1 Tinxindene halagima,

koni muxu yo mi a mirima na feen ma.

Lannaya muxune faxama,

muxu yo mi a famuma fa fala

tinxindene faxama nɛn

alogo e xa ba gbalo famatɔɔn yɛɛ ra.

2 Bayo naxanye sigan tima ɲɔndini,

ne soma bɔɲɛ xunbeli yiren nin,

e matabuden sɔtɔ.

3 Ɛ tan kɔɛramuxu diine, ɛ maso be,

yalunde bɔnsɔnna,

naxan yalunyaan ligama!

4 Ɛ nde magelema,

ɛ dɛɛn bandunma nde ma

ɛ lɛnna raminima nde ma?

Ɛ mi findixi dii murutɛxine xan na ba,

wule fala bɔnsɔnne,

5 ɛ tan naxanye kunfan nagboma ayi wudine kideni,

e nun wudi yifɔtɔnxine birin bun,

ɛ tan naxanye ɛ diine kɔɛ raxaban darane kideni,

e nun gɛmɛ longonne ra?

6 Gɛmɛ malaxunxine nan ɛ kɛɛn na ɛ xude kidene yi,

ɛ gbeen ne nan na Isirayila kaane!

Ɛ minse saraxane bɔxɔnxi ne nan xa,

ɛ yi bogi se saraxane ba e xa.

N nɔɛ diɲɛ na birin bun ba?

7 Ɛ sa ɛ sadene tixi geya matexine nan fari,

ɛ tema mɛnna nin ɛ sa saraxane ba.

8 Ɛ bata ɛ suxurene singan ɛ banxin dɛɛn nun a ti wudine xanbi ra.

Ɛ bata ɛ masiga n na,

ɛ ragenla yi lu,

ɛ te ɛ sade xungbeen ma,

ɛ nun muxune yi lanna raso ɛ tagi

a rafan ɛ ma ɛ nun naxanye xa kafu,

ɛ yi lu ne matoɛ.

9 Ɛ bata siga turen na manga gbeen kideni,*

ɛ yi latikɔnɔnna ragbo ayi.

Ɛ bata ɛ xɛrane rasiga pon,

ɛ yi godo han laxira yi.

10 Ɛ bata ɛ yixadan na sigatine yi han,

koni ɛ mi a fala,

ɛ naxa, "A lu na!"

Ɛ mɔn ɛ sɛnbɛ soxi, ɛ mi xadanxi.

11 Nayi, ɛ yi gaxuxi nde yɛɛ ra,

naxan a liga, ɛ n yanfa,

n ma fe mi fa rabiraxi ɛ ma,

ɛ mɔn mi ɛ mirima n ma?

N to dunduxi xabu to mi a ra,

na nan a ligaxi,

ɛ mi fa gaxuma n yɛɛ ra ba?

12 Koni n na ɛ gbee tinxinna

nun ɛ kɛwanle raminima nɛn kɛnɛnni.

E tɔnɔ mi luma ɛ ma.

13 Ɛ na ɛ xui ramini malina fe ra,

ɛ suxure kurun xa ɛ xunba!

Foyena e birin xalima nɛn,

foyedi xurun yi e tongo a siga e ra.

Koni naxan na a yigiya n tan yi,

na yamanan sɔtɔma nɛn a kɛɛn na,

n ma geya sariɲanxin yi findi a gbeen na.

14 A falama nɛn nayi, fa fala,

"Ɛ kirani tɔn ki faɲi,

ɛ kiraan kalaxi yirene birin nafala n ma yamaan yɛɛ ra."

15 Amasɔtɔ kore xɔnna Ala matexina ito nan falaxi,

naxan na yi habadan,

naxan xili sariɲan, a naxa,

"N dɔxi yire matexi sariɲanxin nin,

koni n mɔn muxu ɲaxankataxine xɔn

naxanye e yɛtɛ magodoxi

alogo n xa muxu nii sɔxɔlɛxine rasɛwa.

16 N mi luma yalagin tiyɛ waxatin birin,

n mi luyɛ xɔlɔxi habadan,

bayo muxune niin bama nɛn n yɛtagi nayi,

n naxanye daxi, ne yi raxɔri.

17 N bɔɲɛn bata te Isirayila kaane ma

lan e hakɛ tongoxine fe ma milɛni,

n yi e ɲaxankata,

n yi n yɛtagin luxun e ma n ma xɔlɔni.

Anu, e tengbesenxin bata lu e bɔɲɛna kiraan xɔn.

18 N bata e kɛwanle to,

koni n na e yiyalanma nɛn,

n yi ti e yɛɛ ra, n mɔn yi e madɛndɛn,

e nun naxanye sunuxi e fɔxɔ ra.

19 N tantun falan sama nɛn e dɛ.

Bɔɲɛ xunbeli dɛfexin yi lu muxune xa

naxanye makuya e nun naxanye maso!

N na e rakɛndɛyama nɛn."

Alatala naxa na kiini.

20 Koni muxu ɲaxine luxi nɛn

alo fɔxɔ igen naxan walanxi ayi

naxan mi nɔɛ a raxarɛ

naxan walanye boron nun lɔxɔn nakelima.

21 N ma Ala naxa,

"Bɔɲɛ xunbeli mi muxu ɲaxine xa!"