Mateus 21

Yesu aingila mu Yelusalemu

1 Ulo Yesu na basambi bakwe ba palamine mu Yelusalemu, bafikile pa nkende ya Betifage ku lupili lwa miolife. Apo Yesu atumineko abasambi babili. 2 Alibebele ati, "Kabuyeni mu mushi uli kuntanshi, pa kwingila fye mukosanga impunda ilikulikilwe pamo na kamwana kakwe, mukakule no kundetela. 3 Nga kwabapo uwa kumipusha mwebeni ati, ‘Ni Shikulu eukofifwaya,’ pekapo bakomipeela."

4 Ifi fyonse fyakitikile pa kufikilisha ifyo kasesema alandile,

5 "Ebako umwana mwanakashi Sioni ati,

bona Imfumu yobe ikoisa kuli webo,

iya kuikefya, ilininine pa mpunda,

na pa musepela wa mpunda."

6 Abasambi baile kukita ifyo Yesu abebele. 7 Baliletele impunda na kana, epakwanshikapo insalu shabo elo Yesu aikalanapo. 8 Abantu abakuti ubwingi balyanshikile nsalu shabo mu musebo. Elo bambi bakontwele mitano ya fimuti no kwanshika mu musebo. 9 Ibumba lyali kuntanshi na kunuma balitampile ukupunda ati,

"Hosana kuli mwana Davidi!

Apaalwe uukoishila mwi shina lyakwa Shikulu!

Lesa alumbanishiwe!"

10 Ulo Yesu aingile mu Yelusalemu, umusumba onse walikabile ku kyongo. Abantu balikwipusha ati, "Ninani uyo?"

11 Abantu bali kukonka Yesu balyasukile ati, Ni kasesema Yesu waku Nasaleti.