गिनती 18

याजकां अर लेवियाँ के सेवा के काम

1 फेर यहोवा नै हारुन तै कह्या, "पवित्रस्‍थान के खिलाफ अधर्म का भार तेरे पै, अर तेरे बेट्याँ अर तेरे पिता कै घरान्यां पै होवैगा; अर थारे याजक के काम कै खिलाफ अधर्म का बोझ तेरे पै अर तेरे बेट्याँ पै होवैगा। 2 अर लेवी का गोत्र, यानिके तेरे मूलपुरुष के गोत्रआळे जो तेरे भाई सैं, उननै भी अपणे गैल ल्याया कर, अर वे तेरे तै मिल जावैं, अर तेरी सेवा-पाणी करया करैं, पर साक्षीपत्र के तम्बू कै स्याम्ही तू अर तेरे बेट्टे ए आया करैं। 3 जो तन्‍नै सौंप्या गया सै उसकी अर सारे तम्बू की भी वे हिफाजत करया करैं; पर पवित्रस्‍थान के बरतनां कै अर वेदी कै धोरै ना आवैं, इसा ना हो के वे अर थम भी मर जाओ। 4 आखर म्ह वे तेरे तै मिल जावैं, अर मिलापआळे तम्बू की सारी सेवकाई की चिज्जां की हिफाजत करया करैं; पर जो तेरे कुल का ना हो वो थारै धोरै न्ही आण पावैं। 5 अर पवित्रस्‍थान अर वेदी की रुखाळी थम ए करया करो, जिसतै इस्राएलियाँ पै फेर मेरा छो ना भड़कै। 6 पर मन्‍नै खुद थारे लेवी भाईयाँ ताहीं इस्राएलियाँ कै बिचाळै तै न्यारा कर लिया सै, अर वे मिलापआळे तम्बू की सेवा करण कै खात्तर थारै तै अर यहोवा तै सौंप दिये गये सैं। 7 पर वेदी के अर बीचआळे पड़दे कै भित्तर की बात्तां की सेवा कै खात्तर तू अर तेरे बेट्टे अपणे याजक पद की हिफाजत करियो, अर थम ए सेवा करया करियो; क्यूँके मै थमनै याजक पद की सेवा दान करुँ सूं; अर जो तेरे कुल का ना हो वो जै धोरै आवै तो मार दिया जावै।"

याजकां की मदद के खात्तर भेंट

8 फेर यहोवा नै हारुन तै कह्या, "सुण, मै खुद तेरे ताहीं ठाई होई भेंट सौंप देऊँ सूं, यानिके इस्राएल की पवित्र करी होई चिज्जां; जितनी हों उननै मै तेरा अभिषेक आळा हिस्सा ठहराकै तन्‍नै अर तेरे बेट्याँ ताहीं सदा का हक करकै दे दियुँ सूं। 9 जो परमपवित्र चीज आग म्ह भस्म न्ही करी जावैगी वे तेरी-ए ठहरै, यानिके इस्राएलियाँ के सारे चढ़ावां म्ह तै उनके सारे अन्‍नबलि, सारे पापबलि, अर सारे दोषबलि*18:9 दोषबलि पाप/गलती खात्तर भुगताण कै रूप म्ह बलि, जो वे मेरै ताहीं दें, वो तेरै अर तेरे बेट्याँ कै खात्तर परमपवित्र ठहरै। 10 उन ताहीं परमपवित्र चीज जाणकै खाया करियो; उन ताहीं हरेक माणस खा सकै सै; वे तेरै खात्तर पवित्र सैं। 11 फेर ये चीज भी तेरी ठहरै, यानिके जितनी भेंट इस्राएली हिलाण कै खात्तर देवैं, उननै मै तन्‍नै अर तेरे बेट्टे-बेटियाँ ताहीं सदा का हक करकै दे दियुँ सूं; तेरे घरान्यां म्ह जितने शुद्ध हों वो उननै खा सकैगें। 12 फेर आच्छी तै आच्छी नई दाखमधु, अर गेहूँ, यानिके इनकी पैहली पैदावार जो वे यहोवा नै देवैं, वो मै तन्‍नै देऊँ सूं। 13 उनके देश की सारी ढाळ की पैहली उपज, जो वे यहोवा कै खात्तर ले आवैं, वो तेरी-ए ठहरै; तेरे घरान्यां म्ह जितने शुद्ध हों वे उननै खा सकैगें। 14 इस्राएलियाँ म्ह जो कुछ अर्पण करया जावै वो भी तेराए ठहरै। 15 सारे प्राणियाँ म्ह तै जितने अपणी-अपणी माँ के जेठ्ठे हों, जिन ताहीं माणस यहोवा कै खात्तर चढ़ावैं, चाहे माणस कै चाहे पशु कै जेठ्ठे हों, वे सारे तेरे ए ठहरै; पर माणसां अर अशुद्ध पशुआं के जेठ्यां नै दाम लेकै छोड़ दियो। 16 अर जिन ताहीं छुड़ाणा हो, जिब वे महिन्‍ने भर के हों फेर उनके खात्तर अपणे ठहराए होए मोल कै मुताबिक, यानिके पवित्रस्‍थान के बीस गेरा के शेकेल कै हिसाब तै पाँच शेकेल*18:16 पाँच शेकेल लगभग 55 ग्राम लेकै उननै छोड़णा। 17 पर गां, या भेड़, या बकरी के जेठ्ठे ताहीं न्ही छोड़णा; वे तो पवित्र सैं। उनके लहू नै वेदी पै छिड़क दिये, अर उनकी चर्बी नै बलि करकै जळाईये, जिसतै यहोवा कै खात्तर सुखदायक सुगन्ध हो; 18 पर उनका माँस तेरा ठहरै, अर हलाई होई छात्ती, अर सोळी जाँघ भी तेरी-ए ठहरै। 19 पवित्र चिज्जां की जितनी भेंट इस्राएली यहोवा नै देवैं, उन सारियां नै मै तन्‍नै अर तेरे बेट्टे-बेटियाँ नै सदा का हक करकै दे दियुँ सूं यो तो तेरै अर तेरे वंश कै खात्तर यहोवा की सदा कै खात्तर नूण का अटल करार सै।" 20 फेर यहोवा नै हारुन तै कह्या, "इस्राएलियाँ कै देश म्ह तेरा कोए हिस्सा न्ही होवैगा, अर ना उनकै बिचाळै तेरा कोए अंश होवैगा; उनकै बिचाळै तेरा हिस्सा अर तेरा अंश मै ए सूं।"

लेवियाँ की मदद खात्तर भेंट

21 "फेर मिलापआळे तम्बू की जो सेवा लेवी करै सैं उसकै बदलै मै उननै इस्राएल का सारा दशमांश उनका खुद का हिस्सा कर दियुँ सूं। 22 अर भविष्य म्ह इस्राएली मिलापआळे तम्बू कै धोरै ना आवैं, इसा ना हो के उनके सिर पै पाप लाग्गै, अर वे मर ज्यां। 23 पर लेवी मिलापआळे तम्बू की सेवा करया करैं, अर उनके अधर्म का बोझ वेए ठाया करैं; यो थारी पीढ़ियाँ म्ह सदा की विधि ठहरै; अर इस्राएलियाँ कै बिचाळै उनका कोए अपणा हिस्सा ना होवैगा। 24 क्यूँके इस्राएली जो दशमांश यहोवा ताहीं ठाई होई भेंट करकै देवैंगे, उसनै मै लेवियाँ ताहीं खुद का हिस्सा करकै देऊँ सूं, इस करकै मन्‍नै उनकै बारै म्ह कह्या सै, के इस्राएलियाँ कै बिचाळै कोए हिस्सा उन ताहीं ना मिलै।"

लेवियाँ का दशमांश

25 फेर यहोवा नै मूसा तै कह्या, 26 "तू लेवियाँ तै कह, के जिब-जिब थम इस्राएलियाँ कै हाथ तै वो दशमांश ल्यो जिस ताहीं यहोवा थारै तै थारा खुद का हिस्सा करकै उनतै दिलावै सै, तब-तब उस म्ह तै यहोवा कै खात्तर एक ठाई होई भेंट करकै दशमांश का दशमांश दियो। 27 अर थारी ठाई होई भेंट थारै हित कै खात्तर इसी गिणी जावैगी जिसा खलिहाण म्ह का अन्‍न, या रसकुण्ड म्ह का अंगूर का रस गिण्या जावै सै। 28 इस तरियां थम भी अपणे सारे दशमांश म्ह तै, जो इस्राएल के माणसां की ओड़ तै पाओगे, यहोवा नै एक ठाई होई भेंट दियो; अर यहोवा की या ठाई होई भेंट हारुन याजक ताहीं दिया करियो। 29 जितने दान थम पाओ उन म्ह तै हरेक का आच्छा तै आच्छा हिस्सा, जो पवित्र ठहरया सै, उस ताहीं यहोवा कै खात्तर ठाई होई भेंट करकै पूरी-पूरी दियो। 30 इस करकै तू लेवियाँ तै कह, के जिब थम उस म्ह का आच्छा तै आच्छा हिस्सा ठाकै द्यो, फेर यो थारै खात्तर खलिहाण म्ह के अन्‍न, अर रसकुण्ड के रस कै बराबर गिण्या जावैगा; 31 अर उस ताहीं थम अपणे घरान्यां सुधा सारी जगहां म्ह खा सको सो, क्यूँके मिलापआळे तम्बू की जो सेवा थम करोगे उसका बदला योए ठहरया सै। 32 अर जिब थम उसका आच्छा तै आच्छा हिस्सा ठाकै द्यो फेर उसकै कारण थारै ताहीं पाप न्ही लागैगा। पर इस्राएल की पवित्र करी होई चिज्जां नै अपवित्र न्ही करियो, इसा ना हो के थम मर जाओ।"