1 Yahwei warangfo yu mananu enerorongfoi, netarai toyario I sang waya dedafoi,

tuti Dohongni deda todoni kontai kariri Eneoafo.

2 Inontarai eteitarahio fio enemitituaitai we enarifo mani mai ampa,

wape Yahwei dino titua kariri enemirorongfoine.

3 Nari bengfo tuti oarahanafo mani Yahwei enoa sewa weru

korbanio nunumi Weifoi.

4 Inontarai eharira fosa mani, enumikamiei fiabai tuti enemirorong tewa,

fi beru ninai kiasa to karirafo.

5 Inontarai mano ureng maya tuti enetituai saua fianai aino yu fo, ambori sobu fianggeng bitoya,

wape inontarai mano yu fi ahera funomafoi mani, ambori wiro sobu fianggeng bitoya kaha.

6 Ra wobu na taperemu tetofa mani,

ambori niai toyari riraung tuti rafoi ambori kia wau to mararehafoi.

7 Fi karirao inontarai eharira enarifo mani, ambori dohong kanggani we mantaunsa,

weo wiro emaya we etoarahangnai kaha.

8 Inontarai mano niari sarawafoi mani ne rangfo tahikapa,

wape inontarai mano wiro niari sarawa kahafoi ne rangfo mimoya.

9 Mesiri wau nayai na munu borieifo mani, mahikai sewa weru

munohi ria wiwing mano memuna biriufoi.

10 Inontarai kerirafoi mani enerorongfoi miaya we niari karirafo pampang,

tuti wiro enewawu inontarai siai kaha.

11 Na kutu wau bohong aiboi we mano deikanggani inontarai siaifo mani, inontarai mano wiro deitawang turura kahafoi deti finanai ambori sewai.

Na kutu inontarai mano sewaifoi bohong aunau wei mani, ambori deitawangnai werorong.

12 Allai Mano Doarahanai Deti saua fi kiaio inontarai kerirafoi niari na munu rorongfo,

tuti Kia inontarai kerirafoi to dadirafo.

13 Mandoni dino kiobu tarangfo weru inontarai mano ne pari fi foi sahu we fiatarifo mani,

wiro sobu fiea kaha, masino mantauni sahu we fatari.

14 Masino inontarai manei kesou wau mani, bohong fikahutuwa na mamunggasai ambori fafe ne kasoufo,

tuti masino bohong fikahutufo na wiro inontarai siai detioa kaha mani, ambori sona enerorong meninggapoifoi.

15 Oarahanafo mani wedaya inontarai mesifoi mirising,

wape inontarai mano niari karirafoi mani mitai.

16 Inontarai mano da weru rangno nemitituai kariri neo maifo mani,

ambori fiotourai na raimeri.

17 Inontarai mano darang na mei funong doi pampang na mirising mani, ambori ne fianggengfo naia kai,

inontarai mano mirising we muniarao fiang tuti fiunung bitoyafo mani, ambori ne pari fi.

18 Inontarai mano kerirafoi mantauni ambori sobu aiboi neo miaya we inontarai mesifoi sobuaifa,

tuti inontarai mano wiro roasoi kahafoi mani, mantauni ambori sodai dadirafo we riwang inontarai mano warang maifoi.

19 Nayai na katai wiarora minanofoi mani, mahikai sewa weru

minohi ria wiwing mano kesou biriu tuti memunafoi.

20 Inontarai sewai ne munufoi mani, derara maningno ne harga dedai tuti ra,

wape inontarai mano wiro miaya we aunauwi kahafoi mani, mei funong ne fianggengfoi kiai.

21 Mandoni dino yurai we niari maifo tuti enewawu inontarai siai mani,

ambori minohi na mai, wonongfo beng tuti inontarai siai etoarahangnai wei.

22 Inontarai sewaifoi mani, ne mambiriu we dau roaing wore kamiei bendario afaimamuna ewaitawangnifoi,

tuti sota wore kamiei bendario inontarai bitoya eteitarahio weduasa.

23 Mandoni dino deitawang wedua borongfoi tuti taperengno medua naifoi mani,

ambori deitawang wedua mantauni weru dadirafo.

24 Inontarai mano miaya we deikangganiafoi mani, tewa tuti deitarahio andino denteng sewa weru inontarai siaine,

tuti niari fifiani kontai na ne tewao wiro werea kaha.

25 Inontarai mano ureng marira we yu fi mani, ne fio miaya weafo aino ambori dohongni mireha.

weo wiro miaya we warangfo yu fi kaha.

26 Rahidafoi sentenang mani, enetituai pampang fianai aino miaya weafo terai,

wape inontarai mesifoi mani, dohong fi we inontarai siai pampang.

27 Yahwei enerireu inontarai kerirafoi ne korbanio niunumifoi,

sewa aha mani dohong korbani nunumi na sang neo karirafo.

28 Inontarai mano wiro medu mai kariri fio detiofo kaha, na mano ehutu kaiwo fosa mani ambori sobu aiboifo,

wape inontarai mano warang maifoi, fio taraoafo mani, wiro fiotouo medu kariria kaha.

29 Inontarai mano kerirafoi niari fafiarai deitawangnai kai, tuti deinawi netarai we andino dentengne,

wape inontarai mano warang maifoi mani, enetituai nariai akawuruwori niari ki.

30 Nemu awai, numukamiei wewu tofong,

tuti nemu mambiriu we enemutituaitai na mai, nani kiai wiro wefia kaha na Yahwei urengfo.

31 Na rahida mamunafoi, afai mamuna fosa emainenang kudafo we emamuna nayai,

wape Yahwei dino Niarisa etahatawang ene aitetafosa ne.