1 Samuel 1

शीलो नगरे मां एल्काना ते तैसेरू टब्बर

1 एल्काना नंव्वेरो अक मैन्हु थियो ज़ै एप्रैमेरे पहाड़ी प्रदेशेरे रामातैम सोपीम*1:1 रामातैम सोपीम इब्रानी मां "हा-रामथैम-सोपीम," नगरेरो रानेबालो थियो, तै एप्रैमेरे खानदाने मरां थियो, तैसेरे बाजी केरू नवं यरोहाम ते तैसेरे दादेरू नवं एलीहू ते तैसेरे पड़दादेरू नवं तोहू थियूं ज़ैन सूफेरे गोट्लेरे मरां थियूं। 2 एलकानारे दूई लैड़ी थी; एकरू नवं हन्ना*1:2 हन्ना मतलब खूबसूरत ते होरारू नवं पनिन्ना थियूं। पनिन्ना*1:2 पनिन्ना मतलब मोती त बच्‍चे भोए, पन हन्ना कोई औलाद न भोइ।

3 एल्काना हर साल अपने नगरेरां सेनां केरे यहोवारी*1:3 सेनां केरे यहोवा इब्रानी मां यहोवा सबोथ आहे। आराधना केरने ते मेलबलि च़ाढ़नेरे लेई शीलो नगरे मां गातो थियो; ते तैड़ी एली एरां दूई मट्ठां होप्नी ते पीनहास थियां, तैना यहोवारे याजक थिये। 4 ज़ैखन भी एल्काना मेलबलि च़ाढ़तो थियो तैखन तै अपनि लैड़ी पनिन्ना ते तैसेरे सब मट्ठन-कुइयन बेलरे मासे मरां हिस्सो देतो थियो; 5 हालांकि यहोवा हन्नारू गर्भ बन्द रखेरू थियूं, फिरी भी एल्काना हन्ना सेइं प्यार केरतो थियो, एल्हेरेलेइ तैस बेलरे मासे मरां दुगनो हिस्सो देतो थियो। 6 पन तैसारी सौक एस वजाई सेइं, कि यहोवा तैसारू गर्भ बन्द रखेरू थियूं, तैसेरो मज़ाक बनाती ते ताने मारती थी। 7 एल्काना हर साल एरू केरतो रहतो थियो; ते ज़ैखन हन्ना यहोवारे भवने मां गाती थी तैखन पनिन्ना तैसेरो मज़ाक बनाती थी। एल्हेरेलेइ तै लेरां देती थी ते रोट्टी न थी खाती।

हन्नारी कसम

8 एल्हेरेलेइ एल्काना हन्ना सेइं ज़ोवं, हे हन्ना, तू किजो लेरां लगोरिस देने? ते रोट्टी किना खास? ते तेरो दिल किजो दुखी आहे? कुन तेरे लेई अवं दश मट्ठन करां भी बेद्धतां नईं? 9 एक्‍की बार एन्च़रे भोवं कि शीलो नगरे मां खाने पीनेरे बाद हन्ना प्राथना केरनेरे लेई उठी। ते यहोवारे भवनेरे दारेरे नेड़े एली याजक कुर्सी पुड़ बिशोरो थियो। 10 तैखन हन्ना मने मां परेशान भोइतां यहोवा कां प्राथना केरने लगी ते हुस्बुकैइं-हुस्बुकैइं लेरां देने लगी। 11 ते तैसां ई मिन्नत मन्नी, "हे सेना केरे यहोवा, अगर तू एपनी दैसरे दुखे पुड़ सच़्च़े नज़र केरस, ते मीं पुड़ ध्यान देस, ते अपनि दासी न बिसरस, ते अपनि दैसी मट्ठू देस, त अवं तैस ज़िन्दगी भर यहोवारे हावाले केरेली, ते तैसेरे दोग्गे छ़ुरो कधे न लग्गेलो।"✝1:11 लूक. 1:48.

12 ज़ैखन तै यहोवा कां प्राथना केरि राहोरी थी, तैखन एली याजक हन्नारे तुत्तरेरे पासे तेक्‍की राहोरो थियो। 13 हन्ना मने मां ज़ोने लगोरी थी; तैसारे ओठ त हिलते थिये पन तैसारी आवाज़ न थी शुनोती; एल्हेरेलेइ एली याजके समझ़ू कि ऐह नशे मांए। 14 तैखन एली याजके तैस पुछ़ू, "तू कैखन तगर नशे मां राहेली? अपनो नशो ट्लोड़।" 15 हन्ना जुवाब दित्तो, "नईं, हे मेरे मालिक, अवं त दुखी आईं; मीं न दाछ़रो रस पीयोरोए ते न शराब, मीं अपने मनेरी गल खोलतां यहोवा सेइं ज़ोवरीए। 16 अपनि दासी घटिया कौन्श न समझ़, ज़ैन किछ मीं हुन्ना तगर प्राथनाई मां ज़ोवरूए, तैन मीं दुखी भोइतां ते मज़ाक बनाए गानेरे वजाई सेइं ज़ोवरूए।" 17 एली याजके ज़ोवं, "सुखे सेइं च़ली गा; इस्राएलेरो परमेशर ज़ैन तीं मगोरूए तैन दे।" 18 हन्ना एली याजके सेइं ज़ोवं, "तेरी दयारी नज़र मीं पुड़ बनोरी राए।" तैखन तैसां गेइतां रोट्टी खाई, ते फिरी तै उदास न राई। 19 तैना होरसां झ़ेझ़ां सुबेले उठतां यहोवारी आराधना केरतां रामाह नगरे जो अपने घरे वापस जेआं। ते एल्काना अपनि कौन्श हन्ना कां जेव, ते यहोवाए तैसारी प्राथनारो जुवाब दित्तो; 20 किछ दिहाड़ना बाद हन्ना दोज़ींती भोइ ते ठीक वक्ते पुड़ तैस अक मट्ठू भोवं, ते तैसेरू नवं शमूएल*1:20 शमूएल मतलब परमेशरेरू नवं या "परमेशरेरू नवं एल आहे।" रख्खू, किजोकि तै ज़ोने लगी, "मीं यहोवा करां मेगतां एन मैल्होरूए।"

21 फिरी एल्काना अपने पूरे टब्बरे समेत यहोवारे सामने हर सालेरी ज़ेरि मेलबलि च़ाढ़ने ते अपनु बन्धू मुकानेरे लेई शीलो नगरे जो जेव। 22 पन हन्ना अपने मुन्शे सेइं एन ज़ोइतां घरे रुकी, "ज़ैखन बच्‍चो दुद्ध पीनू शारेलो तैखन अवं तैस आनेली, कि तै यहोवारे सामने राए, ते ज़िन्दगी भर तैड़ी राए।" 23 तैसारे मुन्शे एल्काना तैस सेइं ज़ोवं, "ज़ैन तीं रोड़ू लग्गे तैन्ने केर ज़ांतगर तू तैसेरू दुद्ध न छुटास तांतगर इड़ी बिशोरी रा; सिर्फ एत्रू भोए कि ज़ै वाधो तीं यहोवा सेइं कियोरोए पूरो केर।" एल्हेरेलेइ हन्ना तैड़ी घरे मां राई ते अपने मट्ठेरे दुद्ध छुटनेरे वक्ते तगर तैस पियाती राई।

24 ज़ैखन तैसां तैसेरू दुद्ध छुटावं तैस वक्ते तैन हेजू निकड़ू मट्ठू थियूं, तैखन तै तैस साथी घिन्तां शीलो नगरे मां यहोवारे भवने जो जेई। ते ट्लाई सालां केरू बछ़ड़ू*1:24 ट्लाई सालां केरू बछ़ड़ू इसेरो मतलब ट्लाई बछ़ड़ां भी भोइ सकते।, ते लगभग 10 किल्‍लो अट्टू, ते मसकी मां भेरतां दाछ़रो रस घिन्तां जेई। 25 ते तैनेईं बछ़ड़ू बलि केरतां बच्‍चो एली याजके कां आनो। 26 तैखन हन्ना एली याजके सेइं ज़ोवं, "हे मेरे मालिक, कुन तीं यादे? अवं तैए कौन्श आईं ज़ै तीं कां इड़ी खड़ी भोइतां यहोवा कां प्राथना केरती थी। 27 ऐन तैन्ने मट्ठूए ज़ेसेरे लेई मीं प्राथना कियोरी थी; ते यहोवाए मेरे ज़ोनेरे मुताबिक मेरे लेई कियोरूए। 28 एल्हेरेलेइ अवं भी तैस यहोवा जो देतीं; कि तै अपने ज़िन्दगी भर सिर्फ यहोवारो सेवक राए।" तैखन तैनेईं तैड़ी यहोवारी आराधना की।