गिनती 28

नियत बखत्तां के विशेष बलिदान

1 फेर यहोवा नै मूसा तै कह्या,

2 "इस्राएलियाँ तै यो हुकम सुणा, ‘मेरा चढ़ावा, यानिके मन्‍नै सुखदायक सुगन्ध देण आळा मेरा हव्यरूपी भोजन, थम लोग मेरै खात्तर उननै ठीक बखत पै चढ़ाण कै खात्तर याद राखिये।’ 3 अर तू उनतै कह: जो-जो थमनै यहोवा कै खात्तर चढ़ाणा होवैगा वे ये सैं; यानिके हर रोज होमबलि कै खात्तर एक-एक साल कै दो बेकसूर भेड़ कै नर बच्‍चे रोज चढ़ाया करियो। 4 एक बच्‍चे नै तड़कै ए तड़कै नै अर दुसरे नै साँझ कै बखत चढ़ाईयो; 5 अर भेड़ के बच्‍चे कै गेल्या एक चौथाई हीन कूटकै लिकाड़े होए तेल तै सणे होए एपा के दसमां हिस्सा मैद्दे का अन्‍नबलि चढ़ाईयो। 6 या हर रोज की होमबलि सै, जो सीनै पर्वत पै यहोवा का सुखदायक सुगन्धआळा हव्य होण कै खात्तर ठहराया गया। 7 अर उसका अर्घ हर एक भेड़ कै बच्‍चे कै गैल एक चौथाई हीन हो; मदिरा का यो अर्घ यहोवा कै खात्तर पवित्रस्‍थान म्ह दियो। 8 अर दुसरे बच्‍चे नै साँझ कै बखत चढ़ाईयो; अन्‍नबलि अर अर्घ समेत तड़कै ए के होमबलि की ढाळ उस ताहीं यहोवा नै सुखदायक सुगन्ध देण आळा हव्य करकै चढ़ाईयो।"

विश्रामदिन के बलिदान

9 "फेर विश्रामदिन म्ह दो बेकसूर भेड़ कै एक साल कै नर बच्‍चे, अर अन्‍नबलि कै खात्तर तेल तै सण्या होया एपा का दो दसमां हिस्सा मैद्दा अर्घ सुधा चढ़ाईयो। 10 हर रोज होमबलि अर उसकै अर्घ के अलावा हर विश्रामदिन का योए होमबलि ठहरया सै।"

मासिक बलिदान

11 "फेर अपणे महिन्‍ना कै शरु म्ह हर महिन्‍ने यहोवा कै खात्तर होमबलि चढ़ाईयो; यानिके दो बाछड़े, एक मिंढा, अर एक-एक साल के बेकसूर भेड़ के सात नर बच्‍चे; 12 अर बाछड़े कै गैल तेल तै सण्या होया एपा का तीन दसमां हिस्सा मैद्दा, अर उस एक मिंढे कै गेल्या तेल तै सण्या होया एपा का दो दसमां हिस्सा मैद्दा; 13 अर हर एक भेड़ के बच्‍चे कै पाच्छै तेल तै सण्या होया एपा का दसमां हिस्सा मैद्दा, उन सारया नै अन्‍नबलि करकै चढ़ाईयो; वो सुखदायक सुगन्ध देण कै खात्तर होमबलि अर यहोवा कै खात्तर हव्य ठहरैगा। 14 अर उनके गेल्या ये अर्घ हों; यानिके बाछड़े कै गेल्या आध्धा हीन, मिंढे कै गेल्या तिहाई हीन, अर भेड़ के बच्‍चे कै गेल्या चौथाई हीन दाखमधु दिया जावै; साल के सारे महिन्‍ना म्ह तै हर एक महिन्‍ने का योए होमबलि ठहरे। 15 अर एक बकरा पापबलि करकै यहोवा कै खात्तर चढ़ाया जावै; यो हर रोज होमबलि अर उसकै अर्घ के अलावा चढ़ाया जावै।"

फसह के त्यौहार के बलिदान

16 "फेर पैहले महिन्‍ने के चौदहवें दिन ताहीं यहोवा का फसह होया करै। 17 अर उस्से महिन्‍ने कै पन्द्रहवें दिन नै त्यौहार लाग्या करै; सात दिन तक अखमीरी रोट्टी खाई जावै। 18 पैहले दिन पवित्र सभा हो; अर उस दिन मेहनत का कोए काम न्ही करया जावै; 19 उस म्ह थम यहोवा कै खात्तर हव्य, यानिके होमबलि चढ़ाईयो; आखर म्ह दो बाछड़े, एक मिंढा, अर एक-एक साल के सात भेड़ कै नर बच्‍चे हों; ये सारे बेकसूर हों; 20 अर उनका अन्‍नबलि तेल तै सणे होए मैद्दे का हो; बाछड़े कै गेल्या एपा का तीन दसमां हिस्सा अर मिंढे कै गेल्या एपा का दो दसमां हिस्सा मैद्दा हो। 21 अर सात्तु भेड़ कै बच्यां म्ह तै हरेक बच्‍चे कै गेल्या एपा का दसमां हिस्सा चढ़ाईयो। 22 अर एक बकरा भी पापबलि करकै चढ़ाईयो, जिसतै थारै खात्तर प्रायश्चित हो। 23 तड़कैए का होमबलि जो हर रोज का होमबलि ठहरया सै, उसकै अलावा इन ताहीं चढ़ाईयो। 24 इस तरियां तै थम उन सात्तु दिनां म्ह भी हव्य का खाणा चढ़ाईयो, जो यहोवा नै सुखदायक सुगन्ध देण कै खात्तर हो; यो हर रोज का होमबलि अर उसकै अर्घ के अलावा चढ़ाया जावै। 25 अर सातमै दिन भी थारी पवित्र सभा हो; अर उस दिन मेहनत का कोए काम ना करियो।"

लामणी के त्यौहार के बलिदान

26 "फेर पैहली उपज कै दिन म्ह, जिब थम अपणे लामणी के त्यौहार म्ह यहोवा कै खात्तर नया अन्‍नबलि चढ़ाओगे, फेर भी थारी पवित्र सभा हो; अर मेहनत का कोए काम ना करियो। 27 अर एक होमबलि चढ़ाणा, जिसतै यहोवा कै खात्तर सुखदायक सुगन्ध हो; यानिके दो बाछड़े, एक मिंढा, अर एक-एक साल के सात भेड़ के नर बच्‍चे; 28 अर उनका अन्‍नबलि तेल तै सणे होए मैद्दे का हो; यानिके बाछड़े कै गेल्या एपा का तीन दसमां अंश, अर मिंढे के गैल एपा का दो दसमां अंश, 29 अर सात्तु भेड़ कै बच्यां म्ह तै एक-एक बच्‍चे कै पाच्छै एपा का दसमां हिस्सा मैदा चढ़ाईयो। 30 अर एक बकरा भी चढ़ाईयो, जिसतै थारै खात्तर प्रायश्चित हो। 31 ये सारे बेकसूर हों; अर हर रोज का होमबलि अर उसके अन्‍नबलि अर अर्घ कै अलावा इसनै भी चढ़ाईयो।"