1 Mose ɔkpere Israel mabi ɔɖuɖu ɔsirakanya ne ɔɣere ma sɔ:

O Israel kaɖe, minɔ mmara gu asɛ̃ra wa nto loatã mi nɔme. Misuã me si minyɔ sɔ misɛ i me iso. 2 Bosate bo Ɣaa ɔkã ndamu ku bo i Xoreb kube kɔrɛ. 3 Iiɖe bo mawa i Bosate ɔbaragu ndamu mɛgbe ɣɛɛ ku bo, ku bo ma ɔɖuɖu mpia ngbã i ngbe nɔme. 4 Bosate ɔɖegu mi ika anɔ ku anɔ ɔbɔrɛgu i ɔtɔ ame i kube iso. 5 (Ɔwi wɔmɔ ame ne loya i mi gu Bosate ndɛ̃ fiɛ loɣere mi Bosate atɔ̃me, alasɔ mito minigã ɔtɔ fiɛ miiya kube.) Ne ɔɣɛ sɔ,

6 "Mme nɖe Bosate mi Ɣaa wɔ loɖi mi ɔbɔrɛgu i sisande karɔ̃ ame i Egipte karɔ̃ iso.

7 "Daabara ɣaa mama i wũ anɔ.

8 "Daabara irapɔa kuiwɛ̃ atã so i kato ira kumiamia oo karɔ̃ iso kã ame ira kumiamia oo ɣee ndu ame ira kumiamia iɖe atã so. 9 Daabɔitikarɔ̃ atã irapɔa kuiwɛ̃ ɣee daasumu ne. Ala Mme, Bosate mi Ɣaa ne, Ɣaa wɔ lokpɛ̃ sirerɛ loɖe. Nsɛ lokpadzɛ̃ mma lotsiri me ɔkparɛ kutsue i ma mawa ikpi iti, ikɛlɛ ta ma ɔɣekparɛ tɛare gu ɔnaare iso. 10 Ɣɛɛ nsɛ loɖi wũ kuɖuɛ lote mma loɖuɛ me fiɛ masɛ mabara i wũ mmara iso siɣekparɛ kukpi.

11 "Daasu Bosate fɔ Ɣaa iyere abara nnɛ loikote. Ala Bosate iibanyua ɔtsɛ ɔrere wɔ loasu ɔ̃ iyere ɔbara nnɛ loikote.

12 "Bara i Iwarãyi iso si abara ne sekelee lɛ kumɛgɔ i Bosate mi Ɣaa ɔsɛ mmara ɔtã mi. 13 Ayi akuɔ miasu mibara mi karabara ɔɖuɖu. 14 Ɣɛɛ iyi kɔdzɛva ɖe Iwarãyi itã Bosate mi Ɣaa. Kuwɛ̃ daabara karabara kukawɛ̃ i ne iso, mi mɔmɔ oo, mi mabi oo ɣee mi maɖaborɔ̃go oo, maɖaborɛrɛ̃ ɣee mi ɔfirimu oo ɣee nantsuĩ ɣee mi bɔi ɔrere ɣee mafɔ ma mpia i mi kɔrɛ. Mi maɖaborɔ̃go ɣee maɖaborɛrɛ̃ si mawarã lɛ mi awe. 15 Minyigi sɔ miɔɖe masande i Egipte karɔ̃ iso fiɛ Bosate mi Ɣaa ɔɖi mi ɔbɔrɛgu i mmɔ ku ɔ̃ kɔrɔ̃ teteree gu ɔle siare. Ne ɔso i Bosate mi Ɣaa ɔtã mi mmara sɔ mibara i Iwarãyi iso.

16 "Warɛ fɔ ɔse gu fɔ ɔnyi lɛ kumɛgɔ i Bosate fɔ Ɣaa ɔɣɛ, si ibiara aalɛgu-ɔ fiɛ aasɛ ngbã tagbaraa i karɔ̃ ga i Bosate to ɔtã-ɔ iso.

17 "Daaɖue ɔturi.

18 "Daarɔ ɔturire ɣee ɔturi kurã.

19 "Daayu kayu.

20 "Daaɖe sila aɖansiɛ i fɔ lɛdze iso.

21 "Daasu kanɔbɛbɛ i fɔ ɔnyii ɔ̃ ɔre iso. Daasu kanɔbɛbɛ i fɔ ɔnyii iyo ɣee karɔ̃ iso ɣee ɔ̃ ɔɖaborɛrɛ̃ ɣee ɔɖaborɔ̃go ɣee ɔ̃ nantsuĩ ɣee ɔfirimu ɣee ira irere nɛ nɖe fɔ ɔnyii ire iso."

22 Nwagbe nɖe mmara mɛ i Bosate ɔɖi ɔɣɛgu silɔ teteree, ɔbɔrɛgu i ɔtɔ i kube iso gu adɔdɔ gu idududu kpirikpiria ame, ɔtã iturikuri ɔɖuɖu i kube kɔrɛ. Ɔ̃isibua kuiwɛ̃. Kere ne ɔtsɛrɛ mmara mɛgbe ɔsia i ata anyɔ iso ɔsu wã ɔtã me.

23 Ɔwi wɔ i ɔtɔ ɔɣa ɔwe i kube iso fiɛ minɔ silɔ ɔbɔrɛ i idududu ame ne, mi kumele matɔ̃ɖedze ɔɖuɖu gu mi makpakpa ɔba i wũ kɔrɛ. 24 Ne miɣɛ sɔ, "Bosate bo Ɣaa ɔɔɖi ɔ̃ ikpawaĩ gu ɔ̃ sikɛrɛɖu ɔte bo fiɛ bonɔ ɔ̃ silɔ bobɔrɛgu i ɔtɔ ame. Nɔme boɔnya sɔ ɔturi aawo ngbã ɔwe atoa si Ɣaa ɔɖegu wũ ika kɔraa. 25 Ɣɛɛ kiniɔ ne, be ɔso boakpi? Ɔtɔ siare wɔgbe to ɔ̃awɔra bo fiɛ boakpi si bonɔ Bosate bo Ɣaa silɔ ana. 26 Iɖe ɔturi awune wɔ loɔnɔ Ɣaa wɔ mpia ngbã ɔɖeika ɔbɔrɛgu i ɔtɔ ame, lɛ bonya fiɛ ɔwe ngbã ɔnya? 27 Bore matã si anɔ ara wa ɔɖuɖu bo Ɣaa, Bosate sɛ ɔɣɛ. Iyɔ si aba aaɣere bo nnɛ i bo Ɣaa, Bosate sɛ ɔɣere-ɔ. Boto boanɔ fiɛ boabara bosia iso."

28 Bosate ɔnɔ ku ɔwi wɔ miɣere me, ne Bosate ɔɣɛ sɔ, "Loɔnɔ nnɛ i maturi magbe ɔɣere-ɔ. Ibiara nɛ maɣɛ lɛ. 29 Ao, si ifɔ̃ nɛgbe aawe i ma situ ame fiɛ maanigã me, maasɛ i wũ mmara iso ɔwi biara ne, iyɔ ne ito ialɛgu ma gu ma mabi ɔwi daaro!

30 "Kɛlɛ, si aɣere ma sɔ makpese makɛlɛ ma akpayo ame. 31 Ɣɛɛ fɔ, Mose ne, we i wũ kɔrɛ i ngbe fiɛ loatã-ɔ wũ mmaraisi gu asɛ̃ra gu mmara. Si ate maturi mmara ara si maawarɛ wã i karɔ̃ ga nto lotã ma iso."

32 Ne ɔso Mose ɔɣere Israel mabi sɔ, minyɔ sɔ mibara i mmara mɛ i Bosate mi Ɣaa ɔtã mi iso pɛpɛɛpɛ. Midaapɛ mifiriki i me iso mikɛlɛ kuɖearɔ̃ ɣee kubena iso. 33 Misɛ i ɔri wɔ i Bosate mi Ɣaa ɔtã mi iso. Si mibara ne, irabiara aalɛgu mi fiɛ miasɛ ngbã tagbaraa, i karɔ̃ ga mito miafɔ iso.