1 Anggurinei wedaya inontarai enemirireu, ye memunanei dohong inontarai emamuna,

mano metunung tuti memayeru mani wiro mesawai pari kaha.

2 Mananufoi kesou mani toyario singa weworu bibe,

mandoni dino niariri kesou mani mantaungni sobu karirafo.

3 Inontarai manei atori, masino sawani wiro miaya we medu funong kaiwo kaha,

wape inontarai webonggoifoi ne kasoufo dariai ahera.

4 Inontarai mano ureng mariranei wiro niari romi na kutu tanang fitantanangfo kaha,

donio na kutu eting fitantanangfoi mani wiro sobu fiea kaha.

5 Fi inontarai etamai na enemirorongfoi we enarifo mani, toyari fio watai na kamirei merehao berorong,

wape inontarai mano nungkamiei wewu tofongfoi mani deitawang fi nanaifa.

6 Inontarai bitoya etafubera mantaungsa we ansaino enemiwawune,

wape inontarai mano tarai enerorong pepayafoi, wiro mawa we obu kaha.

7 Inontarai mesifoi mani ne koangfoi denteng,

ne arikang fosa ambori esobu mai.

8 Na kutu mananufoi kiutu kaiwo we inontarai mani,

fi kerirafoi kiai deti baurai.

9 Wiro inontarai manei medu na mai deyo, "Enehurorongfi mirarebanai kawuru ampa,

tuti wiro nehu sasari feai ahang kaha."

10 Inontarai mano titua tuti dutu fi na wiro warang mai kaha mani,

Yahwei enerireuwi paria.

11 Inontarai manei, masino ketui wape aroangni na fi niarifo,

ne koangfoi denteng tuti warang mai ete bererie.

12 Yahwei niari taramine ambori taramioai,

tuti Niari uremine ambori wati.

13 Wiro bena pampang fanai, ambori wiro weinontarai mano ne pari fi kaha,

boabari wau rufi, ambori bampia momosi.

14 Inontarai mano wiori fianggengfoi medu fafiarai we mano dewayangfoi, deyo, "Ah, nemu fio bowayangnane wiro beng kaha! Ne harga dadai kareraifa!"

Wape mantauni fiai berahi, masino wiori fianggengfo na harga tawawa.

15 Masino emasi tuti kamiei ne harga dedai bitoya,

wape fio ne harga dadai sewa mani boromirawao medu kaiwo waitawangnai werorongfo.

16 Masino inontarai mano dererai we biai kutu inontarai siai manei ne fi kiafo mani, ka inontarai nani ne fio ne harga dadaifo,

tuti rutawangnaifa pariao inontarai mano dererafoi biaitai awao kai.

17 Fiangno wobui na totofa, bangni mani miaing paria,

wape rerai we kai mani wiro miaing kaha, toyario bangno ninuaing.

18 Fianai aino inontarai etamafo ambori esobuai na mai, masino etaramio mano etohong aunau fosa,

ampefe wobu wiwiaing akawuruwori momuna ki.

19 Mandoni dino deiriri funong inontarai mani, i kontai deiriri fio adiwarafo,

weo nanai aino wiro furao inontarai mano borong beingsengfoi fanai.

20 Mandoni dino deikanggani ne dai ete ne ai mani,

ne darangfo werea toyario padamarang fefe na diru mamantitifo.

21 Fi weririao ka ahera na kutu wiro ne rahida mai we wobua kaharai,

fi nanai rahida fui wiro kia moang we wau kaha.

22 Wiro bohong bera neo karirane na karirafo fanai,

bomang we Yahwei, I ambori fiata wau ki.

23 Inontarai mano titua fi maraba tuti sayayai na wiro warang mai kaha mani, Yahwei enerireuwi paria,

tuti I wiro firaise kahai we inontarai mano titua fi na sofa foi.

24 Inontarai ene wawua eraoane mani Yahwei dino samane,

nanai aino inontarai nesa wiro ewaitawang fio ambori esodairai na etarangfo kaha.

25 Masino inontarai manei miaya we dohong korbani we Yahwei mani, enetituai nariai akawuruwori dererai ki,

weo bereri mani, ambori sobu dadirafo.

26 Mananu mano sewai mani, deroangno inontarai mandoni dino kerirane,

tuti dohong aiboi maraba wei na wiro enewawu kaha.

27 Inontarai nuaninunei mani toyari padamarangno Yahwei dohongni wei,

donio inontarainei deitawangnai kai na mantaungni enerorongfoi.

28 Mananu mano enewawu tuti enerorong pepayai we inontarai nei kia, i ambori niari mananufoi darang na mai,

tuti enewawufo ambori niariri yu parentafo papayaifa.

29 Fio niari inontarai efiai bariboaifoi mani, ne mambiriufo,

tuti fio niari inontarai etato wawafoi mani, fi bitoya sodairai na darangfo.

30 Inontarai mano niari karirafoi boia wekahai mani, ambori yiwang ne koang kerirao niaririfoi,

tuti bohong aiboi wei mani, ambori ruairurang fi karira na enerorongfoi.