1 फेर यहोवा नै मूसा अर हारुन तै कह्या,

2 "इस्राएली मिलापआळे तम्बू कै चौगरदे नै अर उसकै स्याम्ही अपणे-अपणे झण्डे अर अपणे-अपणे पितरां कै घरान्यां के निशान कै धोरै अपणे डेरे खड़े करैं। 3 अर जो पूरब दिशा की ओड़ जित्त सूर्योदय होवै सै, अपणे-अपणे दलां कै मुताबिक डेरे खड़े करया करैं, वेए यहूदा की छावणी आळे झण्डे के माणस होवैंगे, अर उनका प्रधान अम्मीनादाब का बेट्टा नहशोन होवैगा, 4 अर उनके टोळ के गिणे होए आदमी चौहत्तर हजार छः सौ सैं। 5 उनकै धोरै जो डेरे खड़े करया करैं वे इस्साकार कै गोत्र के हों, अर उनका प्रधान सूआर का बेट्टा नतनेल होवैगा, 6 अर उनके टोळ के गिणे होए आदमी चौवन हजार च्यार सौ सैं। 7 इनकै धोरै जबूलून के गोत्रआळे रहवैंगे, अर उनका प्रधान हेलोन का बेट्टा एलीआब होवैगा, 8 अर उनके टोळ के गिणे होए आदमी सत्तावन हजार च्यार सौ सैं। 9 इस तरियां तै यहूदा की छावणी म्ह जितने अपणे-अपणे दलां कै मुताबिक गिणे गये वे सारे मिलकै एक लाख छियासी हजार च्यार सौ सैं। पैहल्या येए कूच करया करैं।"

10 "दक्षिण की ओड़ रूबेन की छावणी के झण्डे के माणस अपणे-अपणे दलां कै मुताबिक रहवैं, अर उनका प्रधान शदेऊर का बेट्टा एलीसूर होवैगा, 11 अर उनके टोळ के गिणे होए आदमी साढ़े छियालिस हजार सैं। 12 उनकै धोरै जो डेरे खड़े करया करैं वे शिमोन कै गोत्र के होवैंगे, अर उनका प्रधान सूरीशद्दै का बेट्टा शलूमीएल होवैगा, 13 अर उनके टोळ के गिणे होए आदमी उणसठ हजार तीन सौ सैं। 14 फेर गाद कै गोत्र के रहवैं, अर उनका प्रधान रूएल का बेट्टा एल्यासाप होवैगा, 15 अर उनके टोळ के गिणे होए आदमी पैंतालीस हजार साढ़े छः सौ सैं। 16 रूबेन की छावणी म्ह जितने अपणे-अपणे दलां कै मुताबिक गिणे गये वे सारे मिलकै एक लाख इक्यावन हजार साढ़े च्यार सौ सैं। दूसरा कूच इनका हो।"

17 "उनके पाच्छै अर सारे छावनियाँ कै बीचों बीच लेवियाँ की छावणी सुधा मिलापआळे तम्बू का कूच होया करे; जिस क्रम तै वे डेरे खड़े करया करैं उस्से क्रम तै वे अपणे-अपणे जगहां पै अपणे-अपणे झण्डे कै धोरै-धोरै चाल्‍लै।"

18 "पश्चिम की ओड़ एप्रैम की छावणी के झण्डे के माणस अपणे-अपणे दलां कै मुताबिक रहवैं, अर उनका प्रधान अम्मीहूद का बेट्टा एलीशामा होवैगा, 19 अर उनके टोळ के गिणे होए आदमी साढ़े चाळीस हजार सैं। 20 उनकै धोरै मनश्शे के गोत्र के रहवैं, अर उनका प्रधान पदासूर का बेट्टा गम्लीएल होवैगा, 21 अर उनके टोळ के गिणे होए आदमी बत्तीस हजार दो सौ सैं। 22 फेर बिन्‍यामीन के गोत्र के रहवैं, अर उनका प्रधान गिदोनी का बेट्टा अबीदान होवैगा, 23 अर उनके टोळ के गिणे होए आदमी पैंतीस हजार च्यार सौ सैं। 24 एप्रैम की छावणी म्ह जितने अपणे-अपणे दलां कै मुताबिक गिणे गये वे सारे मिलकै एक लाख आठ हजार एक सौ आदमी सैं। तीसरा कूच इनका हो।"

25 "उत्तर की ओड़ तै दान की छावणी के झण्डे के माणस अपणे-अपणे दलां कै मुताबिक रहवैं, अर उनका प्रधान अम्मीशद्दै का बेट्टा अहीएजेर होवैगा, 26 अर उनके टोळ के गिणे होए आदमी बासठ हजार सात सौ सैं। 27 अर उनकै धोरै जो डेरे खड़े करैं सै वे आशेर के गोत्र कै रहवैं, अर उनका प्रधान ओक्रान का बेट्टा पगीएल होवैगा, 28 अर उनके टोळ के गिणे होए आदमी साढ़े इकताळीस हजार सैं। 29 फेर नप्ताली के गोत्र के रहवैं, अर उनका प्रधान एनान का बेट्टा अहीरा होवैगा, 30 अर उनके टोळ के गिणे होए आदमी तरेपन हजार च्यार सौ सैं। 31 अर दान की छावणी म्ह जितने गिणे गये वे सारे मिलकै एक लाख सत्तावन हजार छः सौ सैं। ये अपणे-अपणे झण्डे कै धोरै-धोरै होकै सबतै पाच्छै चाल्या करैं।"

32 इस्राएल के माणसां म्ह तै जो अपणे-अपणे पितरां कै घरान्यां के मुताबिक गिणे गये वे येए सैं; अर सारी छावनियाँ के जितने आदमी अपणे-अपणे दलां कै मुताबिक गिणे गये वे सारे मिलकै छः लाख तीन हजार साढ़े पाँच सौ थे। 33 पर यहोवा नै मूसा तै जो हुकम दिया था उसकै मुताबिक लेवी तो इस्राएल के माणसां म्ह गिणे न्ही गए।

34 इस तरियां जो-जो हुकम यहोवा नै मूसा तै दिये थे, इस्राएली उन हुकमां कै मुताबिक अपणे-अपणे कुल अर अपणे-अपणे पितरां कै घरान्यां कै मुताबिक, अपणे-अपणे झण्डे कै धोरै डेरे खड़े करया करदे अर चाल्या भी करया करैं थे।