1 Feen naxan nalixi en ma, nde laxi na ra?

Alatala a sɛnbɛn makɛnɛn nde xa?

2 Alaa walikɛɛn sabati nɛn a yɛtagi

alo sansi sonla,

alo wudi salenna

naxan minima bɔxɔ xareni.

A mi yi tofan,

a mi yi nɔrɔxi

naxan a ligɛ en yabu a ra.

A to ki yo mi yi en mabandunma.

3 A yi raɲaxuxi nɛn,

muxune yi e mɛ a ra.

Muxu sɔxɔlɛxin nan yi a ra

naxan bata yi dari tɔrɔn na,

muxe mi yi wama naxan mato feni.

A yi raɲaxuxi,

en mi yi a yatɛxi se ra.

4 Anu, a en ma furene sɔxɔlɛn nan tongo,

a yi a ti en ma tɔrɔne ra.

Koni, en yi mirixi a ma

fa fala a Ala nan a ratɔrɔnxi,

a yi a ɲaxankata,

a yi a rayarabi.

5 Anu, muxune a sɔxɔn en yulubine nan ma fe ra,

a yi rahalagi en hakɛne fe ra.

Maratɔrɔnna naxan bɔɲɛ xunbenla fiyɛ en ma,

na yi sa a fari,

en kɛndɛyaan sɔtɔxi a maxɔlɔne nan xɔn.

6 En birin bata yi lɔ ayi,

alo xuruseene,

birin yi sigama a gbee kira nan xɔn,

koni Alatala yi en birin hakɛn goronna dɔxɔ a tan xun ma.

7 E a ɲaxankata nɛn,

e a rayarabi, a mi sese fala.

A yi lu alo yɛxɛɛ diin naxan xalima a faxadeni,

alo yɛxɛɛn naxan a dunduma

e nɛma a fati ma xabene maxabɛ,

a mi sese fala.

8 A xali nɛn gbaloni, a makiti,

koni nde yi kɔntɔfilixi na feen na

a waxatin muxune yɛ?

Amasɔtɔ a ba nɛn ɲɛɲɛ muxune yɛ

ɲaxankatan yi sa a fari n ma yamaan yulubine fe ra.

9 A gaburun lu nɛn muxu ɲaxine yɛ,

a maluxun nafulu kanne fɛma,*

hali a to mi gbalo fe yo liga

a mi yanfa fala yo ti.

10 Alatala tin nɛn a xa halagi xɔlɛni,

bayo xa a niin ba tagi yitɔnna saraxan nan na,

a mayixɛtɛne toma nɛn

a siimayaan yi xunkuya ayi

Alatala yi a sagoon nakamali a xɔn.

11 A niin sɔxɔlɛne dangu xanbini,

a kɛnɛnna toma nɛn, a wasa.

A kolonna xɔn,

n ma walikɛ tinxinxin muxu wuyaxi ratinxinma nɛn

a yi e hakɛne goronna tongo.

12 Nanara, n tide gbeen soma a yii nɛn,

a yi yɛngɛ se tongoxine yitaxun e nun sɛnbɛmane.

Amasɔtɔ a tin nɛn a sayaan ma,

a yatɛ nɛn alo fe ɲaxi rabane,

a yi muxu wuyaxi yulubin goronna tongo

a yi solonaan ti hakɛ kanne xa.