कनानी राजा पै जीत
1 फेर अराद का कनानी राजा, जो दक्षिण देश म्ह रहवै था, न्यू सुणकै के जिस राह तै वे भेदिए आये थे उस्से राह तै इब इस्राएली आण लागरे सैं, इस्राएल तै लड़या, अर उन म्ह तै कुछ ताहीं कैदी बणा लिया।
2 फेर इस्राएलियाँ नै यहोवा तै न्यू कहकै मन्नत मान्नी, "जै तू सच म्ह उन माणसां ताहीं म्हारै वश म्ह करदे, तो हम उनके नगरां नै सत्यानाश कर देवांगे।"
3 इस्राएल की या बात सुणकै यहोवा नै कनानियाँ ताहीं उनके बस म्ह कर दिया; आखर म्ह उननै उनके नगरां समेत उन ताहीं भी सत्यानाश कर दिया; इसतै उस जगहां का नाम होर्मा21:3 होर्मा सारा विनाश धरया गया।
पीतळ का साँप बणाणा
4 फेर उननै होर पहाड़ तै चाल कै लाल समुन्दर का राह लिया के एदोम देश तै बाहर-बाहर घूमकै जावैं; अर माणसां का मन राह कै कारण घणा घबराग्या।
5 इस करकै वे परमेसवर कै खिलाफ बात करण लाग्गे, अर मूसा तै कह्या, "थम म्हारै ताहीं मिस्र देश तै जंगळ म्ह मरण कै खात्तर क्यूँ ल्याए सो? उरै ना तो रोट्टी सै, अर ना पाणी, अर म्हारी जान इस निकम्मी रोट्टी तै दुखी सैं।"
6 आखर म्ह यहोवा नै उन माणसां म्ह तेज जहर आळे साँप भेज्जे, जो उन ताहीं डसण लाग्गे, अर भोत-से इस्राएली मरगे।
7 फेर माणस मूसा कै धोरै जाकै कहण लाग्गे, "हमनै पाप करया सै, के हमनै यहोवा कै अर तेरे खिलाफ बात करी सैं; यहोवा तै प्रार्थना कर के वो साँपां नै म्हारे म्ह तै दूर करै।" फेर मूसा नै उनकै खात्तर प्रार्थना करी।
8 यहोवा नै मूसा तै कह्या, "एक जहरीले साँप की प्रतिमा बणवाकै खम्भे पै लटका; फेर जो साँप तै डस्या होया उसनै देख ले वो जिन्दा बचैगा।"
9 आखर म्ह मूसा नै पीत्तळ का एक साँप बणवाकै खम्भे पै लटकाया; फेर साँप के डसे होया म्ह तै जिस-जिस नै उस पीत्तळ कै साँप की ओड़ देख्या वो जिन्दा बच ग्या।
होर पर्वत तै मोआब की और जाणा
10 फेर इस्राएलियाँ नै चाल कै ओबोत म्ह डेरे खड़े करे।
11 अर ओबोत तै चाल कै अबारीम म्ह डेरे खड़े करे, जो पूरब की ओड़ मोआब कै स्याम्ही के जंगळ म्ह सै।
12 ओड़ै तै चाल कै उननै जेरेद नाम के नाळे म्ह डेरे खड़े करे।
13 ओड़ै तै चाल कै उननै अर्नोन नदी, जो जंगळ म्ह बहवै अर एमोरियां कै देश तै लिकड़ै सै, उसकी दुसरी ओड़ डेरे खड़े करे; क्यूँके अर्नोन मोआबियाँ अर एमोरियां कै बिचाळै होकै मोआब देश की हद ठहरी सै।
14 इस करकै यहोवा कै संग्राम नाम की किताब म्ह इस तरियां लिख्या सै,
"सूपा म्ह वाहेब,
अर अर्नोन की घाटी,
15 अर उन घाटियाँ की ढळाण जो आर नाम के नगर की ओड़ सै,
अर जो मोआब की हद पै सै।"
16 फेर ओड़ै तै चाल कै वे बैर ताहीं गए; ओड़ै वोए कुआँ सै जिसकै बारै म्ह यहोवा नै मूसा तै कह्या था, "उन माणसां नै कठ्ठा कर, अर मै उननै पाणी दियुँगा।"
17 उस बखत इस्राएल नै न्यू गीत गाया,
"हे कुएँ, उमड़ आ, उस कुएँ कै बारै म्ह गाओ!
18 जिस ताहीं हाकिमां नै खोद्या,
अर इस्राएल के रईसां नै अपणे सोट्याँ अर लाठियाँ तै खोद लिया।"
फेर वे जंगल तै मत्ताना ताहीं,
19 अर मत्ताना तै नहलीएल ताहीं, अर नहलीएल तै बामोत ताहीं। 20 अर बामोत तै चाल कै उस तराई तक जो मोआब कै मदानां म्ह सै, अर पिसगा के उस सिरे तक भी जो यशीमोन की ओड़ झुक्या सै पोहचगे।
एमोरियां के राजा सीहोन पै जीत
21 फेर इस्राएल नै एमोरियां के राजा सीहोन कै धोरै दूत्तां तै न्यू कुह्वा भेज्या,
22 "म्हारे ताहीं अपणे देश म्ह तै होकै जाण दे; हम मुड़कै किसे खेत या अंगूर के बाग म्ह तै न्ही जावांगे; ना किसे कुएँ का पाणी पीवागें; अर जिब ताहीं तेरे देश तै बाहर ना हो जावां जद तक सड़क तै ए चाल्ले जावागें।"
23 फेर भी सीहोन नै इस्राएल तै अपणे देश म्ह तै होकै जाण न्ही दिया; बल्के अपणी सारी सेना नै कठ्ठा करकै इस्राएल का मुकाबला करण नै जंगळ म्ह तै लिकड़ आया, अर यहस म्ह आकै उनतै लड़या।
24 फेर इस्राएल के माणसां नै उस ताहीं तलवार तै मार दिया, अर अर्नोन तै यब्बोक नदी तक, जो अम्मोनियाँ की हद थी, उसके देश के अधिकारी होग्ये; अम्मोनियाँ की हद तो मजबूत थी।
25 इस करकै इस्राएलियाँ नै एमोरियां के सारे नगरां ताहीं ले लिया, अर उन म्ह, यानिके हेशबोन अर उसकै लोवै-धोरै के नगरां म्ह रहण लाग्गे।
26 हेशबोन एमोरियां के राजा सीहोन का नगर था; उसनै मोआब के पाच्छले राजा तै लड़कै उसका सारा देश अर्नोन ताहीं उसकै हाथ तै खोस लिया था।
27 इस करकै गहरी बात के कहण आळे कहवैं सैं,
"हेशबोन म्ह आओ,
सीहोन का नगर बसै, अर मजबूत करया जावै।
28 क्यूँके हेशबोन तै आग,
सीहोन के नगर तै लौ लिकड़ी;
जिसतै मोआब देश का आर नगर,
अर अर्नोन के ऊँच्ची जगहां के स्वामी भस्म होए।
29 हे मोआब, तेरे पै हाय!
कमोश देवता की प्रजा नाश होई,
उसनै अपणे बेट्याँ ताहीं भगोड़ा,
अर अपणी बेटियाँ ताहीं एमोरी राजा सीहोन की दास्सी कर दिया।
30 हमनै उन ताहीं गिरा दिया सै,
हेशबोन दीबोन तक नाश होग्या सै,
अर हमनै नोपह अर मेदबा तक भी उजाड़ दिया सै।"
31 इस तरियां इस्राएली एमोरियां कै देश म्ह रहण लाग्गे।
32 फेर मूसा नै याजेर नगर का भेद लेण नै भेज्या; अर उननै उसके गाम्मां ताहीं ले लिया, अर ओड़ै के एमोरियां ताहीं उस देश तै लिकाड़ दिया।
बाशान के राजा ओग पै जीत
33 फेर वे मुड़कै बाशान कै राह तै जाण लाग्गे; अर बाशान के राजा ओग नै उनका मुकाबला करया, वो उनतै लड़ण नै अपणी सारी सेना समेत एद्रेई म्ह लिकड़ आया।
34 फेर यहोवा नै मूसा तै कह्या, "उसतै ना डर; क्यूँके मै उसनै सारी सेना अर देश समेत तेरे हाथ म्ह कर दियुँ सूं; अर जिसा तन्नै एमोरियां के राजा हेशबोनवासी सीहोन कै गेल्या करया सै, उसाए उसकै गेल्या भी करियो।"
35 फेर उननै उस ताहीं, अर उसके बेट्याँ अर सारी प्रजा ताहीं उरै तक मारया के उसका कोए भी न्ही बच्या; अर वे उसकै देश के अधिकारी बणगे।