Gênesis 37

यूसुफ ओर तेसरे पाई

1 इसहाको रे मरने ते बाद याकूब तो कनान प्रदेशो रे रओ था, जेती तेसरा बाओ परदेशी ऊई की रया। 2 ओर याकूबो रे वंशो रा बखाण ईंयाँ ए: यूसुफ सतारा साला रा ऊई की आपणे पाईया साथे पेडा-बाकरिया चराओ था; ओर से पाऊ आपणे बाओ री लाड़ी बिल्हा ओर जिल्पा रे पाऊआ साथे रओ था; ओर तिना री बुराईया रा समाचार आपणे बाओ गे पऊँचाया करो था। 3 ओर इस्राएल आपणे सबी पाऊआ ते जादा यूसुफो खे प्यार करो था, कऊँकि से तेसरे स्याणदे बखतो रा पाऊ था: ओर तिने तेसखे रंग-बरंगा चोगा बणवाया। 4 पर तेसरे पाईए देखेया कि म्हारा बाओ आसा सबी ते जादा एसखे प्यार करोआ, तेबे सेयो तेसते बैर राखणे लगे ओर तेस साथे ठीक टंगो रे गलाओ पनि थे।

यूसुफो रा सुफना

5 एकी दिने यूसुफे एक सुफना देखेया ओर तिने आपणे पाईया खे तिजी रे बारे दे बताया; तेबे सेयो तेस साथे ओर बी बैर राखणे लगे। 6 तिने तिना खे बोलेया, "जो सुफना मैं देखी राखेया, तिजी खे सुणो 7 आसे सब जणे डोरूए रे पूल़े बानणे लगी रे ओर आऊँ क्या देखूँआ कि मेरा पूल़ा उठी की सीदा खड़ा ऊईगा, तेबे तुसा रे पूल़ेया मेरा पूल़ा चऊँ कनारो ते केरी ला ओर तेसगे माथा तेकेया।"

8 तेबे तेसरे पाईया तेसखे बोलेया, "क्या सच्ची तां आसा पाँदे राज करना? क्या ‍तां सच्ची आसा पाँदे अक्क राखणा?" इजी खे सेयो तेसरे सुफने ओर तेसरी गल्ला रिया बजअ ते तेसते ओर बी जादा बैर राखणे लगे।

9 फेर यूसुफे एक ओर सुफना देखेया ओर आपणे पाईया गे तिजी रे बारे दे ईंयाँ बताया, "सुणो, मैं एक ओर सुफना देखेया कि सूरज ओर चाँद ओर ग्यारा तारे मांगे माथा टेकणे लगी रे।" 10 ये सुफना तिने आपणे बाओ ओर पाईया गे बताया; तेबे तेसरे बाओ तेसखे थिड़कदे ऊए बोलेया, "ये केड़ा सुफना ए जो तैं देखी राखेया? क्या सच्ची मां ओर तेरी माया ओर तेरे पाईया सबी तांगे आई की जमीना पाँदे रूड़ी की माथा टेकणा?" 11 यूसुफो रे पाई तो तेसते जल़ो थे, पर तेसरे बाओ तेसरिया यो सब गल्ला आपणे मनो रे याद राखिया। 12 एक बार तेसरे पाई आपणे बाओ रिया पेडा-बाकरिया चराणे शकेमो खे गये।

13 तेबे इस्राएले यूसुफो खे बोलेया, "तेरे पाई तो शकेमो रेई पेडा-बाकरिया चराणे लगी रे ऊणे, इजी खे जा, आँऊ ताखे तिना गे पेजुँआ।" तेबे यूसुफे आपणे बाओ खे बोलेया, "आँऊ जाणे खे त्यार ए।" 14 इस्राएले यूसुफो खे बोलेया, "जा, आपणे पाईया रा ओर पेडा-बाकरिया रा आल देखी आओ कि सेयो ठीक तो आये, फेर मांगे समाचार ली आओ।" तेबे तिने से हेब्रोनो री सवींया बाटा रे पेजीता ओर से शकेमो रे आया। 15 ओर किने माणूंए से मैदानो रे ओरे-पोरे पटकदे ऊए देखी की तेसते पूछेया, "तूँ क्या टोल़ने लगी रा?"

16 यूसुफे बोलेया, "आँऊ तो आपणे पाईया खे टोल़ने लगी रा मेहरबानी करी की मांगे बता कि सेयो पेडा-बाकरिया केई चराणे लगी रे?"

17 तिने माणूंए बोलेया, "सेयो तो एथा ते चलीगे रे ओर मैं सेयो ये बोलदे ऊए सुणे, ‘आओ, आसे दोतानो खे चलूँए।’ " तेबे यूसुफ आपणे पाईया गे चलेया ओर तेसखे सेयो दोतानो रे मिले।

यूसुफो खे मजदूरिया खे बेचणा

18 जिंयाँ ई तेसरे पाईए से दूरो ते आऊँदे ऊए देखेया, तो तेसरे नेड़े आऊणे ते पईले ई तेसखे काणे री तरकीब बणाई। 19 ओर सेयो आपू बीचे बोलणे लगे, "देखो, से सुफना देखणे वाल़ा आऊणे लगी रा। 20 इजी खे, आओ आसे तेसखे काई की केसी गड्डे रे पाई देऊँए ओर ये बोली देऊँगे कि तेसखे कोई जंगल़ी जानवर खाईगा। तेबे आसा देखणा कि तेसरे सुफनेया रा क्या फल़ ऊणा।"

21 ये सुणी की रूबेने तेसखे तिना रे आथो ते बचाणे री इच्छा ते तिना खे बोलेया, "आसे तेसखे जानी ते नि मारूंगे।" 22 फेर रूबेने तिना खे बोलेया, "खून नि बाह्ओ, तेसखे जंगल़ो रे एते गड्डे रे पाई देओ ओर तेस पाँदे आथ नि उठाओ।" से तेसखे तिना रे आथो ते छुड़ाई की आपणे बाओ गे दुबारा ते पऊँचाणा चाओ था। 23 तेबे एड़ा ऊआ कि जेबे यूसुफ आपणे पाईया गे पऊँचेया, तेबे तिने तेसरा रंग-बरंगा चोगा जो तिने पईनी राखेया था, तेस पाँदा ते जबरन खींजी ला। 24 ओर यूसुफ चकी की सूके गड्डे रे पाईता। 25 तेबे सेयो रोटी खाणे बैठीगे ओर तिने आखी चकी की देखेया कि इश्माएलिया रा एक चूण्‍ड ऊँटा पाँदे खुशबू वाल़िया चीजा, बलसान ओर गंधरस लादी की गिलादो ते मिस्र प्रदेशो खे जाणे लगी रा।

26 तेबे यहूदे आपणे पाईया खे बोलेया, "आपणे पाईए खे काणे ओर तेसरा खून छुपाणे ते क्या फायदा ऊणा? 27 आओ, आसे तेसखे इश्माएलिया खे बेची देऊँए ओर आपणा आथ तेस पाँदे नि उठाईए, कऊँकि से म्हारा सका पाई।" ओर तेसरे पाईए तेसरी गल्ल मानी ली।

28 तेबे मिद्यानी बपारी तेथा ते ऊई की तिना गे पऊँचे। तेबे यूसुफो रे पाईए से गड्डे ते खींजी की बारे निकयाल़ेया ओर इश्माएलिया खे चाँदिए रे बीई टुकड़ेया रे बेचीता ओर सेयो यूसुफो खे मिस्रो रे ली आए।*37:28 प्रेरित 7:9

29 रूबेने गड्डे रे वापस आई की क्या देखेया कि यूसुफ गड्डे रे निए; इजी खे तिने आपणे टाल्ले फाड़े, 30 ओर आपणे पाईया गे वापस आई की बोलणे लगेया, "यूसुफ तो तेती अए नि; एबे आऊँ केई जाऊँ?"

31 तेबे तिने यूसुफो रा चोगा लया ओर एक बाकरे खे काई की तेसरे खूनो रे से डबोई ता। 32 ओर तिने से रंग-बरंगा चोगा आपणे बाओ गे पऊँचाई की संदेशा दित्तेया; "ये आसा खे मिली रा, इजी खे देखी की पछयाणी लो कि ये तेरे पाऊए रा चोगा ए कि नई।"

33 तिने से पछयाणी ला ओर बोलेया, "आ, मेरे ई पाऊए रा चोगा ए, किने दुष्ट जंगल़ी जानवरे से खाई ला रा, सच्ची यूसुफ मारिता रा। 34 तेबे याकूबे आपणे टाल्ले फाड़े ओर लको रे टाट लपेटी ओर आपणे पाऊए री खातर बऊत दिना तक शोग करदा रया।" 35 ओर तेसरे सबी माठे-बेटिए तेसखे शान्ति देणे री कोशिश कित्ती; पर तेसखे शान्ति नि मिली ओर से येई बोलदा रया, "आँऊ तो शोग करदे ऊए आपणे पाऊए गे अधलोको रे उतरी जाणा।" ईंयाँ तेसरा बाओ तेसरी खातर रोंदा ई रया। 36 इजी रे दौरान मिद्यानिये यूसुफ मिस्रो रे जाई की पोतीपर नाओं रे, फिरौनो रे एक हाकिम ओर सिपाईया रे परदानो रे आथे बेचीता।