कोरह, दातान अर अबीराम का बलवा
1 एक दिन कोरह जो लेवी का पड़पोत्ता, कहात का पोत्ता, अर यिसहार का बेट्टा था, वो एलीआब के बेट्टे दातान अर अबीराम, अर पेलेत के बेट्टे ओन,
2 इन तीन्नु रूबेनियाँ तै मिलकै मण्डळी के ढाई सौ प्रधान, जो सभासद अर नाम्मी थे, उन ताहीं गैल लिया;
3 अर वे मूसा अर हारुन कै खिलाफ उठ खड़े होए, अर उनतै कहण लाग्गे, "थमनै भोत करया, इब बस करो; क्यूँके सारी मण्डळी का एक-एक माणस पवित्र सै, अर यहोवा उनकै बिचाळै रहवै सै; इस करकै थम यहोवा की मण्डळी म्ह ऊँच्चे पदआळे क्यूँ बण बैठ्ठे सो?"
4 न्यू सुणकै मूसा अपणे मुँह कै बळ गिरया;
5 फेर उसनै कोरह अर उसकी सारी मण्डळी तै कह्या, "सबेरै ताहीं यहोवा दिखा देवैगा के उसका कौण सै, अर पवित्र कौण सै, अर उस ताहीं अपणे धोरै बुला लेगा; जिस ताहीं वो खुद छाँट लेवैगा उस्से नै अपणे धोरै बुला भी लेवैगा। 6 ज्यांतै, हे कोरह, थम अपणी सारी मण्डळी सुधा न्यू करो, यानिके अपणा-अपणा धूपदान ठीक करो; 7 अर कल उन म्ह आग धरकै यहोवा कै स्याम्ही धूप दियो, फेर जिस ताहीं यहोवा छाँट ले वोए पवित्र ठहरैगा। हे लेवियों, थम भी बड़ी-बड़ी बात करो सो, इब बस करो।" 8 फेर मूसा नै कोरह तै कह्या, "हे लेवियों, सुणो, 9 के या थमनै छोट्टी बात जाण पड़ै सै के इस्राएल के परमेसवर नै थारै ताहीं इस्राएल की मण्डळी तै न्यारे करकै अपणे निवास की सेवा करण, अर मण्डळी कै स्याम्ही खड़े होकै उसकी सेवा-पाणी करण कै खात्तर अपणे धोरै बुला लिया सै; 10 अर तेरै ताहीं अर तेरे सारे लेवी भाईयाँ तै भी अपणे धोरै बुला लिया सै? फेर भी थम याजक का ओद्दा लेणा चाहो सो? 11 अर इस्से करकै थमनै अपणी सारी मण्डळी ताहीं यहोवा कै खिलाफ कठ्ठी करी सै; हारुन कौण सै के थम उसपै बड़बड़ाओ सो?"
12 फेर मूसा नै एलीआब के बेट्टे दातान अर अबीराम ताहीं बुलावा भेज्या; पर उननै कह्या, "हम तेरै धोरै न्ही आवागें। 13 के या एक छोट्टी बात सै के तू म्हारै ताहीं इसे देश तै जिस म्ह दूध अर शहद की धारा बहवै सै इस करकै लिकाड़ ल्याया सै, के म्हारै ताहीं जंगळ म्ह मार गेरै, फेर के तू म्हारै उप्पर प्रधान बणकै इब हक जतावै सै? 14 फेर तू म्हारै ताहीं इसे देश म्ह जड़ै दूध अर शहद की धारा बहवै सै न्ही पोहचाया, अर ना हमनै जमीन-जायदाद अर अंगूर के बारियां का हकदार बणाया। के तू इन माणसां की आँखां म्ह धूळ देवैगा? हम न्ही आन्दे।"
15 फेर मूसा का छो घणा भड़क ग्या, अर उसनै यहोवा तै कह्या, "उन माणसां की भेंट की ओड़ निगांह ना करै। मन्नै तो उनतै एक गधा भी न्ही लिया, अर ना उन म्ह तै किसे का नुकसान करया सै।" 16 फेर मूसा नै कोरह तै कह्या, "कल तू अपणी सारी मण्डळी नै गेल्या लेकै हारुन कै गेल्या यहोवा कै स्याम्ही हाजिर होइये; 17 अर थम सारे अपणा-अपणा धूपदान लेकै उन म्ह धूप दियो, फेर अपणा-अपणा धूपदान जो सारया समेत ढाई सौ होवैगें यहोवा कै स्याम्ही ले जाईयो; खास करकै तू अर हारुन अपणा-अपणा धूपदान ले जाईयो।" 18 इस करकै उननै अपणा-अपणा धूपदान लेकै अर उन म्ह आग धरकै उनपै धूप गेरया; अर मूसा अर हारुन कै गैल मिलापआळे तम्बू के दरबाजे पै खड़े होए। 19 अर कोरह नै सारी मण्डळी ताहीं उनके खिलाफ मिलापआळे तम्बू के दरबाजे पै कठ्ठा कर लिया। फेर यहोवा का तेज सारी मण्डळी ताहीं दिखाई दिया।
20 फेर यहोवा नै मूसा अर हारुन तै कह्या, 21 "उस मण्डळी कै बिचाळै तै न्यारा हो ज्या के मै उननै पलभर म्ह भस्म कर दियुँ।" 22 फेर वे मुँह कै बळ पड़कै कहण लाग्गे, "हे परमेसवर, हे सारे प्राणियाँ के परमेसवर, के एक माणस कै पाप कै कारण तेरा छो सारी मण्डळी पै होवैगा?" 23 यहोवा नै मूसा तै कह्या, 24 "मण्डळी के माणसां तै कह के कोरह, दातान, अर अबीराम कै तम्बूआं कै लोवै-धोरै तै हट जाओ।"
25 फेर मूसा उठकै दातान अर अबीराम कै धोरै गया; अर इस्राएलियाँ कै बुजुर्ग माणस उसकै पाच्छै-पाच्छै गये। 26 अर उसनै मण्डळी के माणसां तै कह्या, "थम उन दुष्ट माणसां के डेरयां कै धोरै तै हट जाओ, अर उनकी कोए चीज ना छूओ, कदे इसा ना हो के थम भी उनके सारे पापां म्ह फँसकै मिट जाओ।" 27 न्यू सुणकै लोग कोरह, दातान, अर अबीराम के तम्बूआं कै लोवै-धोरै तै हटगे; पर दातान अर अबीराम लिकड़कै अपणी बिरबानियाँ, बेट्याँ, अर बाळ-बच्चे सुधा अपणे-अपणे डेरे के दरबाजे पै खड़े होए। 28 फेर मूसा नै कह्या, "इसतै थम जाण ल्योगे के यहोवा नै मेरै ताहीं भेज्या सै के यो सारा काम करुँ, क्यूँके मन्नै अपणी मर्जी तै कुछ न्ही करया। 29 जै उन माणसां की मौत अर सारे माणसां की ढाळ हो, अर उनकी सजा सारे माणसां की ढाळ हो, फेर जाणो के मै यहोवा का भेज्या होया न्ही सूं। 30 पर जै यहोवा अपणी अनोखी शक्ति जाहिर करै, अर धरती अपणा मुँह पसार कै उन ताहीं, अर उनका सारा कुछ निगळ जावै, अर वे जिन्दे जी अधोलोक म्ह जा पड़ै, तो थम समझ ल्यो के इन माणसां नै यहोवा का अपमान करया सै।"
31 वो ये सारी बात कह ए रया था के धरती उन माणसां के पैरां कै तळै तै पाटगी; 32 अर धरती नै अपणा मुँह खोल दिया अर उन ताहीं अर उनके सारे घरबार का सामान, अर कोरह के सारे माणसां अर उनकी सारी सम्पत्ति ताहीं भी निगळ लिया। 33 अर वे अर उनका सारा घरबार जिन्दा ए अधोलोक म्ह जा पड्या; अर धरती नै उन ताहीं ढक लिया, अर वे मण्डळी कै बिचाळै तै नाश होगे। 34 अर जितने इस्राएली उनके चौगरदे नै थे वे उनका चिल्लाणा सुण न्यू कहन्दे होए भाज्जे, "कदे धरती म्हारे ताहीं भी निगळ न्ही लेवै!" 35 फेर यहोवा कै धोरै तै आग लिकड़ी, अर उन ढाई सौ धूप चढ़ाण आळयां ताहीं भस्म कर दिया।
धूपदान
36 फेर यहोवा नै मूसा तै कह्या, 37 "हारुन याजक के बेट्टे एलीआजर तै कह के उन धूपदानां ताहीं आग म्ह तै ठा ले; अर आग के अंगारां ताहीं उड़ैए बिखरा दे, क्यूँके वे पवित्र सैं। 38 जिननै पाप करकै अपणे ए प्राणां का नुकसान करया सै, उनके धूपदानां के पत्तर पीट-पीटकै बणाए जावैं जिसतै के वो वेदी कै मढण कै काम आवै; क्यूँके उननै यहोवा कै स्याम्ही धरया था; इसतै वे पवित्र सैं। इस तरियां वो इस्राएल के माणसां कै खात्तर एक निशान ठहरैगा।" 39 इस करकै एलीआजर याजक नै उन पीत्तळ के धूपदानां ताहीं, जिन म्ह उन जळे होए माणसां नै धूप चढ़ाया था, लेकै उनके पत्तर पीटकै वेदी के मढण कै खात्तर बणवा दिए, 40 के इस्राएलियाँ नै इस बात की याद रहवै के कोए दूसरा, जो हारुन की पीढ़ी का ना हो, यहोवा कै स्याम्ही धूप चढ़ाण नै धोरै ना जावै, इसा ना हो के वो भी कोरह अर उसकी मण्डळी की ढाळ नाश हो जावै, जिस तरियां के यहोवा नै मूसा कै जरिये उस ताहीं हुकम दिया था।
हारुन के जरिये लोगां की हिफाजत
41 दुसरे दिन इस्राएल के माणसां की सारी मण्डळी न्यू कहकै मूसा अर हारुन पै बड़बड़ाण लाग्गी, "यहोवा की प्रजा ताहीं थमनै मार दिया सै।" 42 अर जिब मण्डळी के माणस मूसा अर हारुन कै खिलाफ कठ्ठे होवै थे, फेर उननै मिलापआळे तम्बू की ओड़ निगांह करी; अर देख्या, के बाद्दळ नै उस ताहीं छा लिया सै, अर यहोवा का तेज दिखाई दे रह्या सै। 43 फेर मूसा अर हारुन मिलापआळे तम्बू कै स्याम्ही आए, 44 फेर यहोवा नै मूसा अर हारुन तै कह्या, 45 "थम उस मण्डळी के माणसां कै बिचाळै तै हट जाओ, के मै उननै पलभर म्ह भस्म कर दियुँ।" फेर वे मुँह कै बळ गिरे। 46 अर मूसा नै हारुन तै कह्या, "धूपदान नै लेकै उस म्ह वेदी पै तै आग धरकै उसपै धूप डाल, मण्डळी कै धोरै फुर्ती तै जाकै उसकै खात्तर प्रायश्चित कर; क्यूँके यहोवा का छो घणा भड़क ग्या सै, अर महामारी फैलण लाग्गी सै।" 47 मूसा के हुकम कै मुताबिक हारुन धूपदान लेकै मण्डळी कै बिचाळै भाज्या गया; अर न्यू देखकै के माणसां म्ह मरी फैलण लाग्गी सै, उसनै धूप जळाकै माणसां कै खात्तर प्रायश्चित करया। 48 अर वो मरे होए अर जिन्दा कै बिचाळै म्ह खड्या होया; फेर महामारी थमगी। 49 अर जो कोरह के गैल भाग्गी होकै मरगे थे, उननै छोड़ जो माणस इस महामारी तै मरगे वे चौदहा हजार सात सौ थे। 50 फेर हारुन मिलापआळे तम्बू के दरबाजे पै मूसा कै धोरै बोहड़ ग्या, अर महामारी थमगी।