गिनती 8

दीव्यां ताहीं जळाण की विधि

1 फेर यहोवा नै मूसा तै कह्या,

2 "हारुन ताहीं समझाकै यो कह के जिब-जिब तू दीव्यां नै जळावै तब-तब सात्तु दीव्यां का चाँदणा टांडी कै स्याम्ही हो।"

3 इस करकै हारुन नै उस्से तरियां ए करया, यानिके जो हुकम यहोवा नै मूसा ताहीं दिया था उस्से कै मुताबिक उसनै दीव्यां ताहीं जळाया के वे टांडी कै स्याम्ही चाँदणा दें।

4 अर टांडी की बणावट इसी थी, यानिके यो पाए तै लेकै फूल्‍लां ताहीं गढ़े होए सोन्‍ने का बणाया गया था; जो नमूना यहोवा नै मूसा तै दिखाया था उस्से कै मुताबिक उसनै टांडी ताहीं बणाया।

लेवियाँ के नियुक्त होण का बखान

5 फेर यहोवा नै मूसा तै कह्या,

6 "इस्राएलियाँ कै बिचाळै तै लेवियाँ नै न्यारा लेकै शुद्ध कर। 7 उननै शुद्ध करण कै खात्तर तू इसा कर, के पवित्र करण आळा पाणी उनपै छिड़क दे, फेर वे सर्वांग मुण्डन करावै, अर कपड़े धोवैं, अर वे अपणे ताहीं शुद्ध करैं। 8 फेर वे तेल तै सणे होए मैद्दे के अन्‍नबलि सुधा एक बाछड़ा ले लें, अर तू पापबलि कै खात्तर एक दूसरा बाछड़ा लिये। 9 अर तू लेवियाँ ताहीं मिलापआळे तम्बू कै स्याम्ही पोहचाणा, अर इस्राएलियाँ की सारी मण्डळी ताहीं कठ्ठा करिये। 10 फेर तू लेवियाँ नै यहोवा कै आग्गै धोरै ले आईये, अर इस्राएली अपणे-अपणे हाथ उनपै धरैं, 11 फेर हारुन लेवियाँ नै यहोवा कै स्याम्ही इस्राएल के माणसां की ओड़ तै हिलाई होई भेंट करकै अर्पण करै के वे यहोवा की सेवा करण आळे ठहरै। 12 फेर लेवीय अपणे-अपणे हाथ उन बाछड़याँ कै सिरां पै धरैं; फेर तू लेवियाँ कै खात्तर प्रायश्चित करण नै एक बाछड़ा पापबलि अर दूसरा होमबलि करकै यहोवा कै खात्तर चढ़ाईये। 13 अर लेवियाँ नै हारुन अर उसकै बेट्याँ कै स्याम्ही खड्या करिये, अर उननै हिलाणे की भेंट कै खात्तर यहोवा तै अर्पण करिये।"

14 "इस तरियां तू उननै इस्राएल के माणसां म्ह तै न्यारा करिये, अर वे मेरे ए ठहरैगें। 15 अर जिब तू लेवियाँ ताहीं शुद्ध करकै हिलाई होई भेंट कै खात्तर अर्पण कर ले, उसकै बाद वे मिलापआळे तम्बू सम्बन्धी सेवा-पाणी करण कै खात्तर भित्तर आया करैं। 16 क्यूँके वे इस्राएल के माणसां म्ह तै मेरै ताहीं पूरी तरियां तै अर्पण करे होए सैं; मन्‍नै उन ताहीं सारे इस्राएलियाँ म्ह तै एक-एक जनान्‍नी के जेठ्यां कै बदलै अपणालिया सै। 17 इस्राएलियाँ के जेठ्ठे, चाहे माणस के हों, चाहे पशु के, सारे मेरे सैं; क्यूँके मन्‍नै उस बखत अपणे खात्तर पवित्र ठहराया जिब मन्‍नै मिस्र देश के सारे जेठ्यां ताहीं मार गेरया। 18 अर मन्‍नै इस्राएलियाँ के सारे जेठ्यां कै बदलै लेवियाँ ताहीं लिया सै। 19 उननै लेकै मन्‍नै हारुन अर उसके बेट्याँ ताहीं इस्राएल के माणसां म्ह तै दान करकै दे दिया सै, के वे मिलापआळे तम्बू म्ह इस्राएलियाँ कै कारण सेवकाई अर प्रायश्चित करया करैं, कदे इसा ना हो के जिब इस्राएली पवित्रस्‍थान के धोरै आवै फेर उनपै कोए महाविपत्ति आ पड़ै।"

20 लेवियाँ कै बारै म्ह यहोवा का यो हुकम पाकै मूसा अर हारुन अर इस्राएलियाँ की सारी मण्डळी नै उनकै गेल्या ठीक उस्से तरियां ए करया। 21 लेवियाँ नै तो अपणे-आप ताहीं पाप तै शुद्ध करया, अर अपणे कपड़यां ताहीं धो लिया; अर हारुन नै उन ताहीं यहोवा कै स्याम्ही हिलाई होई भेंट करकै अर्पण करया, अर उननै शुद्ध करण ताहीं उनके खात्तर प्रायश्चित भी करया। 22 अर उसकै बाद लेवी हारुन अर उसकै बेट्याँ कै स्याम्ही मिलापआळे तम्बू म्ह अपणी-अपणी सेवा करण नै गए; अर जो हुकम यहोवा नै मूसा तै लेवियाँ कै बारै म्ह दिया था, उस्से कै मुताबिक वे उनतै बरताव करण लाग्गे।

23 फेर यहोवा नै मूसा तै कह्या, 24 "जो लेवियाँ नै करणा सै वो यो सै, के पच्‍चीस साल की अर उसतै घणी उम्र म्ह वे मिलापआळे तम्बू तै सम्बन्धी काम करण कै खात्तर भित्तर हाजिर होया करैं; 25 अर जिब पचास साल कै हों तो फेर उस सेवा कै खात्तर ना आवैं अर ना काम करैं; 26 पर वे अपणे भाई-बन्धुआं कै गेल्या मिलापआळे तम्बू कै धोरै रुखाळ का काम करया करैं, अर किसे ढाळ की सेवा ना करैं। लेवियाँ ताहीं जो-जो काम सौंपे जावैं उनकै बारै म्ह तू उनतै इसाए करिये।"