1 Alo tɛɛ dɛgɛn tɛɛ wolonna ganma kii naxan yi,

igen yi a ramini tɛɛn ma,

i yaxune i xinla kolonma na kii nin,

siyane birin yi xuruxurun i yɛtagi.

2 I fe magaxuxine liga nɛn,

nxu yengi mi yi naxanye ma

i godo nɛn,

geyane yi yimaxa i yɛɛ ra.

3 Xabu a rakuya, a munma kolon,

tuli yo munma a mɛ,

yɛɛn munma a to singen,

fa fala alana nde na,

ba i tan na

muxuna a yigi sɛ naxan yi,

a yi a mali.

4 I muxuni suxuma

naxan tinxinna ligama sɛwani,

naxan a xaxili luma i ya kiraan xɔn.

Koni i bata xɔlɔ

bayo nxu luxi yulubin nan ligɛ waxatin birin.

Nayi, nxu kisima di?

5 Nxu birin bata lu

alo se haramuxine,

nxu kɛwali tinxinxine birin luxi

alo dunkobi xɔsixina.

Nxu birin xarama ayi

alo ɲɔxɔnde xarene,

nxu yulubine nxu xalima alo foyena.

6 Muxu yo mi na naxan i xinla xandima,

a yi kata, a bira i fɔxɔ ra.

Bayo i bata i yɛtagin luxun nxu ma,

i yi nxu lu halagini nxu yulubine fe ra.

7 Anu, Alatala, i tan nan nxu fafe ra.

Fɛɲɛ bɛndɛn nan nxu tan na,

fɛɲɛ rafalan nan i tan na.

I tan nan yii fɔxɔ nxu tan birin na.

8 Alatala, i nama xɔlɔ han a dangu ayi,

nxu yulubine fe nama rabira i ma han habadan.

Yandi, nxu mato,

i ya yamaan nan nxu birin na!

9 I ya taa sariɲanxine bata findi tonbonne ra.

Siyon taan bata findi tonbonna ra,

Yerusalɛn taan bata findi yire rabeɲinxin na.

10 Nxɔ Ala Batu Banxi sariɲanxi nɔrɔxina,

nxu benbane yi i tantunma dɛnaxan yi,

tɛɛn bata na gan.

Nxu rafan se kɛndɛne birin bata kala.

11 Alatala, tɔrɔni ito birin yi,

i mɔn mi fe ligama?

I mɔn luma dunduxi nɛn,

i yi nxu ratɔrɔn han a dangu ayi ba?