1 Inontarai kerirafoi mito, masino wiro manei dawi kaha,

wape inontarai mesifoi niruainso mai toyari singa antung.

2 Masino raifoi emung wawerasa pampang mani, mano ewenunggamiei fosa riwangsa pampang,

tuti masino mano yu parentafoi nungkamiei wewu tofong, tuti deitawang werorongfo mani, raifoi ambori enari kariri kaiwo ohong kaririafo.

3 Inontarai mano ne pari fi manei sahatawang inontarai mano enepari fi fosa,

inontarai nani netarai toyario metangparao dohong romifoi kerira tuti wiro wetarai kaha.

4 Inontarai mano wiro niari kariri kaiwo ohong kaririane kaha mani, sawai we inontarai eharira fosa,

wape inontarai mano niari kariri kaiwo ohong kaririane mani, dapa inontarai eharira fosa.

5 Inontarai kerirafoi mani, wiro deitawang kariri oarahangnane kaha,

wape inontarai mano serawe Yahwei mani, deitawangno fianggengnei kiai.

6 Inontarai mano ne pari fi wape ne koangfoi mirarebanai mani, mahikai sewa weru

inontarai mano ne ra bitoya wape sofa biriu.

7 Inontarai mano dohong kariri kaiwo ohong kaririane, i mani arikangno deitawang kariri neo maifo,

wape inontaraio firao inontarai mano wiro eteitawang mamaya kaha mani, arikang nani dohong mamaya ne dai.

8 Masino fanduhi ra bitoya na bohong doi we inontarai siai, tuti butani we dohong beraha mani fau sewa,

ampefe nemu rawai ambori sawai to inontarai mano enemiwawu fosa ewaramifo, ambori etatori we efata inontarai mano ene pari fi fosa.

9 Mandoni dino tarangfo wiro miaya we tarao kaiwo ohong kaririafo kaha mani,

Allai kontaio wiro miaya we tarao ne nadifoi kaha.

10 Mandoni dino wedaya inontarai warang mainei niari fio karirafo mani,

mantauni ambori sawai rarang kamirei siraifoi, weo niari inontarai siai sawai fefe,

wape inontarai mano mesifoi ambori sobu mahikai.

11 Inontarai ne ra bitoyafoi deitarahio mantauni sewaine,

wape inontarai ne pari fi mano tefu kaiwo werorongfo deitawangnai weo inontaraio ne ra bitoyafoi, wiro sewai kaha.

12 Masino inontarai mesifoi wenunggamiei mani, inontarai bitoya efayai,

wape masino inontarai kerirafoi sobu mambiriu mani, inontarai etadiwa ene tarai.

13 Mandoni dino na mamunggasai dediwa ne sarawafo mani, wiro sobu mai kaha,

wape mandoni dino deisaharai tuti fiotou niari sarawafo mani, Allai ambori enewawuti.

14 Inontarai mano yoaso Yahwei tuti somi wei pampang mani, sobu maifo,

wape inontarai mano enerorong mitubarunei ambori sawai to karira rorongfo.

15 Toyari singa deroa ete andowa memuna dawi inontarai,

tonanai kontai mano wenunggamei kerirafoi sahatawang inontarai mano ene pari fi fosa.

16 Inontarai wenunggamiei mano wiro enetituai kariri neo maifo kaha mani, sahatawang inontarai siai fosa,

wape mano enerireu fi fuba obuai na tofa inontarai siai mani, ne fuina wairoi.

17 Inontarai mano warang rika inontarai siai mani,

wiro finahang kaha weo enetituai inontarai etawi pampang paria suai to kamirei fafofoi.

Wiro fatari fanai, tawingnia!

18 Mandoni dino niari fifiani kontai na warang mai mani, ambori sobu maifo,

wape mandoni dino wiro warang mai kaha mani, ambori sawaifa.

19 Mandoni dino niari romi mani, ambori memosi na fiang,

wape mandoni dino enerorong sopuayai mani, ambori memosi na ne pari fifo.

20 Inontarai mano warang mai mani, ambori sobu moang bitoya,

wape inontarai mano miaya sikera we ne ra bitoyafoi mani, wiro kiaharai weru aiboifo kaha.

21 Masino inontarai manei wiro doarahana kaha wape sau we manei, nana mani wiro beng kaha,

wape inontarai manei miaya we niari sarawai tonanaifa mani, manta we sobu roti aburung bei teraifa.

22 Inontarai mano warang mutufoi sikahera dawi ra,

tuti wiro deitawangnai weo i ambori ahera sawai na wiro ne fia kahafo.

23 Mandoni dino sua inontarai siai mani, ambori etatori sewa weru

inontarai mano manta medu kaiwo mamisi we yuai inontarai siai dedai teraifa.

24 Mandoni dino tetofa tuti dewa tamanai tuti inanai we kia une fianggengfo,

tuti deitarahio wiro sarawa kaha,

i mani netarai toyario inontarai kerirafoi mano memuna paria.

25 Inontarai mano miaya we ne fianggeng bitoya tuti enetituai mantauni terai mani, ambori wedaya mamuna,

wape mandoni dino yoaso Yahwei mani, ne fianggeng bitoya.

26 Mandoni dino deparandini mani, wiro miaya we aunauwi kaha,

wape mandoni dino darang na sewai mani, ambori kiaharai weru dadirafo.

27 Mandoni dino dohong fieai we inontarai mano ne pari fifoi, wiro neta fiea kaha,

wape kangganifo ambori da we inontarai mano kiuhu urengfo na wiro deti kariri inontarai mano ene pari fi fosa kaha.

28 Masino inontarai mano eharira fosa esobu mambiriu we eweparenta mani, inontarai bitoya etadiwa enetarai weo ematai fefe,

wape masino inontarai mano eharira fosa wiro ene mambiriu fea kaha mani, inontarai emasi fosa ambori eweparenta aha.