1 Inontarai mano ne pari fi wape ne koangfoi mirarebanai mani, mahikai sewa weru

inontarai mano sofa biriu tuti wiro miaya we aunawi kaha.

2 Na kutu inontarai manei niari fieai na ahera, wape serawawera nari toafo mani, nanai wiro beng kaha,

inontarai mano sikahera we niari fieai, ambori niari sarawaifa.

3 Inontarai manei ne darangfo karira paria weo ne bonggoi niarifo,

wape kesou Yahwei.

4 Inontarai mano ne ra bitoya mani, ne maniwowirifosa efau,

wape inontarai mano ne pari fi foi mani, ne maniwowiri fosa era werui.

5 Inontarai mano wiro medu mai kariri fio detioafo kaha mani, wiro kiaharai weru aiboifo kaha,

tuti inontarai mano medu funong kaiwo na tetofa mani, wiro sawini weru aiboifo kaha.

6 Inontarai bitoya erurai we eha inontarai mano warang mutu kahai enerorongfoi,

inontarai fosa emaya we ewemaniwowiri ria inontarai mano dohong fi pampang fo.

7 Inontarai mano ne pari fi foi ne doroi fosa enemirireuwi,

kontai ne maniwowiri fosa era waroi werui.

I dawisa, dutangsa pampang we efatari

wape wiro emaya we ewati kariri kaha.

8 Mandoni dino taraie enewawu mantauni mani, yurai ambori nemitituai kariri neo maifo nayai riati,

tuti ambori sobu fio bengfo, masino nungkamiei wewu tofongfo nayai riati pampang.

9 Inontarai mano wiro medu mai kariri fio detioafo kaha mani, wiro kiaharai weru aiboifo kaha,

tuti inontarai mano medu funong kaiwo na tetofa mani, ambori mireha.

10 Wiro beng kahai we inontarai mano wiro miaya we aunawi kahai darang na mai, toyari inontarai mano ne ra bitoyafoi,

tuti neo karira pari mani, womingfoi weparenta sau inontarai mano yu parentafoi.

11 Inontarai mano enetituai kariri neo maifo mani, wiro kesou ahera kaha,

tuti inontaraifoi esomi wei, weo deiyai inontarai ene sarawaifa.

12 Mananufoi kesou mani toyari singa weworu bibe,

wape ne bengfo mani toyari randamang bia sau ninoifo.

13 Arikang mano wiro miaya we aunawi kahafoi mani, wedaya ne dai sobu karirafo,

tuti wiwing mano memuna pampangfoi mani toyari metangno singsuang na fiotoura kaha.

14 Munu tuti rafoi mani fi weriria na wawafo suru,

wape wiwing mano enetituai kariri neo maifo mani na Yahwei terai.

15 Uremi marirafo mani, niari inontaraifoi dena pampang,

tuti inontarai mano wiro miaya we yu fi kahafoi mani, ambori wewisi.

16 Mandoni dino dohong kariri Yahwei ne kaiwo ohong kaririafo mani, dewawu mantauni nuaninufoi,

wape mandoni dino enerireu kaiwo nana mani, ambori mireha.

17 Mandoni dino enewawu inontarai mano ne pari fi foi mani, toyari dohong fieai we Yahwei,

tuti ambori Yahwei biai berahai we fio niari kawurua nanai.

18 Bohong aiboi we nemu arikangwai na kutu ketuifo,

wape dohongnao mantaung wauno wedayari sobu karirafo fe.

19 Inontarai mano kesou aherafoi mani, tawingni ambori mantauni sodua aiboi kariri fio niarifo,

masino fatari webeyari mani, wau ambori fatari aha.

20 Taramuo kaiwo aunaufo tuti bomang we kaiwo uarafo,

ambori wau weinontarai wowai na rahida fui.

21 Inontaraifosa etang fi bitoya na enemirorongfoi we enari,

wape Yahwei ne enetituaifo terai aino Niarine.

22 Inontarai mano enerorong dentengfoi mani, inontarai siai emirising wei.

Ne pari fi mani, mahikai sewa weru sofa biriufoi.

23 Inontarai mano yoaso Yahwei tuti somi wei mani, ambori minohi darang na mai,

tuti inontaraifoi dena na mai na diru, wiro sobu karira kaha.

24 Inontarai mano ureng marirafoi sa warangfo rarang rewangguaifoi,

wape wiro miaya we yuai warangfo to borongfo kaha.

25 Inontarai mano wiro deitawang turura kahafoi, masino deti inontarai mano deikangganiafoi sobu aiboifo mani, arahio nungkamiei wewu tofong.

Inontarai mano tefu kaiwo werorongfo masino uari mani, ambori deitawang werorongfo sewa aha.

26 Arikang mano bioi tamangna ete data inanafoi mani,

niari karira tuti dohong mamaya mauntauni.

27 Nehu kaisung ne wau, masino wiro taramuo nehu kaiwo aunaune kaha mani,

wau ambori wiro nari kariri kaiwo dohong wau boitawang werorongfo kaha.

28 Inontarai mano wiro medu mai kariri fio detiafo kaha mani, enerireu kaiwo ohong kaririafo.

Nari karirafo mani toyari fiang maing, ampefe inontarai mano kerirafoi mirising we niari.

29 Yahwei meinenang aiboi kawuru ampa we inontarai mano deikangganiafoi,

tuti aiwitang reafoi demang kawurua we inontarai mano wiro miaya we aunawi kahafoi kuruinafoi.