1 Arikang mano sewaifoi mani, taradidau tamang ne aunaufo,

wape inontarai mano firaise we enerireuwai mani, wiro miaya we tarao uarafo kaha.

2 Inontarai mano dentengfoi ambori sobu fi bengfo na kaiwo medurafo,

wape inontarai mano wiro roasoi kahafoi, miaya we niari karirafo.

3 Mandoni dino enetituai akawuru wori medu ki, i deitawang nuaninufoi,

wape mandoni dino borong fiabai mani, sodai neo karirafo.

4 Mano ureng marirafoi dohong we fi bitoya, wape wiro sobu fiea kaha,

wape mano ureng mayafoi sobu fi bitoya.

5 Inontarai mano mesifoi enerireu tatofafo,

wape inontarai mano kerirafoi dohong mamaya tuti dohong karira we mantauni.

6 Fi mahikaio inontarai mesifoi niarifo mani, ambori deitawang weduari,

wape inontarai wesasarifoi ambori mingganggung na fi karira niarifo.

7 Manei niariri we inontarai ne ra bitoya, wape wiro ne fiea kaha,

manei kontai niari fearai we ne pari fi, wape ne rafoi bitoya.

8 Inontarai mano ne ra bitoyafoi mani, biai kutu nuaninufoi,

wape mano ne pari fi foi, wiro tarao manei memuna wei kaha.

9 Inontarai mesifoi ne sambewarafo mani dansairai paria,

wape inontarai mano kerirafoi ne padamarangfoi fefe.Padamarang (pelita)

10 Na tewafo mani, mamunafoi dariai,

wape mano etaramio kaiwo aunaufo mani, awaifo nayai riasa.

11 Ra inontarai sobui aherafoi, ambori niai fantintamai,

wape mandoni dino fianduhi rafoi maididahi pampang mani, ambori ne rafoi fiabai aha.

12 Inontarai manei ambori enerorong fituayai, masino wiro sobu fio enetawanafo kaharai,

wape na kutu fi dohong weafo sobuaifa mani, enerorongfoi mirising.

13 Mandoni dino enerireu kaiwo sariatine mani, i ambori sobu dadirafo,

wape mandoni dino dohong kariri kaiwo ohong kaririafo mani, ambori sobu neo bengfo.

14 Inontarai mano sewaifoi mani, ne aunaufo dohong arang,

donio inontarai ekaharai weru waitepari mararehafoi.

15 Inontarai mano enetituai kariri neo maifoi ambori dohong inontarai siai efaraise,

wape inontarai mano wiro roasoi kahafoi, ne rangfoi ambori dohong dadira.

16 Inontarai mano nungkamiei wewu tofongfoi, ambori dohong kariri ne fio deitawangnai werorongfo,

wape inontarai mano wiro miaya we aunauwi kahafoi, deinawi ne bonggoifo.

17 Ami mangfata mano kerirafoi mani wedaya i tuti inontarai siai esobu dadirafo,

wape ami mangfata enerorong pepayafoi mani kia bengfo, toyari inontarai mano denteng weru meninangfo.

18 Nemi pari fi tuti mamayafo ambori da we inontarai mano wiro tarao kaiwo aunaufo kaha,

wape mandoni dino tarao kaiwo uarafo mani etatori.

19 Inontarai enerorong firaise na kutu sobu fio dohong weafo,

wape inontarai wiro miaya we aunauwi kahafoi firaise we niari karirafo pampang.

20 Mandoni dino firao inontarai mano sewaifoi mani, ambori sewai aha,

wape mandoni dino firao inontarai mano wiro miaya we aunauwi kahafoi mani, ambori sobu karirafo.

21 Fio karirafo dawi inontarai mano wesasarifoi,

wape inontarai mesifoi ambori sobu fiembaitafo.

22 Inontarai mano dentengfoi, fi minohi tutirafo dohongnai watai ria ne ririafoi kiai,

wape ra inontarai sasarifoi ararati we inontarai mesinei.

23 Inontarai mano ne pari fifoi, ne kahofafo mani, dohong fiang bitoya,

wape weai nai, weo wiro oarahana fea kaha.

24 Mandoni dino wiro yu aitatohi kaha mani, enerireu ne arikangfoi,

wape mandoni dino enewawu ne arikangfoi mani, dohong aiboi wei, na kutu niari sarawafo.

25 Inontarai mano mesifoi dampia memosi,

wape inontarai mano kerirafoi wewisi pampang.