मूसा की श्रेष्ठता का सबूत
1 मूसा नै एक कूशी जनान्नी कै गेल्या ब्याह कर लिया था। इस करकै मरियम अर हारुन उसकी उस ब्याता कूशी जनान्नी कै कारण उसकी बुराई करण लाग्गे; 2 उननै कह्या, "के यहोवा नै सिर्फ मूसा ए कै गेल्या बात करी सैं? के उसनै म्हारै तै भी बात कोनी करी?" उनकी या बात यहोवा नै सुणी। 3 मूसा तो धरती पै रहणीये सारे माणसां तै घणा नम्र सुभाव का था। 4 इस करकै यहोवा नै चाणचक मूसा अर हारुन अर मरियम तै कह्या, "थम तीन्नु मिलापआळे तम्बू कै धोरै लिकड़ आओ।" फेर वे तीन्नु लिकड़ आए। 5 फेर यहोवा नै बाद्दळ के खम्भे म्ह उतरकै तम्बू के दरबाजे पै खड्या होकै हारुन अर मरियम ताहीं बुलाया; आखर म्ह वे दोन्नु उसकै धोरै लिकड़ आए। 6 फेर यहोवा नै कह्या, "मेरी बात सुणो जै थारै म्ह कोए नबी हो, तो उसपै मै यहोवा दर्शन कै जरिये अपणे-आप ताहीं जाहिर करुँगा, या सपने म्ह उसतै बात करुँगा। 7 पर मेरा दास मूसा इसा कोनी सै; वो तो मेरे सारे कुण्बे म्ह भरोसेमन्द सै। 8 उसतै मै गुप्त तरियां तै न्ही, पर आम्ही-स्याम्ही अर खुलकै बात करुँ सूं; अर वो यहोवा का स्वरूप देक्खण पावै सै। इस करकै थम मेरे दास मूसा की बुराई करदे होए क्यूँ न्ही डरे?"
9 फेर यहोवा का छो उनपै भड़क्या, अर वो चल्या गया; 10 फेर वो बाद्दळ तम्बू कै उप्पर तै उठ ग्या, अर मरियम कोढ़ तै बर्फ की ढाळ सफेद होगी। अर हारुन नै मरियम कै कान्ही निगांह करी, अर देख्या के वा कोढ़ण होगी सै। 11 फेर हारुन मूसा तै कहण लाग्या, "हे मेरे प्रभु, हम दोनुआ नै जो बेकूफी करी बल्के पाप भी करया, यो पाप म्हारै पै ना लागण देवै। 12 अर मरियम ताहीं उस मरे होए की तरियां ना रहण देवै, जिसकी देह अपणी माँ के पेट तै लिकड़दे ए अधगळी हो।" 13 आखर म्ह मूसा नै यो कहकै यहोवा के नाम की दुहाई देई, "हे परमेसवर, दया कर, अर उस ताहीं ठीक कर।" 14 यहोवा नै मूसा तै कह्या, "जै उसके बाप नै उसकै मुँह पै थुक्या ए होन्दा, तो के सात दिन ताहीं वो शर्मिन्दा ना रहन्दी? इस करकै वो सात दिन ताहीं छावणी कै बाहर बन्द रहवै, उसकै बाद वो फेर भित्तर आण पावै।" 15 आखर म्ह मरियम सात दिन ताहीं छावणी कै बाहर बन्द रही, अर जिब तक मरियम दोबारा आण न्ही पाई जिब ताहीं माणसां नै चालणा शरु न्ही करया। 16 उसकै बाद उननै हसेरोत तै चालकै पारान नाम के जंगळ-बियाबान म्ह अपणे डेरे खड़े करे।