1 Ɛ xulun, ɛ xulun Siyon kaane!

Ɛ mɔn xa sɛnbɛn sɔtɔ.

Yerusalɛn taa sariɲanxin muxune,

ɛ dugi faɲine tongo!

Bayo, xɔɲɛ sariɲantaren mi fa soma ɛ konni.

2 Ɛ yikunkun,

ɛ gbangbanna ba ɛ ma Siyon kaane,

Ɛ mɔn xa keli,

ɛ dɔxɔ ɛ funfu fonni.

Ɛ lutine ba ɛ kɔɛ,

ɛ tan Yerusalɛn taan muxu suxine!

3 Alatala ito nan falaxi, a naxa,

"Bayo ɛ matixi nɛn,

ɛ sare mi fi,

ɛ mɔn xunbama nɛn, se mi fi."

4 Marigina Alatala mɔn ito nan falaxi, a naxa,

"N ma yamaan sigaxi nɛn Misiran yamanani singen,

a sa lu konyiyani,

koni dɔnxɛn na,

Asiriya kaane nan e ɲaxankata."

5 Alatalaa falan ni ito ra, a naxa,

"Iki, n fa nanse ligama?

N ma yamaan bata xali konyiyani,

e mi sara.

Naxanye bata nɔɔn sɔtɔ e xun na,

ne sɔnxɔma,

e n xinla rayelefuma waxatin birin."

Alatalaa falan nan na ra.

6 "Nanara, n ma yamana n xinla kolonma nɛn,

nanara e a kolonma nɛn na lɔxɔni,

a n tan nan falan tixi,

n naxa, ‘N tan ni i ra!’ "

7 Xɛra faɲi yibane faan lanxi geyane fari han,

naxanye bɔɲɛ xunbenla fe ralima,

naxanye fama sɛwa feen xibarun na,

naxanye marakisina fe falama,

naxanye a falama Siyon kaane xa,

e naxa, "Ɛ Ala nan mangan na!"

8 Ɛ tuli mati ɛ taan kantan muxune xuiin na!

E xuini tema,

e birin yi sɔnxɔ sɛwani,

bayo e Alatala toma fɛ Siyon taani e yɛtagi.

9 Ɛ xuini te,

ɛ gbelegbele sɛwani ɛ bode xɔn ma,

Yerusalɛn taa kalaxin muxune!

Bayo Alatala a yamaan masabarima,

a Yerusalɛn taan xunbama nɛn.

10 Alatala bata a yii sariɲanxin sɛnbɛn makɛnɛn

siyane birin yɛtagi,

bɔxɔn danne birin en ma Alaa marakisin toma nɛn.

11 Ɛ siga, ɛ siga, ɛ mini na yi!

Ɛ nama din se sariɲantare yo ra!

Ɛ masiga e ra, ɛ yi sariɲan

ɛ tan naxanye Alatalaa goronne maxalima!

12 Ɛ mafuraxin nama mini,

ɛ nama siga ɛ giyɛ,

bayo Alatala tixi ɛ yɛɛ ra.

Isirayilaa Ala mɔn luma nɛn ɛ xanbi ra ɛ kantandeni.

13 N ma walikɛna fe sabatima nɛn,

a fe yi mate, a yi tide gbeen sɔtɔ,

a binyen sɔtɔ,

14 hali a fe to findixi tɛrɛna feen na muxu wuyaxi xa,

bayo a yɛtagin mi yi fa luxi alo muxuna,

a kiin mi yi fa maliga adamadiin na.

15 Anu, a siya wuyaxine rasariɲanma nɛn wuli raxuyaxin xɔn.

Falan yi ɲan mangane dɛ a yɛtagi,

bayo e bata feen to naxan munma yi fala e xa,

e munma yi naxan mɛ nun,

e yi na famu.