1 Kaiwo riwangsoai na Salomoi finina.

Arikang mano sewaifoi mani, dohongno tamanai firaise,

wape arikang mano wiro miaya we aunauwi kahafoi mani, kia karira we inanaifa.

2 Ra obui na nari neo karirafo mani wiro wefia kaha,

wape neo maifo mani, sawing inontarai weru mararehafoi.

3 Yahwei wiro sawing inontarai mesinei wewisi kaha,

wape fio inontarai kerirafoi dawi weafo mani, wiro Yoa wea kaha.

4 Inontarai mano warang mararung kaha, wiro ne fia kaha,

wape inontarai mano warang mayafoi, ambori ne ra bitoya.

5 Inontarai mano enetituai kariri neo maifo mani, wiro wemunudang kaharai mae fianduhi fianangfoi kawurua,

wape mandoni dino dena na kutu eting fianangfoi mani, dohong mamaya mantauni.

6 Inontarai mesifoi mani sobu moangfo bitoya,

inontarai kerirafoi medu kaiwo mahikaifo, wape enetituai karirafo na enerorongfoi.

7 Watai we fiaiririai kariri inontarai mesifoi mani, kia moang we inontarai mano earomioifoi,

wape inontarai mano kerirafoi wonongfo nai.

8 Mandoni dino sewai mani, dohong kariri kaiwo aunaufo,

wape mandoni dino webonggoi na medufo mani ambori sawaifa.

9 Mandoni dino ne koang denteng mani, ne rangfo mai,

wape mandoni dino ne rangfo takahapa mani, ambori waitawangnaifa.

10 Mandoni dino tetofa na mei ureng mani wedaya karirafo,

mandoni dino webonggoi na medufo mani, ambori sawaifa.

11 Inontarai mesifoi medu kaiwo maifo mani, toyari mereha dohong arang,

inontarai kerirafoi medu kaiwo mahikaifo, wape enetituai karirafo na enerorongfoi.

12 Nemirireu inontarai mani wedaya mamuna,

wape nemiwawu inontarai mani, oyai ne sarawane kai.✝

13 Na inontarai mano tefu kaiwo werorongfoi mani, tasobu awai na fi medurafo,

wape aitatohi reafoi demang we inontarai mano wiro enetituai kariri neo mai kahafoi kuruinafoi.

14 Inontarai mano sewaifoi mani, derara neo waitawangnai werorongfo ambori sobu dadira fanai,

wape inontarai webonggoifoi borongfo mani, kia karira wei.

15 Ra foi mani toyari wore bendari mitubarufoi we demang wedua inontarai mano ne ra bitoyafoi,

wape nemi pari fi mani dohong karira we mano ne pari fi foi.

16 Fio inontarai mesifoi sobuafo mani arangfoi,

wape fio inontarai kerirafoi sobuafo mani sasarifoi.

17 Mandoni dino tarao aunaune mani, da to rang arangfoi,

wape mandoni dino wiro tarao kaiwo uarafo kaha mani, da to rang kerirafoi.

18 Mandoni dino dediwa enemirireufo, tetofa na bororawafoi,

mandoni dino deibaberaha mani, inontarai nani wiro miaya we aunauwi kaha.

19 Madu bitoya mani, ambori madu sarawaifa,

wape mandoni dino yutawang bororawanei mani, enetituai kariri neo maifo.

20 Inontarai mesinei taperengfoi mani, toyari peraki ne harga dedai,

wape inontarai kerirafoi ne enetituaitafo mani, wiro wefia kaha.

21 Inontarai mesifoi bororawafoi mani, dohong moang we inontarai bitoya,

wape inontarai webonggoifoi mireha, weo wiro enetituai kariri neo maifo kaha.

22 Moang na Yahwei aino dohong ra bitoya ne,

rurai fuba kontaio wiro ambori wobu weai ahang kaha.

23 Inontarai mano wiro miaya we aunauwi kahafoi mani, piraise we niari karirafo,

wape inontarai mano niari kariri awaifo mani, nunggamiei wewu tofong.

24 Fianai aino inontarai kerirafoi mitaitafo mani, fi nanai aino ambori sobuaifa,

wape fio inontarai mesifoi dohong weafo mani, ambori sobuaifa.

25 Masino dadirafo toyario dobarai siayai mani, inontarai kerirafoi wioru,

wape inontarai mesifoi mani doara pepayai we fitawafa.

26 Wiro bomi inontarai ureng marirafoi we yu fi fanai,

weo netarai toyario cuka niari deremi sisasa tuti riraung dohong uremi sasora.

27 Roaso Yahwei tuti omi wei mani, ambori arang wairoi,

wape inontarai kerirafoi ne fuina darangfo mani, wiro wairoi kaha.

28 Fio inontarai mesifoi enetawanafo mani, ambori dohongni mirising,

wape inontarai kerirafoi fio enetawanafo mani, wiro we fiea kaha.

29 Yahwei ne rangfoi mani dewawu inontarai mano mesifoi,

wape kia karira we inontarai mano niari karirafoi.

30 Inontarai mesifoi ambori niayaia pepayai na ne kahofa weririafo,

wape inontarai kerirafoi wiro niayaia pepaya na kahofafo kaha.

31 Na inontarai mesifoi borongfoi mani, medu kaiwo awaifo,

wape inontarai mano tapereng sobaurafo mani ambori kutui.

32 Inontarai mesifoi bororawafo deitawang fio dohong mirisingfo,

wape inontarai kerirafoi borongfo mani, manta deitawangno tetofafo teraifa.