गिनती 19

शुद्धिकरण की विधि

1 फेर यहोवा नै मूसा अर हारुन तै कह्या, 2 "नियम-कायदे के जिस विधि का हुकम यहोवा देवै सै वो न्यू सै; के तू इस्राएल के माणसां तै कह, के मेरै धोरै एक लाल बेकसूर बछिया ले आओ, जिस म्ह कोए भी खोट ना हो, अर जिसपै जूआ कदे न्ही धरया गया हो। 3 फेर उसनै एलीआजर याजक ताहीं द्यो, अर वो उस ताहीं छावणी तै बाहर ले जावै, अर कोए उस ताहीं एलीआजर याजक कै स्याम्ही बलिदान करै; 4 फेर एलीआजर याजक अपणी आन्गळी तै उसका कुछ लहू लेकै मिलापआळे तम्बू कै स्याम्ही की ओड़ सात बार छिड़क दे। 5 फेर कोए उस बछिया नै खाल, माँस, लहू, अर गोबर समेत उसकै स्याम्ही जळावै; 6 अर याजक देवदार की लाकड़ी, जूफा, अर लाल रंग का कपड़ा लेकै उस आग म्ह जिस म्ह बछिया जळदी हो गेर देवै। 7 फेर वो अपणे कपड़े धोवै अर स्नान करै, इसकै बाद छावणी म्ह तो आवै, पर साँझ तक अशुद्ध रहवैगा। 8 अर जो माणस उसनै जळावै वो भी पाणी तै अपणे कपड़े धोवै अर स्नान करै, अर साँझ तक अशुद्ध रहवै। 9 फेर कोए शुद्ध माणस उस बछिया की राख कठ्ठी करकै छावणी कै बाहर किसे शुद्ध जगहां म्ह धर देवै; अर वो राख इस्राएल की मण्डळी कै खात्तर अशुद्धता तै छुड़ाणआळे पाणी कै खात्तर धरी रहवै; वो तो पापबलि सै। 10 अर जो माणस बछिया की राख कठ्ठी करै वो अपणे कपड़े धोवै, अर साँझ तक अशुद्ध रहवैगा। अर यो इस्राएलियाँ खात्तर, अर उनकै बिचाळै रहण आळे परदेशियाँ खात्तर भी सदा की विधि ठहरै।"

लाश छूण तै अशुद्धता

11 "जो किसे माणस की लाश नै छुवै वो सात दिन ताहीं अशुद्ध रहवै; 12 इसा माणस तीसरे दिन पाप छुड़ाकै अपणे-आपनै पवित्र करै, अर सातमै दिन शुद्ध ठहरै; पर जै वो तीसरे दिन अपणे-आपनै पाप छुड़ाकै पवित्र ना करै, तो सातमै दिन शुद्ध न्ही ठहरैगा। 13 जो कोए किसे माणस की लाश छू कै पाप छुड़ाकै अपणे नै पवित्र न्ही करै, वो यहोवा के निवास-स्थान का अशुद्ध करण आळा ठहरैगा, अर वो माणस इस्राएल देश म्ह तै नाश करया जावै; क्यूँके अशुद्धता तै छुड़ाण आळा पाणी उसपै न्ही छिड़क्या गया, इस करकै वो अशुद्ध ठहरैगा, उसकी अशुद्धता उस म्ह बणी रहवैगी।"

14 "जै कोए माणस घर म्ह मर ज्या तो नियम-कायदे यो सै, के जितने उस डेरे म्ह रहवैं, या उस म्ह जावैं, वे सारे सात दिन ताहीं अशुद्ध रहवैं। 15 अर हरेक खुल्या होया बरतन, जिसपै कोए ढकणा लाग्या ना हो, वो अशुद्ध ठहरै। 16 अर जो कोए मदानां म्ह तलवार तै मारे होया नै, या मरी होई देह नै, या माणस की हाड्डी नै, या किसे कब्र नै छुवै, तो सात दिन तक अशुद्ध रहवै। 17 अशुद्ध माणस कै खात्तर जळाई होई पापबलि की राख म्ह तै कुछ बरतन म्ह लेकै उसपै चोए का पाणी गेरया जावै; 18 फेर कोए शुद्ध माणस जूफा लेकै उस पाणी म्ह डुबा कै पाणी नै उस डेरे पै, अर जितने बरतन अर माणस उस म्ह हों, उनपै छिड़के, अर हाड्डी के, या मारे होए के, या मरी होई देह नै, या कब्र कै छूण आळे पै छिड़क देवै; 19 वो शुद्ध माणस तीसरे दिन अर सातमै दिन उस अशुद्ध माणस पै छिड़कै; अर सातमै दिन वो उसके पाप छुड़ाकै उस ताहीं पवित्र करै, फेर वो अपणे कपड़ेयां नै धोकै अर पाणी तै स्नान करकै साँझ नै शुद्ध ठहरै।"

20 "जो कोए अशुद्ध होकै अपणे पाप छुड़ाकै अपणे-आपनै पवित्र न्ही करावै, वो माणस यहोवा के पवित्रस्‍थान का अशुद्ध करण आळा ठहरैगा, इस करकै वो मण्डळी कै बिचाळै तै नाश करया जावै; अशुद्धता तै छुड़ाण आळा पाणी उसपै ना छिड़क्या गया, इस कारण तै वो अशुद्ध ठहरैगा। 21 अर या उनकै खात्तर सदा की विधि ठहरै। जो अशुद्धता तै छुड़ाण आळा पाणी छिड़कै वो अपणे कपड़ेयां नै धोवै; अर जो माणस अशुद्धता तै छुड़ाण आळा पाणी छुवै वो भी साँझ तक अशुद्ध रहवै। 22 अर जो कुछ वो अशुद्ध माणस छुवै वो भी अशुद्ध ठहरै; अर जो माणस उस चीज ताहीं छुवै वो भी साँझ ताहीं अशुद्ध रहवै।"