1 Nehu kaisung ne wau, masino taramuo nehu kaiwo yeunauane,

tuti aromuo nehu kaiwo aunau we waune,

2 taramu sauarai ambori wobu awaifo,

tuti ruraifa ambori numukamiei wewu tofong,

3 tuti masino rurai we boitawangnai,

tuti wahu we numikamiei wewu tofongfo,

4 tuti masino era we nani kiai toyari erawe peraki nei,

tuti awi fi nanai toyari awi fi minohi tutirai arayai watai,

5 ampefe na tonanafo wau ambori boitawang kariri todoni roaso Yahwei tuti omi wei

tuti wau ambori boitawang werorongfo kariri mandoni dino Allai.

6 Weo Yahwei andino Dohong awaifo,

tuti na Borongfo dariai fio aitawangnai werorongfo tuti numikamiei wewu tofongfo.

7 I derara neo bengfo we inontarai mano mesifoi,

tuti we foti we deitawang wedua inontarai mano warang maifoi,

8 I deitawang wedua inontarai mano doarahanai we inontarai siai,

tuti Dewawu inontarai mano eroaso I.

9 Masino taramuo nehu kaiwo yeunauane, wau ambori boitawang kariri fianai aino maifo, oarahanafo,

warami maifo, tuti kariri todonie minohi arang na maifo.

10 Weo awaifo ambori suayai to enemurorongwai

tuti waitawangnai werorongfo ambori dohong numuaninuwai mirising.

11 Nemitituai kariri neo maifo ambori dewawu wau,

tuti numukamiei wewu tofongfo ambori deitawang wau.

12 Ambori kosau weru rang bo kerirafoi,

tuti weru mano emadu mani etatofa fosa,

13 weru mano era na rang mimoyafoi aha,

tuti era to rang memantitifoi,

14 weru mano emirising we enari neo karirafo,

efaraise we etatofa inontaraifo,

15 weru mano era na rang tehikapa

tuti mano era sarawai.

16 Kontai ambori wau kaharai weru wiwing dirufoi,

tuti weru wiwing mano ne mang kawurua wape yurai we kia enemurorongwai na ne kaiwo waworifo,

17 i mani wiwing da weru ne mangfoi,

tuti aroporo ne kaiwo arerai ria ne mang mano urohong kaiwo arerai na Allai arongfo.

18 Tarai, ne munufoi deisui tuti wioru,

rangbo da to ne munufoi mani rangbo da to raimeri.

19 Mano era kiai wei fosa wiro etaraberasa kaha,

tuti wiro esobu rangbo dohong arangfoi kaha.

20 Ampefe wau ro riatai na rang inontarai bengfoi,

tuti ro pampang na rang inontarai mesifoi.

21 Weo inontarai mano warang mai ambori niayai na mai na ne kahofafo,

tuti inontarai mano mesifoi ambori niayai pampang na wana,

22 wape inontarai eharira ambori eworu weru kahofafo,

tuti inontarai mano wiro roasoi kaha, niayai pampang na wana kaha.