma,

en ma Ala naxan a mafeluma hinanni.

8 Alatalaa falan ni ito ra, a naxa,

"Bayo n ma miriyane mi ɛ miriyane ra,

ɛ kirane mi lanxi n ma kiraan ma.

9 Kore xɔnna matexi bɔxɔn xun ma kii naxan yi,

n fan ma kirane fisa ɛ kirane xa na kii nin

n ma miriyane fan yi fisa ɛ miriyane xa na kiini."

10 Tulen nun balabalan kɛsɛne godoma keli kore

anu, e wuyenna mi tɛ kore

fɔ bɔxɔ xɔnni kun,

e yi seene rasoli, e sabati

e yi findi sansi bogine ra xɛɛ biine xa,

e findi donseen na kamɛtɔne xa.

11 N ma falan fan na kii nin

naxan minima n dɛ.

A yigenla mi xɛtɛ n ma,

fɔ a n waxɔn feen liga,

a n ma fe ragidixin nakamali,

n na a rasigaxi naxan na.

12 Ɛ minima konyiyani sɛwan nin,

ɛ yi rafa bɔɲɛ xunbenli,

geyane nun yire matexine sɔnxɔma nɛn ɲaxanni ɛ yɛɛ ra,

burunna wudine birin yi e yiine bɔnbɔ.

13 Ɲali yirene yi findi fɔfɔ yirene ra,

tansin yirene yi findi miriti wudi xiri ɲaxumɛ yirene ra.

Na findima nɛn xinla ra Alatala xa,

habadan taxamasenna

naxan mi kalama mumɛ!