Levítico 18

6 तुसा बीचा ते कोई आपणे नेड़े रे टब्बरो री जवाणसा री इज्जत नि लूटो। आऊँ तुसा रा यहोवा ए। 7 आपणी माया री इज्जत नि लुटणी, जो तुसा रे बाओ री इज्जत ए, से तो तुसा री आम्मा ए, इजी री खातर तुसे तेसा री इज्जत नि लुटणी। 8 आपणी सौतेली माया री इज्जत नि लुटणी; कऊँकि से तो तुसा रे बाओ री ई इज्जत ए।*18:8 1 कुरिन्थ 5:1 9 आपणी बईण चाए सक्की ओ चाए सौतेली ओ, चाए से कअरे पैदा ऊई ओ, चाए बारे, तेसा री इज्जत नि लुटणी। 10 आपणी पोती या आपणी दोईतिया री इज्जत नि लुटणी, तिना रा शरीर तो समजो तुसा रा ईए। 11 तुसा री सौतेली बईण जो तुसा रे बाओ ते पैदा ऊई, से तुसा री बईण ए, इजी बजअ ते तेसा री इज्जत नि लुटणी। 12 आपणी बुआ री इज्जत नि लुटणी; से तो तुसा रे बाओ री बईण ए। 13 आपणी मासिया री इज्जत नि लुटणी; कऊँकि से तुसा री माया री बईण ए। 14 आपणी चाचिया री इज्जत नि लुटणी, कऊँकि से तेरे चाचे री लाड़ी ए। 15 आपणियां बऊआ री इज्जत नि लुटणी से तो तुसा रे माठे री लाड़ी ए, इजी बजअ ते तुसे तेसा री इज्जत नि लुटणी। 16 आपणी पाबिया री इज्जत नि लुटणी; से तो तुसा रे पाईए री ई इज्जत ए।*18:16 मत्ती 14:3, 4, मरक 6:18 17 केसी जवाणसा री ओर तेसा री बेटी दुँईं री इज्जत नि लुटणी, ओर तेसा री पोतिया खे या दोईतिया खे आपणी लाड़ी बणाई की तेसा री इज्जत नि लुटणी; सेयो तो नेड़ो रे टब्बरो रिया ए; एड़ा करना महापाप ए। 18 ओर आपणी लाड़िया री बईणा खे बी आपणी लाड़ी बणाई की तेसा री सऊकण नि बनाणा कि पईलकिया रे जिऊँदे रंदे ऊए तेसा री बी इज्जत लूटो।

19 फेर जेबे कोई जवाणस छूणे बैठणे रिया री बजअ ते अशुद्ध रओ, तदुए तक तेसा साथे सम्बन्द नि बनाणा। 20 फेर आपणे पड़ोसो री जवाणसा साथे शारीरिक सम्बन्द बणाई की अशुद्ध नि ऊणा। 21 आपणी ल्वादा बीचा ते केसी खे बी मोलेको खे अवन करी की नि चढ़ाणा, ओर ना ई आपणे परमेशरो रा नाओं अपवित्र ठराणा; आऊँ यहोवा ए। 22 जवाणसा साथे शारीरिक सम्बन्द बनाणे जेड़े कोई मर्द केसी बी मर्दो साथे शारीरिक सम्बन्द नि बणाओ; से तो नीच काम ए।*18:22 रोमी 1:27 23 केसी बी जातिया रे डांगरो साथे शारीरिक सम्बन्द बणाई की अशुद्ध नि ऊणा ओर ना ई कोई जवाणस डांगरो सामणे इजी खे खड़ी ओ कि तेस साथे गल़त काम करो; ये तो बऊत ई दुष्टता री गल्ल ए।