2 Samuel 13

अम्नोन ओर तामार

1 दाऊदो री तामार नाओं री एक सुन्दर बेटी जो अबशालोमो री बईण थी, तेसा खे दाऊदो रा पाऊ अम्नोन पसन्द करने लगेया। 2 तेबे अम्नोन आपणी बईण तामारा रिया बजअ ते एड़ा कमजोर ऊआ कि बमार पड़ीगा; कऊँकि से कुआँरी थी ओर तेसा खे आसिल करना अम्नोनो खे कठण लगो था। 3 पर अम्नोनो रे योनादाब नाओं रा एक दोस्त था, जो दाऊदो रे पाई शिमआह रा पाऊ था ओर से बड़ा चलाक था। 4 एक दिन योनादाबे अम्नोनो खे बोलेया, "ओ राजकुमार, क्या बजअ ए कि तूँ दिन प्रतिदिन एड़ा कमजोर ऊणे लगी रा क्या तां मांगे नि बताणा?" अम्नोने तेसखे बोलेया, "आऊँ तो आपणे सौतेले पाई अबशालोमो री बईण तामारा ते प्यार करूँआ।" 5 योनादाबे तेसखे बोलेया, "आपणे माँजे पाँदे लेटी की बमार ऊणे रा टोंग कर ओर जेबे तेरा बाओ ताखे देखणे खे आओ, तेबे तेसखे बोलणा, मेरी बईण तामार आई की माखे रोटी खुल़ाओ। से मां सामणे रोटी बणाओ, ताकि आऊँ तेसा खे देखी की तेसा रे आथो साथे खाऊँ।"

6 तेबे अम्नोन लेटी की बमार बणी गा ओर जेबे राजा तेसखे देखणे आया, तेबे अम्नोने राजे खे बोलेया, "आऊँ बमार ए मेरी बईण तामार आई की मां सामणे रोटी बणाओ, ताकि आऊँ तेसा रे आथो साथे खाऊँ।" 7 तेबे दाऊदे आपणे कअरे तामारा गे ये सन्देशा पेजेया, "आपणे पाई अम्नोनो रे कअरे जाई की तेसखे रोटी बणा।"

8 तेबे तामार आपणे पाई अम्नोनो रे कअरे गई ओर से माँजे पाँदे पड़ेया रा था। तेबे तेसे आटा लई की बाटेया ओर तेस सामणे रोटिया बणाईया। 9 तेबे तेसे थाल़ु लई की तेसखे पाया, पर तिने खाणे खे ना करी ती, तेबे अम्नोने आपणे दासा खे बोलेया, "मेरे नेड़े-तेड़े ते सारे लोका खे बारे निकयाल़ी दे।" तेबे सारे लोक तेथा ते निकल़ी गे। 10 तेबे अम्नोने तामारा खे बोलेया, "रोटिया खे कमरे दे ली आओ ताकि आऊँ तेरे आथो साथे खाऊँ।" तेबे तामार आपणी बणाई रिया रोटिया चकी की आपणे पाई अम्नोनो गे कमरे दे लईगी। 11 जेबे से तिना खे तेसरे खाणे खे नेड़े लईगी, तेबे तिने तेसा खे पकड़ी की बोलेया, "ओ मेरी बईण, आओ, मां साथे सओ।" 12 तेसे बोलेया, "ओ मेरे पाई, ओ मेरे पाई, एड़ा नि कर, माखे प्रष्ट नि कर; कऊँकि इस्राएलो दे एड़ा काम नि ऊणा चाईयो; एड़ी मूर्खता रा काम नि कर। 13 तेबे मां बदनाम ऊई की केई जाणा? ओर तूँ इस्राएली लोका बीचे एक मूर्ख गिणेया जाणा। तूँ राजे साथे बात कर, तेस तां साथे मेरा ब्या करने खे ना नि करनी।" 14 पर तिने तेसा री नि सुणी ओर तेसा ते जादा तागतबर ऊणे रिया बजअ ते तेसा साथे कुकर्म करी की से प्रष्ट करी ती। 15 तेबे अम्नोन तेसा साथे बऊत जादा बैर राखणे लगेया, एथो तक कि ये बैर तेसरे पईलके प्यारो ते बढ़ी की था। तेबे अम्नोने तेसा खे बोलेया, "उठी की चली जा।" 16 तेसे बोलेया, "एड़ा नि ऊई सकदा, कऊँकि ये बड़ा उपद्रव, मतलब माखे निकयाल़ना तेस पईले ते बढ़ी की ये जो तैं मां साथे करी राखेया।" पर तिने तेसा री नि सुणी। 17 तेबे तिने आपणे सेवको खे बुलाई की बोलेया, "एसा जवाणसा खे मांगा गे ते बारे निकयाल़ी दे ओर एसा पीछे दरवाजे दे चिटकणी लगाई दे ताकि से वापस नि आई सको।"

18 तेसे तो रंगबरंगी कुर्ती पईनी राखी थी; कऊँकि जो राजकुमारिया कुआँरिया रओ थिया सेयो एड़े ई टाल्ले पईनो थिया। अम्नोनो रे देख-पाल़ करने वाल़ेया तेसा खे बारे निकयाल़ी की पीछे फल़ेया दे चिटकणी लगाईती। 19 तेबे तामारे आपणे सिरो पाँदे स्वा सेटी ओर आपणी रंगबरंगी कुर्ती फाड़ी ती ओर सिरो पाँदे आथ राखी की जोरे-जोरे की रोंदी ऊई चली गी। 20 तेसा रे पाईए अबशालोमे से देखी ओर तेसा ते पूछेया, "क्या तेरा पाई अम्नोन तां साथे सई रा? पर एबे, ओ मेरी बईण चुप रओ, से तो तेरा पाई ए, एते गल्ला री फिकर नि कर।" तेबे तामार आपणे पाई अबशालोमो रे कअरे मन मारी की बैठी दी रई। 21 जेबे यो सारिया गल्ला दाऊद राजे रे कानो दे पड़िया, तेबे से बऊत ई गुस्से ऊआ। 22 ओर अबशालोमे अम्नोनो खे पला-बुरा कुछ नि बोलेया, कऊँकि अम्नोने तेसरी बईण तामार प्रष्ट कित्ती थी, इजी बजअ ते अबशालोम तेसते नफरत करो था।

अम्नोनो रा काया जाणा

23 दो साल बाद अबशालोमे एप्रैमो रे नेड़े बाल्हासोर जगा दे आपणी पेडा री ऊन कतरवाई ओर तिने सारे राजकुमारा खे निऊँदा दित्तेया। 24 से अबशालोम राजे गे जाई की बोलणे लगे, "बिनती ये कि तेरा दास पेडा री ऊन कतरने लगी रा, इजी री खातर राजा आपणे सारे काम करने वाल़ेया समेत आपणे दासो साथे चलो।" 25 राजे अबशालोमो खे बोलेया, "ओ मेरे पाऊ, एड़ा नि ऊणा; आसे सारे नि जाणे, एड़ा नि ओ कि ताखे जादा कष्ट ओ।" तेबे अबशालोमे जोर देई की तेसते बिनती कित्ती, पर तिने जाणे ते ना करी ती, तेबे बी तेसखे आशीर्वाद दित्तेया। 26 तेबे अबशालोमे बोलेया, "जे तूँ नई तो मेरे पाई अम्नोनो खे आसा साथे जाणे दे।" राजे तेसते पूछेया, "से तां साथे कऊँ जाणा?" 27 पर अबशालोमे तेसते बिनती कित्ती तेबे तिने अम्नोन ओर सारे राजकुमार तेस साथे जाणे दित्ते। 28 तेबे अबशालोमे आपणे सेवका खे आज्ञा दित्ती, "सावधान रओ ओर जेबे अम्नोन शराब पी की नशे दे ऊई जाओ ओर आऊँ तुसा खे बोलूँ, ‘अम्नोनो खे काई देयो।’ तो तुसे बिना डरे से कायी देणा। क्या एसा आज्ञा खे देणे वाल़ा आऊँ नि ए? याओ बानी की काम करो।" 29 तेबे अबशालोमो रे सेवके तेसरी आज्ञा रे मुताबिक अम्नोन काईता। ये देखी की तेबे सारे राजकुमार खड़े ऊए ओर आपणी खच्चरा पाँदे चढ़ी की नठीगे। 30 सेयो बाटा देई थे कि किनी माणूंए दाऊदो खे ये सन्देश दित्तेया, "अबशालोमे सारे राजकुमार काईते ओर तिना बीचा ते एक पनि बचेया।" 31 तेबे राजा दाऊदे उठी की आपणे टाल्ले फाड़े ओर जमीना दे पड़ीगा ओर तेसरे सारे कर्मचारी आपणे टाल्ले फाड़ी की तेसगे खड़े रये। 32 तेबे दाऊदो रे पाई शिमआह रे पाऊ योनादाबे बोलेया, "मेरा प्रभु ये नि समजो कि सारे राजकुमार काई ते, बस अम्नोन काई राखेया; कऊँकि जेस दिने तिने अबशालोमो री बईण तामार प्रष्ट कित्ती, तेस ई दिनो ते अबशालोमो री आज्ञा ते ये गल्ल ठाणी थी। 33 इजी री खातर एबे मेरा स्वामी राजा आपणे मनो दे ये समजी की कि सारे राजकुमार मरी गे उदास नि ओ; कऊँकि बस अम्नोन ई मरी रा।"

अबशालोमो रा नठणा

34 तदुओ खे अबशालोम नठी गा ओर जो सिपाई पईरा देणे लगी रा था तिने आखी चकी की देखेया कि पिछली तरफा ते पाह्ड़ो री बाटा ते बऊत सारे लोक चली की आऊणे लगी रे। 35 तेबे योनादाबे राजे खे बोलेया, "देख, राजकुमार तो आईगे, जेड़ा तेरे दासे बोलेया था, तेड़ा ई ऊआ।" 36 से बोली ई चुकेया था कि राजकुमार पऊँची गे ओर जोरे-जोरे की रोणे लगे ओर राजा बी आपणे सारे कर्मचारिया समेत बिलखी-बिलखी की रोणे लगेया। 37 अबशालोम तो नठी की गशूर जगा दे राजा अम्मीहूदो रे पाऊ तल्मै गे गया ओर दाऊद आपणे पाऊए रिया तँईं हर दिन दु:ख करदा रया। 38 जेबे अबशालोम नठी की गशूर इलाके खे गया, तेबे से तेथी तीऊँ साला तक रया, 39 अम्नोनो रे मरने ते बाद राजा दाऊद शान्त ऊईगा। पर से आपणे माठे अबशालोमो खे बऊत याद करो था।