1 Mananu Lemueli, kaiwo inang deunauai wei finina.

2 Nehu arikangne wau, nehu arikang terane wau,

arikangno yawingni, weo Allai yoa we nehu nadi nei.

Taramu sauao nehu kaiwo aunaune.

3 Wiro bohong nemu mambiriuwa kai we bawi wiwing nesa fanai,

tuti wiro furao wiwing mano enari mananu nesa esobu karirafo fanai.

4 Aromuoaifa Lemuele!

Beng kahai we mananunei dunung angguri,

ete inontarai babafosa emaya we ye memunafo.

5 Dohonao na etunungfo earomiporo fianai aino ehutuaiampo,

tuti wiro esawatutu inontarai mano ene pari fi fosa kaha.

6 Ohong ye mamunafo we inontarai mano adareti mireha,

tuti anggurifo we inontarai mano enerorong fituayafoi.

7 Bento dunungna ambori aroporo fi karirao sodairafo,

tuti wiro aro ne dadirafo ahang kaha.

8 Fai boromuwa modu wawatuti inontarai mano wiro ne mambiriu fea kahai we mantauni medu sawatutiri.

Boitawang wedua inontarai mano efanahang fosa.

9 Fai boromuwai we kutu kaiwo na boarahangnai

tuti nari fi nanai we wawatuti inontarai mano tahatawangsa tuti mano ene pari fi fosa.

10 Wiwing mano dentengfoi mandoni dino sobui ne?

I mani ne harga dedai sewa weru kamiei ne harga dedainei.

11 Ne mangfoi yoaso teri,

ampefe ne mangfoi wiro neta fiea kaha.

12 Niari bengfo pampang we ne mangfoi tuti wiro niari karira fea kaha

na kutu minohi darangfo.

13 I niari ansung we maninggapoifo tuti danunangfo,

tuti miaya we niari fi nanai na warangfo.

14 I netarai toyario kapario kia fianggeng na wairoi ma,

i kia fiangfo ma.

15 Aharorong mani doa kawurua,

meinenang fiang we ne munurorongfo,

tuti deto we mangfata wiwingfosa ene fi erufo.

16 Kawurua enetituai nariaifa, mayeai wiori kahofao miaya weafo,

tuti niari romi angguri na doi sobuai na yufi fo.

17 I meinenang netaraifoi

i mani wiwingno yufi mambiriu dine.

18 Deitawanai weo fio niarifo mani ambori dohong fianggeng bitoya wei,

ampefe ne padamarangfoi denggararu pampang na dirufo we yufi.

19 Warangfo watai na banang fuifoi,

warakikehafo we dari banangfo.

20 Warangfo we fiata inontarai mano tahatawanifoi,

tuti suba warangfo we inontarai mano ne pari fi foi.

21 Na kutu daunanangfo da ma mani wiro arokuaya kaha,

weo meinenang ansung manikaponi kawurua we nemunurorong fosa.

22 Mantauni niari ireu tabung fatafoi we mantauni,

tuti ne ansungfo mani na ireu finahang neo harga dedai.

23 Ne mangfoi mani wewonong na inontarai mano ewewafoniai na bendarifoi,

donio minohi riasa na katai efanduhisa naifoi.

24 I niari ansung tuti waikapuru

mayeai dewayangnai we mantawayang fosa.

25 I wemambiriu tuti inontarai etatori,

wiro arokuayai we rahida bo da ahamawani kaha.

26 I medu na sewai,

tuti dohong aunau na kaiwo fanahang.

27 I deitawang ne munurorongfo na mai,

uremi marirane mani wiro nayai na i kaha.

28 Ne arikang fosa etatori,

tuti ne mangfoi fiai deyo,

29 "Wiwing bitoya enari bengfo,

wape wauno bonteng sewa werusa ne."

30 Uremi bengne mani tatofa tuti uremi bohine mani ambori nai,

wape wiwing mano yoaso Yahwei tuti somi wei mani inontarainei kiai efiai.

31 Ohong fiembaitai wei kariri fio kawurua niari na warangfo,

fiai i na inontarai bitoya earomifo weo fio niari kawuru ampo.