1 Mandoni dino nungkamiei mitubaru, masino uari pampang kawurua,

na ahera i ambori tikai tuti mingganggung wiro weai nayai ahang kaha.

2 Masino inontarai emasi fosa eru parenta mani raifoi firaise,

wape masino inontarai eharira fosa eru parenta mani raifoi arohuayai.

3 Arikang mano miaya we sewaifoi mani, niari ne dai firaise,

wape mandoni dino firao wiwing dirufoi mani, mei rafoi awao kiai.

4 Kaiwasafoi ambori etarang na mai, masino mananufoi weparenta na doarahangnai,

wape masino fianduhi doi pajaki bitoyafoi mani, ambori niari kaiwasafoi misuhi.

5 Inontarai mano medu kaiwo mamisi we yuai inontarai siai, ambori sobu fianai aino miaya weafo,

i mani dapa aitepari we inontarai siai awengfo.

6 Inontarai mano kerirafoi mani, ne sasarifoi ambori tipabera mantauni,

wape inontarai mesifoi ambori firaise tuti mirising.

7 Inontarai mesifoi mani, miaya we doarahanai we inontarai mano ne pari fi foi,

wape inontarai kerirafoi wiro deitawangnai werorong kariri fi nana kaha.

8 Inontarai mano deikangganiafoi mani, niari inontarai na bendarifoi ene kasoufo dautai,

wape inontarai mano sewaifoi mani, niari ene kasoufo bia.

9 Masino inontarai mano sewaifoi memuna we inontarai mano webonggoifoi mani,

inontarai mano webonggoifoi ambori kesou tuti mirari kiayati pampang, donio mamunggasawai bereri.

10 Inontarai mano arong tataha we rikafoi enerireu inontarai enerorong dentengfoi,

wape inontarai mano warang maifoi dino waitawang weduari weru inontarai mano arong tataha we rikafoi.

11 Inontarai mano wiro miaya we aunauwi kahafoi deinawi ne kasaufo kai,

wape inontarai mano sewaifo mantauni wedaya ne kasoufo bia.

12 Masino mano wenunggameinei yoaso kaiwo tatofanei mani,

ne arombawahi fosa enari karira.

13 Inontarai mano ne pari fi foi tuti mano sahatawanifoi umai,

nanai aino Yahwei niari uremifo we uwati.

14 Masino mananu mano kiutu kaiwo we inontarai ne pari fi foi na doarahangnai mani,

yu parentafo ambori papayai na darangfo.

15 Aitatohi reafo tuti kaiwo uarafo mani, niari arikangfoi sewai,

wape arikang mano tuatifoi ambori dohong mamaya inanaifa.

16 Masino inontarai eharira fosa efau aha mani, sarawafo bitoya kontai,

wape inontarai mesifoi ambori deti etawafo.

17 Bounau nemu arikangwai, ambori dohong enemurorongwai finahang,

tuti kia mirising we wau.

18 Masino Allai wiro wiwiaing kaha mani, kaiwasafoi seiwou funomai.

Inontarai mano niari kariri kaiwo ohong kaririane mani sobu mai.

19 Wiro bounau nemu womingnei na modu tera fanai,

weo masino tefu kaiwo werorongfo, wape wiro miaya we niari kariria kaha.

20 Boti inontarai mano medu ahera na wiro enetituai naria kahafoi,

bounau i mani dadira sewa weru bounau inontarai mano wiro miaya we aunawi kahafoi.

21 Masino bohong nemu fianggeng feai we nemu womingfoi kariri miaya weafo na kutu wekateifa mani,

na rahida fui wori weinontarai mano nunggamiei mitubaru.

22 Inontarai mano kesou biriufoi wedaya mamuna,

tuti inontarai mano enerorong meninggapoi aherafoi mani, niari sarawai bitoya.

23 Inontarai mano tewafoi, ambori sobu mamaya,

wape inontarai mano enerorong tewawafoi, ambori sobu fayai.

24 Mandoni dino fiata mananapifoi mani, ambori mantauni sobu dadirafo,

weo i dererai kawurua we deisaha neo maifo, wape wiro niari kariria kaha.

25 Mutai inontarai mani, toyari waitepari tipa wau,

wape roaso Yahwei mani, ambori Deitawang wedua wau.

26 Inontarai bitoya erurai we mano yu parentafoi enerorong sawai wesa,

wape Yahwei terai, Andino kiutu kaiwo we ea na doarahangnai.

27 Inontarai mano mesifoi wiro miaya kaha we inontarai mano kerirafoi,

tuti inontarai mano kerirafoi enerireu inontarai mano ne rang mimoyafoi.