गिनती 27

सलोफाद की बेटियाँ की बिनती

1 फेर यूसुफ के बेट्टे मनश्शे के कुण्बे के खानदान्‍ना म्ह तै सलोफाद, जो हेपेर का बेट्टा, अर गिलाद का पोत्ता, अर मनश्शे के बेट्टे माकीर का पड़पोत्ता था, उसकी बेट्टी जिनके नाम महला, नोवा, होग्ला, मिल्का, अर तिर्सा सैं वे धोरै आई। 2 अर वे मूसा अर एलीआजर याजक अर प्रधानां अर सारी मण्डळी कै स्याम्ही मिलापआळे तम्बू के दरबाजे पै खड़ी होकै कहण लाग्गी, 3 "म्हारा पिता जंगळ म्ह मर ग्या; पर वो उस मण्डळी म्ह का न्ही था जो कोरह की मण्डळी के गैल होकै यहोवा कै खिलाफ कठ्ठी होई थी, वो अपणे ए पाप कै कारण मरया; अर उसकै कोए बेट्टा न्ही था। 4 तो म्हारै पिता का नाम उसकै कुल म्ह तै बेट्टा ना होण कै कारण क्यूँ मिट ज्या? म्हारै चाच्याँ कै बिचाळै म्हारै ताहीं भी कुछ धरती खुद का हिस्सा होण कै खात्तर द्यो।" 5 उनकी या बिनती मूसा नै यहोवा तै सुणाई। 6 यहोवा नै मूसा तै कह्या, 7 "सलोफाद की बेटियाँ ठीक कहवैं सैं; इस करकै तू उनके चाच्याँ कै बिचाळै उननै भी जरुर कुछ जमीन खुद का हिस्सा होण कै खात्तर दे, यानिके उनके पिता का हिस्सा उनके हाथ्थां म्ह सौप दे। 8 अर इस्राएल के माणसां तै न्यू कह, ‘जै कोए माणस बिना बेट्टा मर ज्या, तो उसका हिस्सा उसकी बेट्टी कै हाथ सौंपयो। 9 अर जै उसकै कोए बेट्टी भी ना हो, तो उसका हिस्सा उसके भाईयाँ ताहीं दियो। 10 अर जै उसके भाई भी ना हों, तो उसका हिस्सा उसके चाच्याँ नै दियो। 11 अर जै उसकै चाचा भी ना हों, तो उसकै कुल म्ह तै उसका जो रिशतेदार सबतै धोरै हो उन ताहीं उसका हिस्सा दियो के वो उसका अधिकार हो। इस्राएलियाँ कै खात्तर न्यू न्याय की विधि ठहरैगी, जिस तरियां के यहोवा नै मूसा तै हुकम दिया।’"

यहोशू का चुण्या जाणा

12 फेर यहोवा नै मूसा तै कह्या, "इस अबारीम नाम के पर्वत कै उप्पर चढ़कै उस देश नै देख ले जिस ताहीं मन्‍नै इस्राएलियाँ तै दिया सै। 13 अर जिब तू उस ताहीं देख लेगा, फेर अपणे भाई हारुन की तरियां तू भी अपणे माणसां म्ह जा मिलैगा, 14 क्यूँके सीन नाम के जंगळ म्ह थम दोनुआं नै मण्डळी कै बहस करण कै बखत मेरे हुकम नै तोड़कै मेरै तै बलवा करया, अर मेरे ताहीं चोए कै धोरै उनकी निगांह म्ह पवित्र न्ही ठहराया।" (यो मरीबा नाम का चोवा सै जो सीन नाम के जंगळ-बियाबान कै कादेश म्ह सै) 15 मूसा नै यहोवा तै कह्या, 16 "यहोवा, जो सारे प्राणियाँ की आत्मा का परमेसवर सै, वो इस मण्डळी के माणसां कै उप्पर किसे आदमी नै ठहरा दे, 17 जो उसकै स्याम्ही आया-जाया करै, अर उनका लिकाड़ण अर बैठाण आळा हो; जिसतै यहोवा की मण्डळी बिना पाळी की भेड़-बकरियाँ की ढाळ ना रहवै।" 18 यहोवा नै मूसा तै कह्या, "तू नून के बेट्टे यहोशू नै लेकै उसपै हाथ धर; वो तो इसा आदमी सै जिस म्ह मेरा आत्मा बस्या सै; 19 अर उसनै एलीआजर याजक कै अर सारी मण्डळी कै स्याम्ही खड़या करकै उनकै स्याम्ही उसनै हुकम दे। 20 अर अपणी महिमा म्ह तै कुछ उसनै दे, जिसतै इस्राएल के माणसां की सारी मण्डळी उसकी मान्या करै। 21 अर वो एलीआजर याजक कै स्याम्ही खड़या होया करै, अर एलीआजर उसकै खात्तर यहोवा तै ऊरीम*27:21 ऊरीम ऊरीम अर तुम्मीम ये मिस्र देश तै ल्याए होए बेसकिमती पत्थर थे, जिसतै याजक परमेसवर की इच्छा कै बारै म्ह हाँ या ना बताया करदे थे का हुकम पूच्छया करै; अर वो इस्राएल के माणसां की सारी मण्डळी समेत उसकै कहण तै जाया करै, अर उस्से कै कहण तै बोहड़ भी आया करै।" 22 यहोवा के इस हुकम कै मुताबिक मूसा नै यहोशू ताहीं लेकै, एलीआजर याजक अर सारी मण्डळी कै स्याम्ही खड़या करकै, 23 उसपै हाथ धरे, अर उसतै हुकम दिया जिस तरियां के यहोवा नै मूसा कै जरिये कह्या था।