गिनती 4

कहातियाँ की जिम्मेदारी

1 फेर यहोवा नै मूसा अर हारुन तै कह्या,

2 "लेवियाँ म्ह तै कहातियाँ की, उनके खानदान्‍ना अर पितरां के घरान्यां कै मुताबिक, गिणती करो, 3 यानिके तीस साल तै लेकै पचास साल ताहीं की उम्र आळयां म्ह, जितने मिलापआळे तम्बू म्ह काम-काज करण नै भर्ती सैं। 4 अर मिलापआळे तम्बू म्ह परमपवित्र चिज्जां कै बारै म्ह कहातियाँ का यो काम होवैगा, 5 यानिके जिब-जिब छावणी का चालणा हो तब-तब हारुन अर उसके बेट्टे भित्तर आकै, बीचआळे पड़दे नै तारकै उसतै साक्षीपत्र के सन्दूक ताहीं ढक दें; 6 फेर वे उसपै सुइसां की खाल का आवरण गेरै, अर उसकै उप्पर पूरे नीले रंग का कपड़ा गेरै, अर सन्दूक म्ह डंड्यां नै लगावै। 7 फेर भेंट आळी रोट्टी की मेज पै नीला कपड़ा बिछाकै उसपै परातां, धूपदानां, कड़छ्याँ, अर उडेलण के कटोरयां नै धरै; अर रोज की रोट्टी भी उसपै हो; 8 फेर वे उनपै लाल रंग का कपड़ा बिछाकै उस ताहीं सुइसां की खाल के आवरण तै ढकै, अर मेज के डंड्यां ताहीं लगा देवै। 9 फेर वे नीले रंग का कपड़ा लेकै दीव्यां, गुलतराशां, अर गुलदान्‍ना सुधा चाँदणा देण आळी टांडी ताहीं, अर उसके सारे तेल के बरतनां ताहीं, जिनतै उसकी सेवा-पाणी होवै सै, ढकै; 10 फेर वे सारे सामान सुधा टांडी नै सुइसां की खाल के आवरण कै भित्तर धरकै डंड्यां पै धर दें। 11 फेर वे सोन्‍ने की वेदी पै एक नीला कपड़ा बिछाकै उस ताहीं सुइसां की खाल के आवरण तै ढकै, अर उसके डंड्यां नै लगा देवै; 12 फेर वे सेवा-पाणी के सारे सामान नै लेकै, जिसतै पवित्रस्‍थान म्ह सेवा-पाणी होवै सै, नीले कपड़े के भित्तर धरकै सुइसां की खाल कै आवरण तै ढकै, अर डंड्यां पै धर देवै। 13 फेर वे वेदी पै तै सारी राख ठाकै वेदी पै बैंगनी रंग का कपड़ा बिछावै; 14 फेर जिस सामान तै वेदी पै सेवा-पाणी होवै सै वो सब, यानिके उसके कड़छे, काँटे, फावड़ियाँ, अर कटोरे और, वेदी का सारा सामान उसपै धरै; अर उसकै उप्पर सुइसां की खाल का आवरण बिछाकै वेदी म्ह डंड्यां ताहीं लगावै। 15 अर जिब हारुन अर उसके बेट्टे छावणी कै चाल्‍लण के बखत पवित्रस्‍थान अर उसके सारे सामान ताहीं ढक लेवै, फेर उसकै पाच्छै कहाती उसके ठाण कै खात्तर आवैं, पर किसे पवित्र चिज्जां नै ना छुवै, कदे इसा ना हो के मर जावैं। कहातियाँ के ठाण के खात्तर मिलापआळे तम्बू की येए चीज सैं।"

16 "जो चीज हारुन याजक के बेट्टे एलीआजर ताहीं देखभाळ कै खात्तर सौंपी जावै वे ये सैं, यानिके चाँदणा देण के खात्तर तेल, अर खुशबुदार धूप, अर हर रोज अन्‍नबलि, अर अभिषेक का तेल, अर सारे निवास, अर उस म्ह की सारी चीज, अर पवित्रस्‍थान अर उसका सारा सामान।"

17 फेर यहोवा नै मूसा अर हारुन तै कह्या, 18 "कहातियाँ कै खानदान के गोत्रां ताहीं लेवियाँ म्ह तै नाश न्ही होण दिए; 19 उसकै गेल्या इसा करो, के जिब वे परमपवित्र चिज्जां के धोरै आवैं, फेर ना मरै पर जिन्दा रहवैं; इस कारण हारुन अर उसकै बेट्टे भित्तर आकै एक-एक कै खात्तर उसकी सेवा अर उसका बोझ ठहरा दें, 20 अर वे पवित्र चिज्जां कै देखण नै पलभर कै खात्तर भी भित्तर न्ही आण पावै, कदे इसा ना हो के मर जावैं।"

गेर्शोनियाँ की जिम्मेदारी

21 फेर यहोवा नै मूसा तै कह्या, 22 "गेर्शोनियाँ की भी गिणती उनके पितरां के घरान्यां अर खानदान्‍ना के मुताबिक कर; 23 तीस साल तै लेकै पचास साल ताहीं की उम्र आळे, जितने मिलापआळे तम्बू म्ह सेवा करण नै भर्ती हों उन सारया नै गिण ले। 24 सेवा करण अर बोझ ठाण म्ह गेर्शोनियाँ कै कुल आळयां की या सेवा हो; 25 यानिके वे निवास के पटाँ, अर मिलापआळे तम्बू अर उसके आवरण, अर इसके उप्पर आळे सुइसां की खाल के आवरण, अर मिलापआळे तम्बू के दरबाजे के पड़दे, 26 अर निवास, अर वेदी के चौगरदे के आँगण के पड़दे, अर आँगण के दरबाजे के पड़दे, अर उनकी डोरी, अर उनकै काम म्ह आण आळे सारे सामान, इन सारया नै वे ठाया करैं; अर इन चिज्जां तै जितने काम होवै सै वो सारा कुछ भी उनकी सेवकाई म्ह आवै। 27 अर गेर्शोनियाँ के वंश की सारी सेवकाई हारुन अर उसके बेट्याँ के कहण तै होया करै, यानिके जो किमे उन ताहीं ठाणा, अर जो-जो सेवकाई उन ताहीं करणी हो, उनका सारा बोझ थम ए उननै सौप्या करो। 28 मिलापआळे तम्बू म्ह गेर्शोनियाँ कै खानदान्‍ना की योए सेवकाई ठहरै; अर उनपै हारुन याजक का बेट्टा ईतामार हक राक्खै।"

मरारियाँ की जिम्मेदारी

29 "फेर मरारियाँ नै भी तू उनके खानदान्‍ना अर पितरां के घरान्यां कै मुताबिक गिण ले; 30 तीस साल तै लेकै पचास साल ताहीं की उम्र आळे, जितने मिलापआळे तम्बू की सेवा करण नै भर्ती हों, उन सारया नै गिण ले। 31 अर मिलापआळे तम्बू की जिन चिज्जां के ठाण की सेवा उन ताहीं मिलै वे ये हों, यानिके निवास के तख्ते, बेंड़े, खम्भे, अर कुर्सियाँ, 32 अर चौगरदेकै आँगण के खम्भे, अर इनकी कुर्सी, खूँटे, डोरियाँ, अर कई ढाळ के काम का सारा सामान ढोण के खात्तर उन ताहीं सौप्या जावै के उस म्ह तै एक-एक चीज का नाम लेकै थम गिण ल्यो। 33 मरारियाँ के खानदान्‍ना की सारी सेवकाई जो परमेसवर नै मिलापआळे तम्बू कै बारै म्ह करणी होवैगी वो योए सै; वो हारुन याजक के बेट्टे ईतामार कै हक म्ह रहवै।"

लेवियाँ की गिणती

34 फेर मूसा अर हारुन अर मण्डळी के प्रधानां नै कहातियाँ के वंश ताहीं, उनके खानदान्‍ना अर पितरां के घरान्यां कै मुताबिक, 35 तीस साल तै लेकै पचास साल की उम्र के, जितने मिलापआळे तम्बू की सेवा करण नै भर्ती होए थे, उन सारया नै गिण लिया; 36 अर जो अपणे-अपणे कुल कै मुताबिक गिणे गए, वे दो हजार साढ़े सात सौ थे। 37 कहातियाँ कै खानदान्‍ना म्ह तै जितने मिलापआळे तम्बू म्ह सेवा करण आळे गिणे गए, वे इतणै ए थे; जो हुकम यहोवा नै मूसा कै जरिये दिया था उस्से कै मुताबिक मूसा अर हारुन नै इन ताहीं गिण लिया।

38 गेर्शोनियाँ म्ह तै जो अपणे खानदान्‍ना अर पितरां के घरान्यां कै मुताबिक गिणे गए, 39 यानिके तीस साल तै लेकै पचास साल ताहीं की उम्र के, जो मिलापआळे तम्बू की सेवा करण नै टोळ म्ह भर्ती होए थे, 40 उनकी गिणती उनके खानदान्‍ना अर पितरां के घरान्यां कै मुताबिक दो हजार छः सौ तीस थी। 41 गेर्शोनियाँ कै खानदान्‍ना म्ह तै जितने मिलापआळे तम्बू म्ह सेवा करण आळे गिणे गए, वे इतणे ए थे; यहोवा के हुकम कै मुताबिक मूसा अर हारुन नै इन ताहीं गिण लिया।

42 फेर मरारियाँ के खानदान्‍ना म्ह तै जो अपणे खानदान्‍ना अर पितरां कै घरान्यां कै मुताबिक गिणे गए, 43 यानिके तीस साल तै लेकै पचास साल ताहीं की उम्र के, जो मिलापआळे तम्बू की सेवा करण नै भर्ती होए थे, 44 उनकी गिणती उनके खानदान्‍ना के मुताबिक तीन हजार दो सौ थी। 45 मरारियाँ के खानदान्‍ना म्ह तै जिन ताहीं मूसा अर हारुन नै, यहोवा के उस हुकम कै मुताबिक जो मूसा के जरिये मिल्या था, गिण लिया वे इतणे ए थे।

46 लेवियाँ म्ह तै जिन ताहीं मूसा अर हारुन अर इस्राएली प्रधानां नै उनके खानदान्‍ना अर पितरां के घरान्यां कै मुताबिक गिण लिया, 47 यानिके तीस साल तै लेकै पचास साल तक की उम्र आळे, जितने मिलापआळे तम्बू की सेवा करण अर बोझ ठाण का काम करण नै हाजिर होण आळे थे, 48 उन सारया की गिणती आठ हजार पाँच सौ अस्सी थी। 49 ये अपणी-अपणी सेवा अर बोझ ढोण कै खात्तर यहोवा के कहण पै गए। जो हुकम यहोवा नै मूसा ताहीं दिया था उस्से कै मुताबिक वे गिणे गए।