1 Mose ɔɣɛ sɔ: Ikɔ kɔdzɛva biara kawirikɔ̃ ne, ikote sɔ miasu aso mitsɛ masose. 2 Kumɛgɔgbe maasu kuso matsɛ ne: Mi ndɛ̃ ɔrere wɔ lonyɛ sikã ɔtã ɔ̃ ɔnyii Israelse, aasu kuso gɔmɔ ɔtsɛ wũ. Ɔ̃isibakpura ɔ̃ ɔnyii Israelse kuso gɔmɔ alasɔ maɔpɛ Bosate ɔwi itã kuso isu itsɛ imomo. 3 Ato aawo kuso gɔ ɔfɔ to-ɔ ɔfɔ i ɔ̃ kɔrɛ ɣɛɛ ikote sɔ kuso gɔ i fɔ ɔnyii Israelse to-ɔ ne aasu atsɛ. 4 Ɣɛɛ ne, wɛrɛba kuwɛ̃ iibawe i mi ndɛ̃ i karɔ̃ ga i Bosate mi Ɣaa to ɔ̃atã mi lɛ mi kaɖekɔ̃ ame. Ɔto ɔ̃afere mi kusɛkusɛ gbaã, 5 si miwarɛ Bosate mi Ɣaa fiɛ misɛ i mmara biara mɛ nto lotã mi nɔme iso kukaakɔ kere. 6 Ala Bosate mi Ɣaa to ɔ̃afere mi kusɛkusɛ lɛ kumɛgɔ ɔɣɛ ɔsɛ. Mito mianyɛ kuso mitã nɖebi gbodzoo ɣɛɛ miibanyɛ kuira mibɔrɛgu i ma kɔrɛ. Nɖebi gbodzoo to miawe i mi kayirinɔ ɣɛɛ miibawe kukawɛ̃ kayirinɔ.

7 Si mi manyii Israelse ɔrere ɖe wɛrɛba fiɛ ɔpia i ɔmagɛ̃ ɔrere ame i karɔ̃ ga Bosate mi Ɣaa to ɔ̃asu ɔtã mi ame ne, midaabara wũ ɔyiriɖo ɣee midaasɛ̃ kɔrɔ̃ sɔ miibabuai mi ɔnyii wɛrɛba. 8 Bowũ ne mibusi kɔrɔ̃ ame, si mitã wũ faa lɛ kumɛgɔ kanya ɔto ɔbie. 9 Minyɔ so kukaakɔ si midaabara adzuni lalaa wagbe i mi kasusu ame sɔ, "Ikɔ kɔdzɛva nɛ masɛ masu kuso matsɛ ɔɔbore imatã," si midaasɛ̃ ara inyɛ itã mi ɔnyii wɔ mpia i ɔɣiã ame, midaasɛ̃ kuira itã wũ. Ɔto ɔ̃awo ɔbiɛ ɔtã Bosate, iyɔ Bosate to ɔ̃atã mi ikpi ipɔ. 10 Mitã wũ ku kayiribielea si idaabo mi so i ɔtu ame. Iyɔ ala ne iti ne Bosate mi Ɣaa to ɔ̃afere mi kusɛkusɛ, i mi karabara ɔɖuɖu ame gu i irabiara nɛ miasu nrɔɔ̃ mibara. 11 Mawɛ̃ to maaɖe mawɛrɛba maawe i karɔ̃ iso ɔwi biara. Ne ɔso nto loɣere mi sɔ, mibusi kɔrɔ̃ ame mitã mi manyii gu mawɛrɛba gu maɣiãni i mi karɔ̃ ame.

12 Si fɔ ɔnyii Hebrise ɔrɛrɛ̃ ɣee ɔrɔ̃go ɔrɔdɛ̃ so ɔtã-ɔ fiɛ ɔ̃ɔsumu-ɔ akɔ akuɔ ne, ikote sɔ ikɔ kɔdzɛva ame ne aatã wũ isɛguso. 13 Si aatã wũ isɛguso ne, daatã ɔkɛlɛ nrɔɔ̃ kunu. 14 Tã wũ ku kayiribielea bɔrɛgu i masɛrɛ ikuri ame gu ɔraɖui bɔrɛgu i nwɔ asakanya ame gu ndã. Tã wũ ara lɛ kumɛgɔ kanya i Bosate fɔ Ɣaa ɔfere-ɔ kusɛkusɛ. 15 Nyigi sɔ ɔɔɖe ɔsande anya i Egipte karɔ̃ iso fiɛ Bosate fɔ Ɣaa ɔɖi-ɔ. Ne ɔso nto lotã-ɔ mmara mɛgbe nɔme.

16 Ɣɛɛ si fɔ ɔɖabo ɔɣɛ sɔ, "Loito lobie sɔ loarui i fɔ kɔrɛ," alasɔ ɔto ɔɖuɛ mi gu fɔ iyomaturi fiɛ ikote wũ si ɔpiagu-ɔ ne, 17 iyɔ kɔ wũ kɛlɛgu i fɔ iyo kukui kɔrɛ si aɖui wũ kutsue ku ɔɖuisa amatãra i kukui iso. Iyɔ ɔ̃ɔkpese fɔ ɔɖabo gbɔgbɔɔgbɔ ɔkpi. Bara kumɛɔ tã fɔ ɔɖaborɔ̃gomi ana.

18 Daatã sɔ iabo-ɔ so sɔ aatã ɔɖabo isɛguso ku ɔwi wɔ ɔ̃ɔsumu-ɔ akɔ akuɔ. Ala nnɛ ɔ̃ɔbara ɔtã-ɔ i akɔ akuɔ wagbe ame, ɔɔsi iɖo ɔpaase ɔkpɛ aka anyɔ ɔso. Iyɔ Bosate fɔ Ɣaa aafere-ɔ kusɛkusɛ i irabiara nɛ aabara ame.

19 Su fɔ manantsuĩ abirɛrɛĩ gu masɛrɛrerɔ̃ abirɛrɛĩ ɖeakatɔ̃ sɛ ise tã Bosate mi Ɣaa. Daasu fɔ nantsuĩ abirɛrɛĩ ɖeakatɔ̃ abaragu karabara, si adaakparɛ̃ fɔ sɛrɛrerɔ̃ abirɛrɛĩ ɖeakatɔ̃ siwɛrɛ̃. 20 Mi gu fɔ iyo aaɖe ma i Bosate mi Ɣaa anɔ ku ikɔ biara i kakɔi ga ɔ̃aɖi. 21 Si bɔi wɔ ira ɔnina ɔ̃ iso, lɛ ɔɖe bafã ɣee anɔmi ɔbiɛ ɣee ira mama ɔnina iso gbaã ne, iikote sɔ aasu wũ asɔrɛ atã Bosate mi Ɣaa. 22 Miawo bɔi wɔmɔ igbã ɔɖe i mi ɔmagɛ̃ ame. Mma losekele gu mma loisekele ɔɖuɖu awo ɔɖe lɛ kasɔlɔ ɣee ɖui iɖe awe. 23 Ɣɛɛ iikote sɔ miaɖe ima, misɔrɛ̃ ne mifere i karɔ̃ lɛ ndu awe.