Mateus 20

Ababomfi ba mwibala lya mwangashi

1 "Ubufumu bwa mwiulu kuti twa bupalakanya ku muntu umo awaile pa makya mu kufwayapo abakumubombele milimo ya mwibala lya mwangashi. 2 Balilanshenye ukubalipila amalipilo ya kasuba kamo. Epakubatuma kyakwe kwibala. 3 Kabili aile ku kisankano panshita ya 09:00 koloko, alifumine, epakusanga bambi balimakene pa lubansa lwa kisankano apakubulwapo ikyo bakokita. 4 Nabo alibebele ati, ‘Na mwebo kabombeniko mwibala lya mwangashi, nkomipeela amalipilo aya kulinga.’ 5 Efyo baile. Kabili pa nshita ya 12:00 koloko na pa nshita ya 15:00 koloko napo akitile kimo kine. 6 Nomba pepi fye ne nshita ya 17:00 koloko elo abwekelemo ku kisankano ukuya kusangako bambi balimakene. Alibepwishe ati, ‘Nindo mwimakanine pano akasuba konse?’ 7 Nabo balimwasukile ati, ‘Tapalipo uwa kwisa ku tubomfyapo umulimo.’ Epakubeba nabo ukuya kubomba mwibala lyakwe ilya mwangashi.

8 "Pa kyungulo umwine we bala aebele kangalila wa bankito uku kuuta ababomfi bonse pa ku bapeela amalipilo yabo. Atampiile pa balekeleleko, ukushinta na pa batampiilepo. 9 Abatampile nkito pa nshita ya 17:00 koloko bapokele amalipilo yamoyene kila muntu aya kasuba kamo. 10 Nomba ulo balya batampiilepo baishile mu kupoka amalipilo yabo, bali kutontonkanya ati, bena bakopoka amalipilo ayengi, nomba nabo balipeelwe fye yamoyene na banabo. 11 Epakusenda indalama shabo pa kuilishanya ku mwine we bala, 12 ati, ‘Abalekelele ukutampa inkito, nindo bapokela amalipilo yamoyene na fwebo?’ 13 Naye alibasukile ati, ‘Kutikeni mwefibusa fyangi, ntamifyengele nebo. Bushe tamwakisumina ukupoka amalipilo ya kasuba kamo? 14 Kabuyeni fye pantu nkofwaya mpeeleko uwakulekelela amalipilo yamoyene nga mwebo. 15 Ndikwetepo insambu shakukita ikyo nkofwaya ne ndalama shangi na pamo ulifye na kalumwa pantu ndi wa kupeela sana?’"

16 "Ekyo abali ku ntanshi bakaba pa kulekelesha, na bali pakulekelesha bakesa kuba pa ntanshi."