1 Ala naxan i daxi,

Yaxuba bɔnsɔnna,

naxan i rafalaxi,

Isirayila bɔnsɔnna,

Alatala ito nan falaxi iki,

a naxa, "I nama gaxu,

amasɔtɔ n bata i xunba!

N bata i xili i xinla ma.

N tan nan gbee i ra!

2 Xa i danguma fɔxɔ igeni,

n luma nɛn i xɔn.

Xa i danguma baane yi,

i mi i maminɲɛ.

Xa i danguma tɛɛni,

a mi i ganɲɛ,

tɛɛ dɛgɛn mi i raxɔrɛ.

3 Amasɔtɔ Alatala nan n na,

i ya Ala,

Isirayilaa Ala Sariɲanxina,

i rakisimana.

N bata Misiran yamanan fi i xunbaan na,

n yi Kusi yamanan nun Sɛba yamanan findi i ɲɔxɔn na.

4 Bayo i yatɛxi n xɔn,

i binyaxi n yɛɛ ra yi,

n bata i xanu.

N bata muxune findi i ɲɔxɔn na,

n yi yamane fi i niin xunbaan na."

5 "I nama gaxu,

amasɔtɔ n luma nɛn i xɔn.

N fama nɛn i yixɛtɛne ra

sa keli sogeteden binni,

n yi sa e malan

keli sogegododen binni.

6 N na a falama nɛn kɔmɛnna binna xa,

n naxa, ‘E beɲin!’

N yi a fala yiifanna binna xa,

n naxa, ‘I nama e makankan!’

Fa n ma dii xɛmɛne ra

sa keli yire makuyeni,

e nun n ma dii tɛmɛne

sa keli bɔxɔn danne ra,

7 n xinla falama naxanye birin xun ma

n naxanye daxi n ma binyena fe ra,

n naxanye rafalaxi,

n yi e da."

8 Yamani ito ramini

naxanye danxuxi,

anu e yɛɛne fan,

tuli xɔrini itoe,

naxanye tunle fan.

9 Siyane birin xa e malan e bode xɔn,

yamanane muxune birin!

Nde na fe falaxi e yɛ

benun a xa liga?

Nde fe fonne ralixi en ma?

E xa fa e serene ra,

e yi a mayita a yoona e xa!

En xa e xuiin namɛ,

alogo muxune xa a fala,

e naxa, "E ɲɔndi!"

10 Alatalaa falan ni ito ra,

a naxa, "Ɛ tan nan n serene ra,

ɛ tan naxanye findixi n ma walikɛne ra,

n naxanye sugandixi

alogo ɛ xa n kolon,

ɛ yi la n na.

N tan yi na yi

benun suxure yo xa rafala,

ala gbɛtɛ yo mi na n tan xanbi.

11 N tan nan Alatala ra,

n tan yati!

Ba n tan na,

marakisi ti gbɛtɛ yo mi na.

12 N tan nan feene makɛnɛnma,

n muxune rakisi, n yi ɛ rakolon!

Ala xɔɲɛ mi a ra

naxan ɛ tagi fɔ n tan!

Nayi, n serene nan ɛ ra,

fa fala n tan nan Ala ra."

Alatalaa falan nan na ra.

13 "N tan yatigin nan na ra

xabu a fɔlɔni!

Muxu yo mi nɔɛ muxun bɛ n yii.

N na naxan liga,

nde nɔɛ a rakalɛ ayi?"

14 Alatala ito nan falaxi, naxan ɛ xunbama, Isirayilaa Ala Sariɲanxina, a naxa,

"N muxuna nde rasigama nɛn

Babilɔn yamanan xili ma,

ɛ tan ma fe ra.

N yi Babilɔn muxu gixine kunkine kala,

e yi e mamin,

e yi e kanbama naxanye yi nun.

15 Alatala nan n tan na,

ɛ Ala sariɲanxina,

naxan Isirayila daxi, ɛ mangana."

16 Alatala ito nan falaxi,

naxan kiraan sama baa igen xɔnna ma,

dangu ige gbeene yi,

17 naxan yɛngɛ so wontorone nun soone rasiga yɛngɛni,

e nun ganla nun sofa wɛkilɛxine e bode xɔn,

e yi e sa,

e mi fa kelima sɔnɔn,

e yi tu alo saraban na ɲan.

18 A naxa:

Fe singene nama fa rabira ɛ ma,

ɛ ɲinan fe fonne xɔn!

19 Ɛ a mato,

n fe nɛnɛn nan ligama!

Na bata a fɔlɔ iki,

ɛ mi a kolon ba?

N kiraan sama nɛn tonbonni,

n yi baane ramini bɔxɔ xareni.

20 Burunna subene n binyama nɛn,

kankone nun dangaranfulene,

amasɔtɔ n bata igen namini tonbonni,

n yi baane ramini bɔxɔ xareni,

alogo n ma yamaan xa e min,

n naxan sugandixi.

21 N yamaan naxan nafalaxi,

na n tantunma nɛn.

22 Ɛ tan Yaxuba bɔnsɔnna,

ɛ mi n tan xan xilixi!

Ɛ tan Isirayila kaane,

ɛ bata ɛ tunnaxɔlɔ ɛ ma n tan mabinni.

23 Ɛ mi ɛ yɛxɛɛne nun ɛ siine baxi n xa saraxa gan daxin na.

Ɛ saraxane mi findixi n ma binyen na.

N mi saraxane findixi goronna ra ɛ xun ma,

n mi ɛ raxadanxi wusulan saraxane badeni.

24 Ɛ mi gbeti yikalaxi n xa,

alogo ɛ xa latikɔnɔnna sara n xa,

ɛ saraxa subene turen mi n wasaxi.

Koni ɛ yulubine bata findi goronna ra n xun ma

ɛ yi n naxadan hakɛne xɔn.

25 Koni n tan nan keden pe ɛ hakɛne xafarima,

n tan yɛtɛna fe ra.

N mi fa n mirima ɛ yulubine fe ma sɔnɔn.

26 Fe danguxine rabira n ma.

En kiti feni ito yɛba en bode xa.

Ɛ falan ti, ɛ yi ɛ yɛtɛ xun mafala.

27 Ɛ benban nan singe yulubin liga,

ɛ fala radangune yi murutɛ n xili ma.

28 Nanara, n bata yire sariɲanxin kuntigine yatɛ muxu haramuxine ra,

n yi halagin nagidi Yaxuba yixɛtɛne ma,

n yi marayarabin nagidi Isirayila kaane ma.