Números 6

नाज़ीरां के नियम-कायदे

1 फेर यहोवा नै मूसा तै कह्या,

2 "इस्राएलियाँ तै कह के जिब कोए आदमी या जनान्‍नी नाज़ीर*6:2 नाज़ीर समर्पित या अलग करी होई, यानिके वो दाखमधु अर मदिरा तै न्यारा रहवै; वो ना दाखमधु का, अर ना मदिरा का सिरका पीवै, अर ना दाख का कुछ भी रस पीवै, बल्के दाख ना खावै, चाहे हरी हो चाहे सूक्खी। की मन्‍नत, यानिके अपणे-आपनै यहोवा कै खात्तर न्यारा करण की खास मन्‍नत मान्‍नै, 3 फेर वो दाखमधु अर मदिरा तै न्यारा रहवै; वो ना दाखमधु का, अर ना मदिरा का सिरका पीवै, अर ना दाख का कुछ भी रस पीवै, बल्के दाख ना खावै, चाहे हरी हो चाहे सूक्खी। 4 जितने दिन वो न्यारा रहवै उतने दिन ताहीं वो बीज तै लेकै छिलके तक, जो कुछ अंगूर की बेल तै पैदा होवै सै, उस म्ह तै किमे न्ही खावै।"

5 "फेर जितने दिन उसनै न्यारा रहण की मन्‍नत मान्‍नी हो उतने दिन ताहीं वो अपणे सिर पै छुरा ना फिरावै; अर जिब तक वे दिन पूरे ना हों जिन म्ह वो यहोवा कै खात्तर न्यारा रहवै जद ताहीं वो पवित्र ठहरैगा, अर अपणे सिर कै बाळां ताहीं बधावै। 6 जितने दिन वो यहोवा कै खात्तर न्यारा रहवै उतने दिन ताहीं किसे लाश कै धोरै ना जावै। 7 चाहे उसकी माँ-बाप, या भाई, या भाण भी मरै, फेर भी वो उनके कारण अशुद्ध ना हो; क्यूँके अपणे परमेसवर कै खात्तर न्यारा रहण का निशान उसके सिर पै होवैगा। 8 अपणे न्यारा रहण के सारे दिनां म्ह वो यहोवा कै खात्तर पवित्र ठहरया रहवै।"

9 "जै कोए उसके धोरै चाणचक मर ज्या, अर उसके न्यारा रहण का जो निशान उसकै सिर पै होवैगा वो अशुद्ध हो जावै, तो वो शुद्ध होण के दिन, यानिके सातमै दिन अपणा सिर मुण्डावै। 10 अर आठवें दिन वो दो पंडुक या कबूतरी कै दो बच्‍चे मिलापआळे तम्बू के दरबाजे पै याजक कै धोरै ले जावै, 11 अर याजक एक नै पापबलि, अर दुसरे नै होमबलि करकै उसकै खात्तर प्रायश्चित करै, क्यूँके वो लाश के कारण पापी ठहरया सै। अर याजक उस्से दिन उसका सिर फेर पवित्र करै, 12 अर वो अपणे न्यारा रहण के दिनां ताहीं फेर यहोवा कै खात्तर न्यारा ठहरावै, अर एक साल का एक भेड़ का बच्‍चा दोषबलि करकै ले आवै; अर जो दिन इसतै पैहल्या बीतगे हों वे व्यर्थ गिणे जावै, क्यूँके उसके न्यारा रहण का निशान अशुद्ध होग्या।"

13 "फेर जिब नाज़ीर के न्यारा रहण के दिन पूरे हों, उस बखत के खात्तर उसके ये नियम-कायदे सै; यानिके वो मिलापआळे तम्बू के दरबाजे पै पोहचाया जावै, 14 अर वो यहोवा के खात्तर होमबलि करकै एक साल का एक बेकसूर भेड़ का बच्‍चा पापबलि करकै, अर एक साल की एक बेकसूर भेड़ की बच्‍ची, अर मेलबलि कै खात्तर एक बेकसूर मिंढा, 15 अर अखमीरी रोट्टी की एक टोकरी, यानिके तेल तै सणे होए मैदे के फुलके, अर तेल तै चुपड़ी होई अखमीरी पापड़ियाँ, अर उन बलियां के अन्‍नबलि अर अर्घ; ये सारे चढ़ावै धोरै ले जावै। 16 इन सारया नै याजक यहोवा कै स्याम्ही पहुँचाकै उसके पापबलि अर होमबलि ताहीं चढ़ावै, 17 अर अखमीरी रोट्टी की टोकरी सुधा मिंढ़े ताहीं यहोवा के खात्तर मेलबलि करकै, अर उस मेलबलि के अन्‍नबलि अर अर्घ नै भी चढ़ावै। 18 फेर नाज़ीर अपणे न्यारा रहण के निशान आळे सिर नै मिलापआळे तम्बू के दरबाजे पै मुण्डाकै अपणे बाळां नै उस आग पै गेर दे जो मेलबलि कै तळै होवैगी। 19 फेर जिब नाज़ीर अपणे न्यारा रहण के निशान आळे सिर नै मुण्डवा ले फेर याजक मिंढा का पकाया होया कंधा, अर टोकरी म्ह तै एक अखमीरी रोट्टी, अर एक अखमीरी पापड़ी लेकै नाज़ीर कै हाथ्थां पै धरदे, 20 अर याजक इन ताहीं हिलाण की भेंट करकै यहोवा कै स्याम्ही हिलावै; हिलाई होई छात्ती अर ठाई होई जाँघ सुधा ये भी याजक कै खात्तर पवित्र ठहरै; इसकै बाद वो नाज़ीर दाखमधु पी सकैगा।"

21 "नाज़ीर की मन्‍नत की, अर जो चढ़ावा उस ताहीं अपणे न्यारा होण कै कारण यहोवा कै खात्तर चढ़ाणा होवैगा उसके भी योए नियम-कायदे सै। जो चढ़ावा वो पूंजी कै मुताबिक चढ़ा सकै, उसतै घणी जिसी उसनै मन्‍नत मान्‍नी हो, उस्से तरियां ए अपणे न्यारा रहण के नियम-कायदे कै मुताबिक उस ताहीं करणा होवैगा।"

याजक का आशीर्वाद

22 फेर यहोवा नै मूसा तै कह्या, 23 "हारुन अर उसके बेट्याँ तै कह के थम इस्राएलियाँ नै इन वचनां तै आशीर्वाद दिया करियो:

24 ‘यहोवा तन्‍नै आशीष देवै अर तेरी रुखाळी करै:

25 यहोवा तेरे पै अपणे मुख का चाँदणा चमकावै, अर तेरे पै अनुग्रह करै:

26 यहोवा अपणा मुख तेरी ओड़ करै, अर तेरे ताहीं शान्ति दे।’"

27 "इस तरियां तै मेरे नाम नै इस्राएलियाँ पै धरै, अर मै उननै आशीष दिया करुँगा।"