1 फेर यहोवा नै, मोआब कै अराबा म्ह, यरीहो कै धोरै की यरदन नदी कै तट पै मूसा तै कह्या, 2 "इस्राएलियाँ नै हुकम दे, के थम अपणे-अपणे खुद कै हिस्सां की धरती म्ह तै लेवियाँ के रहण कै खात्तर नगर दियो; अर नगरां कै चौगरदे की चराई भी उन ताहीं दियो। 3 नगर तो उनके रहण खात्तर, अर चराई उनके गां-बळध अर भेड़-बकरी और, उनके सारे पशुआं खात्तर होवैगी। 4 अर नगरां की चराई, जिननै थम लेवियाँ ताहीं द्योगे, वो एक-एक नगर की चारदीवारी तै बाहर चौगरदे एक-एक हजार हाथ तक की हों। 5 अर नगर कै बाहर पूर्व, दक्षिण, पश्चिम, अर उत्तर की और, दो-दो हजार हाथ इस तरियां तै मापणा के नगर बीचोंबीच हो; लेवियाँ के एक-एक नगर की चराई इतणी ए धरती की हो। 6 अर जो नगर थम लेवियाँ नै द्योगे उन म्ह तै छः शरणनगर हों, जिन ताहीं थमनै खून्‍नी कै भाजण कै खात्तर ठहराणा होवैगा, अर उनतै घणे बियाळीस नगर और भी दियो। 7 जितने नगर थम लेवियाँ नै द्योगे वे सारे अड़तालीस हों, अर उनकै गेल्या चराई भी दियो। 8 अर जो नगर थम इस्राएलियाँ की खुद की धरती म्ह तै द्यो, वे जिनके घणे नगर हों उनतै घणे, अर जिनकै थोड़े नगर हों उनतै थोड़े लेकै दियो; सारे अपणे-अपणे नगरां म्ह तै लेवियाँ नै अपणे-अपणे हिस्से कै मुताबिक दें।"

9 फेर यहोवा नै मूसा तै कह्या, 10 "इस्राएलियाँ तै कह: जिब थम यरदन तै पार होकै कनान देश म्ह पोहचों, 11 तो इस्से नगर ठहराणा जो थारै खात्तर शरणनगर हों, के जो कोए किसे नै भूल तै मारकै खून्‍नी ठहरया हो वो ओड़ै भाज जावै। 12 वे नगर थारै खात्तर बदला लेण आळे तै शरण लेण कै काम आवैंगे, के जिब ताहीं खून्‍नी न्याय कै खात्तर मण्डळी कै स्याम्ही खड्या ना हो तब ताहीं वो ना मारया जावै। 13 अर शरण के जो नगर थम द्योगे वे छः हों। 14 तीन नगर तो यरदन नदी कै इस पार, अर तीन कनान देश म्ह दियो; शरण के नगर इतणै ए रहवैं। 15 ये छहों नगर इस्राएलियाँ कै अर उनकै बिचाळै रहण आळे परदेशियाँ कै खात्तर भी शरणनगर ठहरै, के जो कोए किसे नै भूल तै मारदे वो ओड़ैए भाज जावै।"

16 "पर जै कोए किसे नै लोहे कै किसे हथियार तै इसा मारै के वो मर ज्या, तो वो खून्‍नी ठहरैगा; अर वो खून्‍नी जरुर मार दिया जावै। 17 अर जै कोए इसा पत्थर हाथ म्ह लेकै, जिसतै कोए मर सकै सै, किसे नै मारै, अर वो मर ज्या, तो वो भी खून्‍नी ठहरैगा; अर वो खून्‍नी जरुर मार दिया जावै। 18 या कोए हाथ म्ह इसी लाकड़ी लेकै, जिसतै कोए मर सकै सै, किसे नै मारै, अर वो मर ज्या, तो वो भी खून्‍नी ठहरैगा; अर वो खून्‍नी जरुर मार दिया जावै। 19 लहू का बदला लेण आळा खुद उस खून्‍नी नै मारदे; जिब भी वो मिलै जिब्बे ए वो उस ताहीं मारदे। 20 अर जै कोए किसे नै बैर तै धकेल दे, या घात लाकै कुछ उसपै इसा फेंक दे के वो मर ज्या, 21 या दुश्मनी तै उस ताहीं अपणे हाथ तै इसा मारै के वो मर ज्या, तो जिसनै मारया हो वो जरुर मार दिया जावै; वो खून्‍नी ठहरैगा; लहू का बदला लेण आळा नै जिब भी वो खून्‍नी उसनै मिल ज्या जिब्बे ए उस ताहीं मारदे।"

22 "पर जै कोए किसे नै बिना सोच्‍चे, अर बिना दुश्मनी राक्खे धकेल दे, या बिना घात लगाये उसपै कुछ फेंक दे, 23 या इसा कोए पत्थर लेकै, जिसतै कोए मर सकै सै, दुसरे नै बिन देक्खे उसपै फेंक दे, अर वो मर ज्या, पर वो ना उसका बैरी हो, अर ना उसके नुकसान का खोजी रहया हो; 24 तो मण्डळी मारण आळे अर लहू का बदला लेण आळे कै बिचाळै इन नियमां कै मुताबिक न्याय करै; 25 अर मण्डळी उस खून्‍नी नै लहू का बदला लेण आळे कै हाथ तै बचाकै उस शरण के नगर म्ह जित्त वो पैहल्या भाजग्या हो बोहड़ा दे, अर जिब ताहीं पवित्र तेल तै अभिषेक करया होया महायाजक ना मर ज्या जिब ताहीं वो ओड़ैए रहवै। 26 पर जै वो खून्‍नी उस शरण की जगहां की हद तै जिस म्ह वो भाजग्या हो बाहर लिकड़कै और किते जावै, 27 अर लहू का बदला लेण आळा उसनै शरण के नगर की हद कै बाहर पाकै कदे मारदे, तो वो लहू बहाण का कसूरवार न्ही ठहरै। 28 क्यूँके खून्‍नी नै महायाजक की मौत तक शरण के नगर म्ह रहणा चाहिये था; अर महायाजक के मरण कै बाद वो अपणी खुद की धरती नै बोहड़ सकैगा।"

29 "थारी पीढ़ी-पीढ़ी म्ह थारी सारी रहण की जगहांया म्ह न्याय की याए विधि होवैगी। 30 अर जो कोए किसे माणस नै मारदे वो गवाहां कै कहण पै मार दिया जावै, पर एक ए गवाह की गवाही तै कोए न्ही मारया जावै। 31 अर जो खून्‍नी मौत की सजा कै लायक ठहरै उसतै मौत की सजा कै बदलै म्ह जुर्माना न्ही लेणा; वो जरुर मार दिया जावै। 32 अर जो कोए किसे शरण की जगहां म्ह डरकै भाज्या हो उसकै खात्तर भी इस मतलब तै जुर्माना ना लियो, के वो याजक कै मरण तै पैहल्या फेर अपणे देश म्ह रहण नै बोहड़ण आवै। 33 इस करकै जिस देश म्ह थम रहोगे उसनै अशुद्ध ना करियो; खून तै तो देश अशुद्ध हो ज्या सै, अर जिस देश म्ह जिब खून करया जावै फेर सिर्फ खून्‍नी कै लहू बहाण ए तै उस देश का प्रायश्चित हो सकै सै। 34 जिस देश म्ह थम रहया करोगे उसकै बिचाळै मै रहूँगा, उसनै अशुद्ध ना करियो; मै यहोवा तो इस्राएलियाँ कै बिचाळै रहूँ सूं।"