1 N ma walikɛɛn ni i ra,

n naxan sɛnbɛ soma,

n naxan sugandixi,

naxan n kɛnɛnxi.

N na n ma Nii Sariɲanxin sama nɛn a yi,

a yi kiti kɛndɛn sa siyane xun na.

2 A mi sɔnxɔ sɔnxɔɛ,

a mi a xuini tɛ,

a mi falan tiyɛ taan xun xɔn,

3 a mi xaye yidɔxini girɛ.

A mi lɛnpun tumatɔɔn natuyɛ.

Koni, a kiti kɛndɛn sama nɛn ɲɔndin xɔn.

4 A mi xadanma,

a mi tunnaxɔlɔma a ma,

han a yi fa kiti kɛndɛn na bɔxɔ xɔnna fari,

han fɔxɔ ige tagi bɔxɔne muxune fan yi e yigi sa a sariyani.

5 Alatala ito nan falaxi, Ala

naxan kore xɔnna daxi,

a yi a yibandun,

naxan bɔxɔn nun a yi seene daxi,

a niiraxinla bira adamadiine yi

naxanye dɔxi a yi,

a niin bira ne yi

naxanye sigan tima a fari, a naxa,

6 "N tan Alatala,

n tan nan i xilixi tinxinni,

n yi i suxu i yii ma,

n yi i makantan,

n yi n yengi lu i xɔn.

N ni i findi n ma yamaan layirin xidi muxun na

e nun kɛnɛnna siyane xa,

7 alogo i xa danxutɔne yɛɛne rabi,

i yi suxu muxune ramini kasoon na,

i yi kasorasane xɔrɔya,

e mini dimini."

8 "Alatala nan n tan na,

n xinla nan na ra.

N mi n ma binyen soma gbɛtɛ yii.

N mi n ma tantunna fiyɛ suxurene ma.

9 Fe singene bata yelin kamalɛ,

n fe nɛnɛne nan ma fe ralima ɛ ma

benun e xa fɔlɔ,

n xa ɛ rakolon ne ma."

10 Ɛ bɛti nɛnɛn ba Alatala xa,

bɔxɔn danne birin xa a tantun bɛtini,

ɛ tan naxanye sigama fɔxɔ igen xun ma

e nun a yi seene birin,

fɔxɔ ige tagi bɔxɔne nun e muxune birin.

11 Tonbonna nun a taane xa e xuini te,

e nun Kedari bɔnsɔnna* dɔxɔdene!

Sela kaane xa gbelegbele sɛwani,

e xa sɔnxɔ ɲaxaɲaxani geyane xuntagi!

12 Binyen xa fi Alatala ma!

A xa tantun fɔxɔ ige tagi bɔxɔne birin yi!

13 Alatala minima nɛn alo sofa wɛkilɛxina,

a bɔɲɛn tema nɛn alo yɛngɛ so sɛnbɛmana.

A sɔnxɔma nɛn yaxune xili ma yɛngɛni,

a yi e nɔ.

14 Xabu waxati xunkuye,

n dunduxi,

n naxaraxi, n na n yɛtɛ suxi.

Koni iki, n sɔxɔlɛxi

alo ɲaxanla nɛma tinna ma,

n gbelegbelema,

n kutunma ɲaxankatani.

15 N geyane nun yire matexine kalama nɛn

n yi e se ɲingine birin xara.

N baane findima nɛn tonbonne ra

n yi darane xɔri.

16 N danxutɔne rasigama nɛn kiraan xɔn

e mi naxan kolon.

E yengi mi kiraan naxanye ma,

n yi ti e yɛɛ ra ne xɔn,

n yi dimin findi kɛnɛnna ra e yɛtagi,

n gɛmɛ yirene findi lantaan na e xa.

N na nan ligama,

n mi e rabeɲinɲɛ mumɛ!

17 Koni naxanye e yigi sama suxurene yi,

e yi a fala sawurane xa,

e naxa, "Nxɔ alane nan ɛ ra,"

ne xɛtɛma nɛn e xanbi ra,

e yagi.

18 Ɛ tan tuli xɔrine, ɛ tuli mati!

Ɛ tan danxutɔne, ɛ yɛɛn ti,

ɛ seen to!

19 Danxutɔna nde ra,

xa n ma walikɛɛn xa mi a ra?

Tuli xɔrina nde ra

alo n xɛraan naxan nasigaxi?

Danxutɔna nde ra,

alo n bɔɲɛ xunbenla fixi naxan ma?

Danxutɔna nde ra,

alo Alatalaa walikɛna?

20 I bata fe gbegbe to,

koni i mi e famuxi.

I tunle rabixi,

koni e mi feen mɛma!

21 Alatalaa tinxinna fe ra,

a bata a kɛnɛn,

a xa a sariyan gboon nun a nɔrɔn makɛnɛn.

22 Anu, yama yiigelitɔ halagixini ito mato!

E bata e birin suxu,

e birin balanxi yinle ra,

e birin saxi kasoon na.

E yii seene bata suxu yɛngɛni,

muxe mi na naxan e xunbɛ.

E yɛtɛɛn bata findi se suxin na yɛngɛni,

muxe mi na naxan a falɛ,

a naxa, "Ne raxɛtɛ!"

23 Nde a tuli matima ito ra ɛ yɛ?

Nde a ligama a yeren ma,

to xanbi ra, a yi a tuli mati?

24 Nde Yaxuba bɔnsɔnna soxi a yaxune yii,

a Isirayila so halagi tiine yii?

Alatala xa mi a ra,

en naxan yulubi tongo,

en mi tin birɛ naxan ma kira fɔxɔ ra

en tondi a sariyane suxɛ?

25 Nayi, a yi a xɔlɔ gbeen nagodo e fari

alo tɛɛna

e nun yɛngɛn gbalone.

A yi e gan,

koni e mi sese famuxi,

a yi e raxɔri,

koni e mi na feen yatɛ e bɔɲɛni.