1 Masino munohi bampi ria inontarai fuba manei mani,

botisaua fiangno watai na aromuwa.

2 Masino maya we bang fiang bitoya mani,

tawang enemurorongwai!

3 Wiro enemuo ne fiangno maingfo fanai,

weo tarahio tetofa wau na fiang nanai.

4 Wiro rurai ru fi na mambiriu we obu fianggeng bitoya fanai,

masino tofu kaiwo werorongfo mani fotouraia.

5 Arahio boti fianggengfoi mae, wanang fifua kiaia,

weo na tantuma fianggengfoi wewarapema,

tuti sifo to rorafaisi toyario romu enoi.

6 Wiro bang fiangno inontarai mano warang mutufoi dohongnai we waufoi fanai,

wiro enemuo ne fiangno maingfo fanai.

7 Weo fiang bangwa mani detorai kawurua na enerorongfoi.

Medu we wau deyo, "Ro ma bangpi tuti bunung,"

wape enerorongfoi mani wiro mesi kariri kaiwo medurafo kaha.

8 Ampefe boyo momuta fiangno bang kawuru ampo,

tuti wau botuwa weo modu kaiwo beng wei kawurua.

9 Wiro modu na inontarai mano wiro miaya we aunawi kahafoi tarangfo fanai,

weo i ambori enerireu nemu kaiwo awaiwa.

10 Wiro ka ruareafoi weru kahofao kawurua watai na fafongpa fanai,

tuti wiro bowa arikang awatafosa ene kahofafo fanai.

11 Weo Yahwei, ene Mamparirifoi mani Wemambiriu,

Andino sawatutusa we dapa wau.

12 Boitawang sauao aunau ninai,

tuti taramu sauao kaiwo ambori niari wau boitawangnai werorongfo.

13 Wiro mutai we bounau nemu arikangfoi fanai,

i wiro mireha kaha masino boi na aiboifoi.

14 Wau boi na aiboifoi,

donio wau tawingni weru raimeri.

15 Nehu arikang ne wau, masino enemurorongwai sewai mani,

enehurorongnei kontai mirising.

16 Nuhuaninunei mirising,

masino boromurawawai medu kaiwo maifo.

17 Wiro enemurorong kerira we fio inontarai mano ewe sasari fosa enengfo fanai,

wape roaso Yahwei tuti womi wei pampang.

18 Weo wau ambori barang na mai na rahida fui,

tuti fio enemutawangnafo ambori wobuaifa.

19 Nehu arikangne wau, taramu nehu aunaune ambori wowai,

ro na rangno mesifoi.

20 Wiro furao inontarai mano emayeru pampang fosa,

tuti mano etananggoing andowa tarai fanai.

21 Weo mano dunung biriufoi tuti mano denanggoingfoi ambori une pari fi,

tuti uwatai urena terai, donio utata ansung masiabufo.

22 Taramuo tamamuai mano dawing waunei,

tuti wiro enemurireu inamuai na kutu we wiwing kutungfo fanai.

23 Wori ne maifo tuti wiro bowayangna fanai,

tonanai kontai we awaifo, aunaufo tuti tafu kaiwo werorongfo

24 Arikang mano mesifoi mani ne dai ambori firaise,

tuti dai mano ne arikangfosa esawai mani ambori mirarising.

25 Kadono wau we arikang tonana, ambori tamamuai tuti inamuai ufaraise,

kadono bohong mararising we wiwing mano dawing waunei.

26 Nehu arikang ne wau, taramu saua fi kiaio imadurai ninai,

tuti kadono uremuwa deti nehu yarangne toane ambori nari kaririaifa.

27 Weo wiwing dirufoi mani, netarai toyario kamirei berorongfoi,

tuti wiwing mano wiro mei kaha mani, netarai toyario kamirei mereha dedira ambori dohong wau tawaifa.

28 Kontaio, i mani netarai toyario inontarai kerira mano dediwa tuti tefu wau,

i kontaio wewori mang bitoya we wiro erutawang ene kaiwo arerai ria ene wiwingfosa kaha.

29 Mandoni dino deisaharai? Mandoni dino arohuayai?

Mandoni dino memuna? Mandoni weansarai?

Mandoni dino sobu kahai na wiro fiea kaha? Mandoni dino ureng barika?

30 Ea mani inontarai mano eminohi etunung angguri bitoya paria diru rabuang,

erama tuti erawa eserawe anggurio indomifoi we etunumi.

31 Wiro mewati we anggurifoi fanai, masino berika tuti denteng,

tuti wewa na nofi rorongfo,

deda suayai na miaing paria.

32 Wape mayeai kiri wau toyario tawai,

tuti birari ne memufoi toyari tawai memunafoi.

33 Ambori uremu wa boti fianggeng tantuma,

tuti enemurorongwai modu funong kaiwo beng kaha.

34 Wau nemu tarai toyari inontarai mano niayai na andeisa rorong na rawanangrau,

toyari inontarai niayai na aisiang kapari.

35 Wau ambori modu boyo, "Inontarai eboi yau, wape yau wiro nuhuruaingso ipiraha kaha.

Inontarai eboi yau wape wiro yeitawang fiea kaha.

Masino urehu tawasa aha mani,

iserawe anggur aha."