1 Wiwing mano sewaifoi biaung ne munurorongfo,

wape mano webonggoifoi meiria misuhi na mantauni warangfo.

2 Mandoni dino da na warang maifo mani, ambori yoaso Yahwei tuti somi wei,

wape inontarai mano ne rang kerirafoi, enerireu I.

3 Inontarai mano webonggoi borongfo mani wedaya, aiboifoi wiatai na kurungfoi,

wape inontarai mano sewaifoi, bororawafoi dewawuti.

4 Inontarai mano ureng mariranei miaya we dehung sapi kaha, weo nana mani yuai ne fi dampi nai foi pampang,

wape na sapi ne mambiriufo inontarai ambori esobu fiang.

5 Inontarai mano enerorong pepayafoi wiro sofa kaha, medu mai kariri fio detioafo na mano ehutu kaiwo fosa,

wape inontarai mano wiro medu mai kariri fio detioafo kaha mani, tetofa.

6 Inontarai mano enerireuwafoi, yurai we sobu awaifo, wiro sobua kaha,

wape inontarai mano nunggamiei wewu tofongfoi mani, mawa deitawang werorongfo.

7 Nayai waroi weru inontarai mano wiro miaya we aunauwi kahafoi,

weo aitawangnai werorongfo wiro wobuai na bororawafoi kaha.

8 Inontarai mano nungkamiei wewu tofongfoi mani, ne awai tuti deitawang todonie da na maifo,

wape inontarai mano wiro miaya we aunauwi kahafoi, sobu tatofa na ne bonggoifo.

9 Inontarai webonggoi mano enerireu korbani nunuminei mani, wiro miaya we aiyai ne sasarinei kaha,

wape inontarai warang maifoi, yurai we sobu neo bengfo.

10 Enerorong fituayanei, mantauni andino deitawang terine,

tuti inontarai siai kontai wiro deitawang enerorongfoi mirisingfo kaha.

11 Munu inontarai kerirafoi ambori misuhi,

wape munu inontarai warang maifoi ambori doaria pepayai.

12 Rangno inontarai eteitarahio mimoya,

wape reafo da to mararehafoi.✝

13 Na marari rorongfo tarahio obu enemirorongno sai,

tuti faraisefo tarahio obuai na enemirorong fituayai.

14 Inontarai mano daraberahi weru bengfo to neo karirafo, i ambori memosi na fio karirafo,

tuti inontarai mano dentengfoi, i ambori memosi na fio bengfo.

15 Inontarai mano wiro deitawang turura kahafoi, mawa we yoaso fi kiaio taraoafo,

wape inontarai mano nungkamiei wewu tofongfoi, deitawang da fo.

16 Inontarai mano sewaifoi, denansiau tuti da waroi weru karirafo,

wape inontarai mano wiro miaya we aunauwi kahafoi, tewa tuti niruainso darang na mai ampa.

17 Mandoni dino ne rika wiwu ahera mani, webonggoi,

wape inontarai mano enetituai kariri neo maifo, sawani.

18 Inontarai mano wiro deitawang turura kahafoi, sobu fi weriria bonggoifo,

wape inontarai mano nungkamiei wewu tofongfoi mani, sata sapewi mampofa waitawangnai werorongfo.

19 Inontarai kerirafoi somi we inontarai dentengfoi,

inontarai kerirafoi doari na rahutu borong inontarai mesifoi, dutangnai we fiatari.

20 Inontarai mano ne pari fi foi, ne pari maniwowiri,

wape inontarai mano ne ra bitoyafoi ne maniwowirifoi bitoya.

21 Mandoni dino enerireu inontarai siai mani, niari sasari,

wape mano sobu maifo mani, inontarai mano enewawu inontaraio sobu dadirafoi.

22 Mandoni dino enetituaitai tuti sang fi karira fo mani, da na rangbo ra sarawafoi

wape inontarai mano enetituaitai tuti sang fi bengfo mani, sobu nemiwawufo tuti papayafo.

23 Masino inontarai mano yufi na mambiriu mani, sobuarai,

wape madu funong kaiwo mani, wiro obu fiea kaha.

24 Inontarai sewaifoi sobu ra bitoya na fiembaitafo,

wape fiembaitai we inontarai mano wiro miaya we aunawi kahafoi mani, ne bonggoifo.

25 Inontarai mano enerorong pepayafoi medu kariri fio detioafo mani, sawing inontarai weru mararehafoi,

wape mandoni dino wiro medu mai kariri fio detioafo kaha mani, wiro roasoi kaha.

26 Inontarai mano eroaso Yahwei tuti esomi wei mani, eminohi etarang na mai,

kontaio Yahwei deitawang wedua ene arikang nesa.

27 Roaso Yahwei tuti omi wei mani, obu arangfo,

donio inontarai ekaharai weru waitepari mararehafoi.

28 Mananufoi wonongfo beng, masino weparenta inontarai bitoya,

wape inontarai bereri mani, mananufoi wiro ne mambiriu fea kaha.

29 Inontarai mano sawani mani, enetituai kariri neo maifo fuba,

wape mandoni dino sikera we kesou mani, deinawi ne webonggoifo.

30 Enemirorong finahang mani dohong tane tarai denteng,

wape enemirorong piraha mani piro we tane neina ne.

31 Mandoni dino niari kanggani inontarai mano finahangfoi mani, enerireu mano Niaririfoi,

wape mandoni dino enewawu inontarai mano ne pari fi mani, fiai mano Niaririfoi.

32 Inontarai kerirafoi mingganggung na fi karira mantauni niarifo,

wape inontarai mesifoi sobu awawu, weo enerorongfoi mesi fefe.

33 Awaifo nayai na inontarai mano tefu kaiwo werorongfo,

wape inontarai mano wiro miaya we aunauwi kahafoi, wiro deitawang kariri awaifoi kaha.

34 Nari fio maifo mani ambori dohong kaiwasafoi fiabai,

wape sasarifoi dohong mamaya we kaiwasafoi.

35 Mananufoi miaya we mangfata mano enetituai kariri neo maifo,

wape ne kasoufo wasau inontarai mano niari mamayafoi.