1 Inontarai mano titua fi maraba tuti sayayai na warang mai kaha mani, Yahwei enerireuwi paria,

wape I firaise we inontarai mano titua fi na mai.

2 Masino tewafo da ma mani, mamayafo kontai ambori da ma,

wape awaifo mani, nayai ria inontarai mano enerorong tewawafoi.

3 Inontarai mesifoi ne kaiwo maifo deduni,

wape inontarai mano roasoi kahafoi, wonongfo karira na fi niarifo.

4 Na rahida bo Allai kiutu kaiwo we inontarainei, fi kiaio minohi tutirafo wiro wefieai wei kaha,

wape darang na niari neo maifo mani, ambori sawini weru mararehafoi.

5 Inontarai mesifoi ne rangfo mani mai kariri dohongnafo,

wape inontarai kerirafoi fio mantauni niarifo wedayari sawaifa.

6 Inontarai mano warang maifoi, fio niari maifo wedayari kiaharai weru neo karirafo,

wape inontarai mano wiro roasoi kahafoi, fi karirao miaya weafo mani, tefu bera mantaungni.

7 Masino inontarai kerirafoi mireha mani, enetawanafo naiya kaia,

tuti mambiriu minohitutirafo wefiea kaha.

8 Inontarai mesifoi kiaharai weru dadirafo,

wape mano kerirafoi sobu dadirafo pampang.

9 Inontarai kerirafoi borongfo ming ne doroisa,

wape inontarai mesifoi na ne deitawangnai werorongfo kiaharai weru dadirafo.

10 Masino inontarai mesifoi sobu neo mahikaifo pampang mani, bendarifo mirising tantenang,

tuti masino inontarai kerirafoi mireha mani, ehue weo efaraise fefe.

11 Moangfo nayai na inontarai mano warang maifoi we biaung bendarifoi wewu tofong,

wape inontarai kerirafoi borongfo dohong bendarifoi misuhi.

12 Mandoni dino enerireu ne doroifoi mani, wiro enetituai kariri neo maifo kaha,

wape inontarai mano nunggamiei wewu tofongfoi mani minohi nemboru.

13 Mandoni dino miaya we deiriri fi karira kariri inontarai siai mani, wiro yutawang kaiwo adiwarafo kaha,

wape mandoni dino enerorong pepayai mani, dediwa kaiwo adiwarafo.

14 Masino mananufoi wiro sewai kaha mani, kaiwasafoi wiro sobu mai kaha,

wape masino mantainau efau mani, kaiwasafoi minohi na mai.

15 Mandoni dino dererai we biai kutu inontarai siai manei ne fi kiafo mani, i ambori sobu karirafo,

wape mandoni dino enerireu netonanafo mani minohi na mai.

16 Wiwing mano enerorong dentengfoi mani, wonongfo beng,

wape mano warangansumafoi mani, sobu ra bitoya terai.

17 Inontarai mano enewawu fubafoi mani, niari neo mahikaifo we mantauni,

wape inontarai mano memuna biriufoi mani, niari ne karirafo we mantauni.

18 Inontarai kerirafoi ne fi sobuai fubafo mani, wefiea kaha,

wape mandoni dino sanang fio bengfo mani, ne fio sobuafo wiro nai kaha.

19 Mandoni dino niari kariri fio maifo pampang mani, ne fuinao daoafo wairoi,

wape mandoni dino dawi ne karirafo pampang mani, da to mararehafoi.

20 Mandoni dino enerorongfoi seru mani, Yahwei enerireuwi,

wape Firaise we inontarai mano da na rang mesifoi.

21 Tarai, inontarai kerirafoi, wiro kiaharai weru aiboifo kaha,

wape inontarai mano mesifoi ne ririafoi mani, ekaharai weru aiboifo.

22 Wiwingno ureng bohi wiro deitawang turura kahafoi,

netarai toyari fio marandinai na taramine sawai na fiai ubongfoi.

23 Inontarai mesifoi fio enetawanafo mani, kia mahikai,

wape inontarai kerirafoi fio enetawanafo mani, dohong inontarai siai ehasouwi.

24 Manei deto ne rafoi, wape ne rafoi bitoya aha,

manei wiro deto ne rafoi funoma kaha, wape ne pari fi pampang.

25 Mandoni dino dohong fianggeng bitoya mani, mantauni ambori sobu fianggeng bitoya aha,

mandoni dino dohong mereha we inontarai manei dunung mani, mantauni kontai inontarai siai etohong mereha we dunung.

26 Mandoni dino derara potangfoi we dewayani na kutu ne harga dedaifo mani, inontarai ambori eteikanggani,

wape mandoni dino dewayang potangfoi we inontarai ewori mani, ambori efiai.

27 Mandoni dino yurai na mambiriu we niari bengfo mani, ambori inontarai efaraiseri,

wape mandoni dino dawi neo karirafo mani, ambori sodai karirafo.

28 Mandoni dino yoasoai weo ne rafoi ambori deitawanifo mani, ambori sobu karirafo,

wape inontarai mesifoi ambori sifu toyari aireraung weworu.

29 Mandoni dino niari sarawai na ne munurorongfo mani, ambori tefu wanangbafoi,

inontarai webonggoifoi ambori we woming we inontarai mano sewaifoi.

30 Fianai aino inontarai mesifoi niarifo mani, ambori dohong arang we inontarai siai,

tuti mandoni dino sewai mani, kia inontarai enemirorongfoi.

31 Masino inontarai mano mesifoi sobu fiembaitai na nunei,

tonanai kontai we inontarai kerirafoi tuti inontarai wesasarifoi, usobu aiboifo.✝