1 Nehu kaisung ne mea, metarami sauao kaiwo aunauo mene dai deinauai we metohong kaririai,

tuti metarami sauarai ambori mewaitawangnai,

2 weo yeunau mea na aunau bengne,

ampefe wiro metawing nehu kaiwo aunau ne fanai.

3 Weo na kutu iwe arikang inayai na nehu dai nemufoi,

tuti na kutu ikatuifo nehu ai enewawu yau paria, weo imeiri yau teraifa.

4 Nehu dai deunau yau deyo, "Nehu kaiwone mani todoni kontaio sahara mutu na enemurorongwai,

rutawangnaia mutu nehu kaiwo ohong kaririane ambori munohi barangna mai.

5 Wobu awaifo kontai tofu kaiwo werorongfo,

tuti wiro aromuporoha fanai, kontai wiro bari weru nehu kaiwo na borohune fanai.

6 Wiro tawing awaifoi fanai, ambori dewawu wau,

enemuwawuti tuti i ambori deitawang wedua wau.

7 Awaifo mani, fio reantenangno rurai we wobuaifa,

tuti wau rurai we fieai mani, tofu kaiwo werorongfo.

8 Wau womi we awaifoi, tuti i ambori somi we wau,

masino faungnaia mutu mani, i ambori niari inontarai etato wau.

9 I ambori sata sapewi mampofa denteng paria na numukamiei wai,

tuti sapewi denteng paria ambori dohongni we wau."

10 Nehu kaisungne wau, taramuo nehu kaiwo aunaune tuti rutawangnai,

ambori nemu fuina barangne wairoi.

11 Yeunau rang awaifoi we wau,

tuti iwiwiaing wau na rangbo mimoyanei.

12 Na kutu ro na rangfoi, wau ro na mai wiro fieai wedua wau kaha,

na kutu wau mutofo, wau wiro wodai kaha.

13 Wau ru kaiwo aunaufo, wiro morira fanai,

wau boitawangni, weo andino niari wau barangne.

14 Wiro ro na rang inontarai eharira fosa fanai,

tuti wiro ro ri

15 Ro waroi weru rangbo nani, ro riati kaha,

ro waroi weru ea, ka rang siai.

16 Weo inontarai eharirafosa wiro etena kaha, masino wiro enari karirafo kaharai,

euremi wiro mamong kaha, masino wiro enari inontarai siai esodai karirafo kaha.

17 Enari karirafo mani toyari roti etangfo

tuti enari mamunafo mani toyari angguri etunungfo.

18 Wape inontarai emasi fosa mani ene rangfoi sambewarai toyari ahafoi fiorarisi,

wofoi dautai sambewarai tuti sambewarai aha paria rahida rabuang.

19 Tuti inontarai eharira, ene rangfoi toyario diru mamantiti,

ea eserawawera fio wedaya esodairafo.

20 Nehu arikangne wau, taramu sua nehu kaiwone,

tuti fobera taramuwa kefang we kaiwo imadurai nina.

21 Dohonao nehu kaiwone kai nayai woiroi weru uremune fe,

boraratai na enemurorongwai.

22 Weo nanai aino dohong arang we mano esobui,

tuti nanai aino dohong beng we enetaraifoi.

23 Wau boitawang enemurorongwai sewa weru boitawang fi siai,

weo fi kiaio enemutituaiti tuti naririnei mani dariai na enemurorongwai.

24 Kobi boromu beingsengwa,

boromurawa totofawa mani kobioai waroi weru wau.

25 Uremuwa boti mimoya to fong we neo maifo,

tuti boti na uremu kamiaiwa papayai we neo maifo.

26 Wau ro na rangbo denteng,

ambori rangbo ro naiwai mimoya.✝

27 Wiro ro to boriei weru rang dentengnei fanai,

awemuwa todoni kontaio da waroi weru fi karirane.