1 फेर सारी मण्डळी चिल्‍ला उठी; अर रात भर वे माणस रोन्दे ए रहे। 2 अर सारे इस्राएली मूसा अर हारुन पै बड़बड़ाण लाग्गे; अर सारी मण्डळी उसतै कहण लाग्गी, "भला होंदा के हम मिस्र देश म्ह ए मर जान्दे! या इस जंगळ म्ह ए मर जान्दे! 3 यहोवा म्हारे ताहीं उस देश म्ह ले जाकै क्यूँ तलवार तै मरवाणा चाहवै सै? म्हारी बिरबान्‍नी अर बाळ-बच्‍चे तो लूट म्ह चले जावैंगे; के म्हारे खात्तर आच्छा कोनी के हम मिस्र देश म्ह बोहड़ जावां?" 4 फेर वे आप्पस म्ह कहण लाग्गे, "आओ, हम किसे नै अपणा प्रधान बणा ल्यां, अर मिस्र देश नै बोहड़ चाल्‍लां।" 5 फेर मूसा अर हारुन इस्राएल के माणसां की सारी मण्डळी कै स्याम्ही मुँह कै बळ गिरे। 6 अर नून का बेट्टा यहोशू अर यपुन्‍ने का बेट्टा कालेब, जो देश के भेद लेण आळयां म्ह तै थे, अपणे-अपणे कपड़े पाड़कै, 7 इस्राएल के माणसां की सारी मण्डळी तै कहण लाग्गे, "जिस देश का भेद लेण नै हम आस्सै-पास्सै घूमकै आये सां, वो भोत बढ़िया देश सै। 8 जै यहोवा म्हारे तै राज्जी हो, तो म्हारै ताहीं उस देश म्ह, जिस म्ह दूध अर शहद की धारा बहवै सैं, पहुँचाकै उस ताहीं हमनै दे देवैगा। 9 सिर्फ इतणा करो के थम यहोवा कै खिलाफ बलवा ना करो; अर ना उस देश के माणसां तै डरो, क्यूँके वे म्हारी रोट्टी ठहरैगें; छाया उनके उप्पर तै हटगी सै, अर यहोवा म्हारै गैल सै; उनतै ना डरो।" 10 फेर सारी मण्डळी चिल्‍ला उठी, के इन ताहीं पथराव करो। फेर यहोवा का तेज मिलापआळे तम्बू म्ह सारे इस्राएलियाँ पै प्रकाशमान होया।

11 फेर यहोवा नै मूसा तै कह्या, "ये माणस कद ताहीं मेरा इन्कार करदे रहवैंगे? अर मेरे सारे चमत्कारां नै देखकै भी कद ताहीं मेरै पै बिश्वास न्ही करैंगे? 12 मै उननै मरी तै मारूँगा, अर उनके खुद के हिस्से तै उननै लिकाड़ दियुँगा, अर तेरे तै एक जात पैदा करुँगा जो उनतै बड़ी अर ताकतवर होवैगी।" 13 मूसा नै यहोवा तै कह्या, "फेर तो मिस्री जिनकै बिचाळै तै तू अपणी सामर्थ दिखाकै उन माणसां नै काढ ले आया सै न्यू सुणैगें, 14 अर इस देश के बासिन्दया तै कहवैंगे। उननै तो यो सुण्या सै के तू जो यहोवा सै इन माणसां कै बिचाळै रहवै सै; अर साफ दिखाई देवै सै, अर तेरा बाद्दळ उनके उप्पर रुक्या रहवै सै, अर तू दिन ताहीं बाद्दळ कै खम्भे म्ह, अर रात नै आग कै खम्भे म्ह होकै इनकै आग्गै-आग्गै चाल्या करै सै। 15 इस करकै जै तू इन माणसां नै एक ए बार म्ह मार देवै, तो जिन जात्तां नै तेरी मान बढाई सुणी सै वे कहवैंगी, 16 के यहोवा उन माणसां ताहीं उस देश म्ह जिस ताहीं उसनै उनतै देण की कसम खाई थी, पोहचा न्ही सक्या, इस करकै उसनै उन ताहीं जंगळ म्ह घात कर दिया सै। 17 इस करकै इब प्रभु की सामर्थ की महिमा तेरे कहण कै मुताबिक हो, 18 के यहोवा छो करण म्ह धीरजवन्त अर घणा करुणामय सै, अर अधर्म अर कसूर नै माफ करण आळा सै, पर वो कसूरवार ताहीं किसे ढाळ तै बेकसूर न्ही ठहरावैगा, अर बड़े बुजुर्गां के अधर्म की सजा उनके बेट्याँ, अर पोत्यां, अर पड़पोत्यां ताहीं देवै सै। 19 इब इन माणसां के अधर्म नै अपणी बड़ी करुणा कै मुताबिक, अर जिस तरियां तन्‍नै मिस्र देश तै लेकै उरै ताहीं माफ करदा रहया सै उस्से तरियां ए इब भी माफ करदे।"

20 यहोवा नै कह्या, "तेरी बिनती के मुताबिक मै माफ करुँ सूं; 21 पर मेरे जीवन की कसम साच्‍चए सारी धरती यहोवा की महिमा तै भरपूर हो जावैगी; 22 उन सारे माणसां नै जिननै मेरी महिमा मिस्र देश म्ह अर जंगळ म्ह देक्खी, अर मेरे करे होए चमत्कारां नै देखण पै भी दस बार मेरै ताहीं परख लिया, अर मेरी बात कोनी मान्‍नी, 23 इस करकै जिस देश कै बारै म्ह मन्‍नै उनके पूर्वजां तै कसम खाई, उस ताहीं वे कदे देखण न्ही पावैंगें; यानिके जितन्या नै मेरा अपमान करया सै उन म्ह तै कोए भी उस ताहीं देखण न्ही पावैगा। 24 पर इस कारण तै के मेरे दास कालेब के गैल न्यारी ए आत्मा सै, अर उसनै पूरी तरियां तै मेरा अनुकरण करया सै, मै उस ताहीं उस देश म्ह जिस म्ह वो हो आया सै पोहचाऊँगा, अर उसकी पीढ़ी उस देश की हकदार होवैगी। 25 अमालेकी अर कनानी माणस तराई म्ह रहवैं सैं, इस करकै कल थम घूमकै चलो, अर लाल समुन्दर कै किनारे तै जंगळ म्ह जाओ।"

26 फेर यहोवा नै मूसा अर हारुन तै कह्या, 27 "या बुरी मण्डळी मेरै पै बड़बड़ान्दी रहवै सै, उसनै मै कद तक सहन्दा रहूँ? इस्राएली जो मेरै पै बड़बड़ान्दे रहवैं सैं, उनका यो बड़बड़ाणा मन्‍नै तो सुण्या सै। 28 इस करकै उनतै कह के यहोवा की या वाणी सै, के मेरे जीवन की कसम जो बात थमनै मेरै सुणदे होए कही सैं, पक्‍का मै उस्से कै मुताबिक थारै गेल्या बरताव करुँगा। 29 थारी लाश इस्से जंगळ म्ह पड़ी रहवैंगी; अर थम सारया म्ह तै बीस साल की या उसतै घणी उम्र के जितने गिणे गये थे, अर मेरै पै बड़बड़ावैं थे, 30 उस म्ह तै यपुन्‍ने के बेट्टे कालेब अर नून के बेट्टे यहोशू नै छोड़ कोए भी उस देश म्ह न्ही जाण पावैगा, जिसकै बारै मन्‍नै कसम खाई सै के थमनै उस म्ह बसाऊँगा। 31 पर थारे बाळ-बच्‍चे जिनकै बारै म्ह थमनै कह्या सै, के वे लूट म्ह चले जावैंगे, उन ताहीं मै उस देश म्ह पोहचा दियुँगा; अर वे उस देश नै जाण लेवैगें जिस ताहीं थमनै तुच्छ जाण्या सै। 32 पर थारी लाश इस्से जंगळ म्ह पड़ी रहवैंगी। 33 अर जिब ताहीं थारी लाश जंगळ म्ह ना गळ जावै तब ताहीं, यानिके चाळीस साल तक, थारे बाळ-बच्‍चे जंगळ म्ह थारे व्यभिचार का फळ भोगदे होए भटकदे रहवैंगे। 34 जितने दिन थम उस देश का भेद लेन्दे रहे, यानिके चाळीस दिन उनकी गिणती कै मुताबिक, एक दिन कै बदलै एक साल, यानिके चाळीस साल ताहीं थम अपणे अधर्म की सजा ठान्दे रहोगे, फेर थम जाण ल्योगे के मेरा बिरोध के सै। 35 मै यहोवा यो कह चुक्या सूं, के इस बुरी मण्डळी के माणस जो मेरै खिलाफ कठ्ठे होए सैं इस्से जंगळ म्ह मर मिटैंगे; अर पक्‍का इसाए करुँगा भी।"

36 फेर जिन माणसां ताहीं मूसा नै उस देश कै भेद लेण कै खात्तर भेज्या था, अर उननै बोहड़कै उस देश की बदनाम्मी करकै सारी मण्डळी ताहीं कुड़कुड़ाण कै खात्तर उकसाया था, 37 उस देश की वे बदनाम्मी करण आळे आदमी यहोवा कै मारण तै उसकै स्याम्ही मरगे। 38 पर देश के भेद लेण आळे माणसां म्ह तै नून का बेट्टा यहोशू अर यपुन्‍ने का बेट्टा कालेब दोन्‍नु जिन्दा रहे।

39 फेर मूसा नै ये बात सारे इस्राएलियाँ तै कह सुणाई अर वे घणा बिलाप करण लाग्गे। 40 अर वे सबेरै उठकै न्यू कहन्दे होए पहाड़ की चोट्टी पै चढ़ण लाग्गे, "हमनै पाप करया सै; पर इब त्यार सां, अर उस जगहां म्ह जावागें जिसकै बारै यहोवा नै वचन दिया था।" 41 फेर मूसा नै कह्या, "थम यहोवा के हुकम का उलंघण क्यूँ करो सो? यो सफल न्ही होवैगा। 42 यहोवा थारे बिचाळै न्ही सै, मत चढ़ो, न्ही तो दुश्मनां तै हार जाओगे। 43 ओड़ै थारै आग्गै अमालेकी अर कनानी माणस सैं, इस करकै थम तलवार तै मारे जाओगे; थम यहोवा की और तै मुड़गे सो, इस करकै वो थारै गैल न्ही रहवैगा।" 44 पर वे ढिठाई करकै पहाड़ की चोट्टी पै चढ़गे, पर यहोवा के करार का सन्दूक, अर मूसा, छावणी तै न्ही हटे। 45 फेर अमालेकी अर कनानी जो उस पहाड़ पै रहवैं थे उनपै चढ़ आए, अर होर्मा ताहीं उननै मारदे चले आए।