1 Nehu kaisungne wau, wiro aromuporo nehu kaiwo aunau ne fanai,

tuti enemurorongwai dewawu nehu kaiwo ohong kaririane,

2 weo na ne tonanane, nemu fuinane ambori dawaroi, donio wau munohi barang wairoi,

kontai wau ambori munohi na mai.

3 Dohonao enemuwawuwa tuti enemurorong pepayawai unai weru waufe!

Tata suru we raori na ramukanangwai tuti woi suru na enemurorongwai.

4 Ampefe Allai tuti inontarai nesa ambori etato wau na euremi reafo,

tuti emirising we wau.✝

5 Roaso Yahwei na enemurorongwai sentenang,

tuti wiro boparanding mantaung wau boitawangnafo fanai.

6 ButangNi we wiwiaing wau tuti Da foni wau,

ambori Deinawi rangbo mimoyafoi we wau.

7 Dohonao boparanding nemu awaine fanai,

wape roaso Yahwei tuti womi wei terai, tuti wiro nari karira fanai.✝

8 Weo fi nanai ambori niari nemu taraiwai denteng,

tuti niari nemu neinane mutubaru.

9 Fiai Yahwei na nemu ra wai

tuti nemu fitantanang, ne tarai ka fafongwa bohongnai Wei,

10 ambori nemu katai fanduhi fiang naifoi Sonia sefang,

tuti nemu babeu angguriwa nukuruwai sefangna tiwowu.

11 Nehu kaisung ne wau, wiro morira kaiwo uarai na Yahwei fanai,

tuti wiro kosou fanai, masino Dohong aiboi we wau weo nari sarawaifa.✝✝

12 Weo Yahwei sua inontarai mano enewawutifoi,

toyari wawa mang manei sua ne kaisung mano eneoifoi.✝

13 Inontarai mano sobu awaifo tuti nunggamiei wewu tofong mani,

ambori sobu neo maifo.

14 Weo fio mahikai inontarai sobuafo nani kiai, fuba sewa weru peraki sobuafo,

tuti ne harga dadai sewa weru emasi sobuafo kontai.

15 Awaifo ne harga dadai sewa weru kamiei ne harga dedainei,

tuti fi kiaio maya weane wiro weai masi kariria kaha.

16 Fuinao barang wairoine mani, na warang domoyafoi,

ra bitoya tuti inontarai esomi we wau mani, na warang doweifo.

17 Rangbo dohongni foi niari nemirorong piraise,

rang kiaio dohongni foi mani dohong arang na mai.

18 I mani toyari aio sifu dohong arang we mano erukepangni,

tuti mandoni dino yutawangnia mitu mani, ambori sobu mai.

19 Na awaifo, Yahwei Niari nunei kawuru ampa,

na Ne enetituai kariri neo maifo, I niari rora faisi,

20 na Ne deitawang werorongfo, Niari mereha ureng na kahofa rorongfo tibau tuti deda,

tuti kafafe na rora faisi dohong randamang sawai to nunei.

21 Nehu kaisungne wau, borara nemitituai kariri neo maifo tuti titua kariri neo bengfo,

ambori wiro unai weru wau fanai,

22 weo uru ambori unari numuaninuwai darang,

tuti ambori unari nemu barangwa mahikai paria toyari raori denteng na ramukanangwai.

23 Ainanaya wau ambori ro na rang arangbo dentengfoi,

tuti awemuwa wiro sodai kaha.

24 Na kutu wau benafo, wau ambori wiro mutai kaha,

wape wau ambori benawa woo.

25 Wiro mutai we fi tantuma toyari dobarai da ma soru waufo fanai,

tuti na tantuma miung inontarai eharira fosa.

26 Weo Yahwei dino katai we rutawangnai naine,

tuti I wiro sua awemuwa waitepari kerirafoi tipari kaha.

27 Wiro morira we nari neo bengfo we inontarai mano da ma dutang wau we fatari,

mae wau mani wemambiriu we nari fi nana.

28 Masino inontarai manei da ma dutang we fiai ria wau mani, dohona boyo, "Wau roa, aha wori yohongnai ki,"

wape fio dutang weafo watai ria waune.

29 Wiro tang neo karirafo we nemu munu warareng nesa fanai,

weo eroaso wau, na kutu enayai kefang waufo.

30 Wiro modu kohera inontarai fanai,

masino wiro niari karira we wau kaha.

31 Wiro enemurorong kerira we inontarai mano enari karirafo fanai,

wiro ro ria ene rangfoi fanai.

32 Weo inontarai mano enari karirafo Yahwei enerireusa,

wape I firao inontarai mano ewarami maifosa.

33 Yahwei ne deikangganiafo nayai na inontarai mano kerirafoi ne munu rorongfo,

wape Ne moangfo nayai na inontarai emasi fosa ene munu rorongfo.

34 Masino Sobu inontarai mano deikanggani inontarai siaifoi mani, Deikanggani inontaraifoi kontai,

wape I ambori enewawu inontarai mano enerorong tewawafoi.✝

35 Inontarai mano sewaifoi ambori wonongfo beng,

wape inontarai mano wiro miaya we aunauwi kahafoi, ambori sobu mamaya.