गिनती 22

बिलाम अर मोआब का राजा बालाक

1 फेर इस्राएलियाँ नै चाल कै यरीहो नगर कै धोरै यरदन नदी कै इस पार मोआब कै अराबा म्ह डेरे खड़े करे।

2 अर सिप्पोर के बेट्टे बालाक नै देख्या के इस्राएलियाँ नै एमोरियां तै के-के करया सै। 3 इस करकै मोआब यो जाणकै, के इस्राएली घणे सैं, उन माणसां तै भोत घणा डर ग्या; उरै ताहीं के मोआब इस्राएलियाँ कै कारण घणा घबराग्या। 4 फेर मोआबियाँ नै मिद्यानी बुजुर्गां तै कह्या, "इब वो दल म्हारै चौगरदे के सारे माणसां ताहीं चट कर जावैगा, जिस ढाळ बळध खेत की हरी घास नै चट कर ज्या सै।" उस बखत सिप्पोर का बेट्टा बालाक मोआब का राजा था; 5 अर इसनै पतोर नगर ताहीं, जो फरात कै तट पै बोर के बेट्टे बिलाम के जात्ति भाईयाँ की धरती थी, ओड़ै बिलाम कै धोरै दूत भेज्जे के वे न्यू कहकै उसनै बुला ल्याये, "सुण एक टोळ मिस्र देश तै लिकड़ आया सै, अर धरती उनतै ढकगी सै, अर इब वे मेरै स्याम्ही ए आकै बसगे सैं। 6 इस करकै आ, अर उन माणसां नै मेरै कारण श्राप दे, क्यूँके वे मेरै तै घणे ताकतवर सैं, फेर सम्भव सै के हम उनपै जीत पावां, अर हम सारे इननै अपणे देश तै मारकै लिकाड़ द्याँ; क्यूँके या तो मै जाणु सूं के जिसनै तू आशीर्वाद देवै सै वो धन्य होवै सै, अर जिसनै तू श्राप देवै सै वो श्रापित होवै सै।"

7 फेर मोआबी अर मिद्यानी बुजुर्ग श्राप देण की दक्षिणा लेकै चाल्‍ले, अर बिलाम कै धोरै पोहचकै बालाक की सारी बात कह सुणाई। 8 उसनै उनतै कह्या, "आज रात नै उरै रहो, अर जो बात यहोवा मेरै तै कहवैगा, उस्से कै मुताबिक मै थारै ताहीं जवाब दियुँगा।" फेर मोआब के हाकिम बिलाम कै उड़ै ठहरगे। 9 फेर परमेसवर नै बिलाम कै धोरै आकै पूच्छया, "तेरे उरै ये आदमी कौण सैं?" 10 बिलाम नै परमेसवर तै कह्या, "सिप्पोर के बेट्टे मोआब के राजा बालाक नै मेरै धोरै न्यू कुह्वा भेज्या सै, 11 ‘सुण, जो टोळ मिस्र देश तै लिकड़ आया सै उसतै धरती ढकगी सै; इस करकै आकै मेरै खात्तर उननै श्राप दे; जरूरी सै के मै उनतै लड़कै उन ताहीं जोर तै लिकाड़ सकूँगा।’" 12 परमेसवर नै बिलाम तै कह्या, "तू इनकै गैल ना जा; उन माणसां ताहीं श्राप मतना दे, क्यूँके वे आशीष के हिस्सेदार हो चुके सैं।" 13 तड़कै ए तड़क बिलाम नै उठकै बालाक के हाकिमां तै कह्या, "थम अपणे देश म्ह चले जाओ; क्यूँके यहोवा मन्‍नै थारै गेल्या जाण का हुकम कोनी देन्दा।" 14 फेर मोआबी हाकिम चले गये अर बालाक कै धोरै जाकै कह्या, "बिलाम नै म्हारै गेल्या आण तै मना करया सै।"

15 इसपै बालाक नै फेर और हाकिम भेज्जे, जो पैहल्या तै प्रतिष्ठित अर गिणती म्ह भी घणे थे। 16 उननै बिलाम कै धोरै आकै कह्या, "सिप्पोर का बेट्टा बालाक न्यू कहवै सै, ‘मेरै धोरै आण तै किसे कारण मना ना करै; 17 क्यूँके मै जरुर तेरा बड़ा आदर करुँगा, अर जो कुछ तू मेरै तै कहवै वोए मै करुँगा; इस करकै आ, अर उन माणसां नै मेरै कारण श्राप दे।’" 18 बिलाम नै बालाक कै कर्मचारियाँ ताहीं जवाब दिया, "चाहे बालाक अपणे घर नै सोन्‍ने-चाँदी तै भरकै मन्‍नै दे दे, तोभी मै अपणे परमेसवर यहोवा के हुकम नै पलट न्ही सकदा, के उस ताहीं घटाकै या बढ़ाकै मान्‍नु। 19 इस करकै इब थम आज रात नै उरैए रुको, ताके मै जाण ल्यूँ, के यहोवा मेरै तै और के कहवै सै।" 20 अर परमेसवर नै रात म्ह बिलाम कै धोरै आकै कह्या, "जै वे आदमी तन्‍नै बुलाण आये सैं, तो तू उठकै उनके गैल जा; पर जो बात मै तेरे तै कहूँ उस्से कै मुताबिक करिये।"

बिलाम अर उसकी गधी

21 फेर बिलाम तड़कै ए तड़क नै उठ्या, अर अपणी गधी पै काठ्ठी बाँधकै मोआबी हाकिमां कै गैल चाल पड्या। 22 अर उसकै जाण के कारण परमेसवर का छो भड़क उठ्या, अर यहोवा का दूत उसका बिरोध करण कै खात्तर राह रोक कै खड्या होग्या। वो तो अपणी गधी पै सवार होकै जाण लागरया था, अर उसकै गैल उसके दो सेवक भी थे। 23 अर उस गधी नै यहोवा का दूत हाथ म्ह नंगी तलवार लिये होए राह म्ह खड्या दिखाई पड़या; फेर गधी राह छोड़कै खेत म्ह चली गई; फेर बिलाम नै गधी कै मारया के वा राह पै फेर आ जावै। 24 फेर यहोवा का दूत अंगूर के बाग कै बीच की गळी म्ह, जिसकै दोन्‍नु ओड़ बेल की दीवार थी, खड्या होया। 25 यहोवा कै दूत नै देखकै गधी दीवार तै इसी सट ग्यी के बिलाम का पैर दीवार तै दब ग्या; फेर उसनै उसकै फेर मारया। 26 फेर यहोवा का दूत आग्गै बढ़कै एक भीड़ी जगहां पै खड्या होया, जड़ै ना तो सोळी ओड़ हटण की जगहां थी अर ना ओळी ओड़। 27 ओड़ै यहोवा के दूत नै देखकै गधी बिलाम ताहीं लिये होए बैठगी; फेर तो बिलाम का छो भड़क उठ्या, अर उसनै गधी ताहीं लाठ्ठी तै मारया। 28 फेर यहोवा नै गधी का मुँह खोल दिया, अर वा बिलाम तै कहण लाग्गी, "मन्‍नै तेरा के करया सै के तन्‍नै मेरै ताहीं तीन बर मारया?" 29 बिलाम नै गधी तै कह्या, "यो के तन्‍नै मेरै तै नटखटी करी। जै मेरै हाथ म्ह तलवार होन्दी तो मै तन्‍नै इब्बे मार देन्दा।" 30 गधी नै बिलाम तै कह्या, "के मै तेरी वाए गधी न्ही, जिसपै तू जन्म तै आज तक चढ़दा आया सै? के मै तेरे तै कदे इसा करुँ थी?" वो बोल्या, "ना।" 31 फेर यहोवा नै बिलाम की आँख खोल्‍ली, अर उस ताहीं यहोवा का दूत हाथ म्ह नंगी तलवार लिये होए राह म्ह खड्या दिखाई दिया; फेर वो झुक ग्या, अर मुँह कै बळ गिरकै दण्‍डवत करया। 32 यहोवा कै दूत नै उसतै कह्या, "तन्‍नै अपणी गधी ताहीं तीन बार क्यूँ मारया? सुण, तेरा बिरोध करण नै मै ए आया सूं, इस करकै के तू मेरै स्याम्ही दुष्ट चाल चालै सै; 33 अर या गधी मेरै ताहीं देखकै मेरै स्याम्ही तै तीन बार हटगी। जै वा मेरै स्याम्ही तै हट ना जान्दी, तो बेशक मै इब तक तन्‍नै मार देन्दा, पर उस ताहीं जिन्दा छोड़ देन्दा।" 34 फेर बिलाम नै यहोवा कै दूत तै कह्या, "मन्‍नै पाप करया सै; मै न्ही जाणु था के तू मेरा बिरोध करण नै राह म्ह खड्या सै। इस करकै इब जै तेरे ताहीं बुरा लाग्गै सै, तो मै बोहड़ ज्याऊँ सूं।" 35 यहोवा कै दूत नै बिलाम तै कह्या, "इन माणसां के गैल तू चल्या जा; पर सिर्फ वोए बात कहिए जो मै तेरे तै कहूँगा।" फेर बिलाम बालाक के हाकिमां कै गैल चल्या गया।

36 न्यू सुणकै के बिलाम आण लागरया सै, बालाक उसतै फेटण कै खात्तर मोआब कै उस नगर तै जो उस देश के अर्नोन आळे हद पै सै गया। 37 बालाक नै बिलाम तै कह्या, "के मन्‍नै बड़ी आस तै तन्‍नै कोनी बुलावा भेज्या था? फेर तू मेरै धोरै क्यूँ न्ही चल्या आया? के मै इस लायक कोनी के साच्‍चए तेरा आदर मान ठीक तरियां तै कर सकदा?" 38 बिलाम नै बालाक तै कह्या, "देख, मै तेरे धोरै आया तो सूं! पर इब मै के कुछ कर सकूँ सूं? जो बात परमेसवर मेरै मुँह म्ह देवैगा, वाए बात मै कहूँगा।" 39 फेर बिलाम बालाक कै गैल-गैल चल्या, अर वे किर्यथूसोत तक आए। 40 अर बालाक नै बळध अर भेड़-बकरियाँ ताहीं बलि करया, अर बिलाम अर उसकै गेल्या के हाकिमां कै धोरै भेज्जा। 41 तड़कै ए तड़कै नै बालाक बिलाम ताहीं बाल*22:41 बाल बाल शहर की ऊँच्‍ची जगहां की ऊँच्‍ची जगहां पै चढ़ा लेग्या, अर ओड़ै तै उस ताहीं सारे इस्राएली माणस दिखाई पड़े।