1 बिन्यामीनेरे गोट्ले मां कीश नंव्वेरो अक मैन्हु थियो, तैसेरे बाजेरू नवं अबीएल थियूं, तैसेरे दादेरू नवं सरोर ते तैसेरे पड़दादेरू नवं बकोरत थियूं; तै बड़ो ताकतबर सूरमा थियो। 2 तैसेरू अक जुवान मट्ठू थियूं ज़ेसेरू नवं शाऊल थियूं, तैन बड़ू खूबसूरत थियूं, ते इस्राएले मां कोई तैस बराबर खूबसूरत न थियो; तैन एत्रू लम्मू थियूं कि बाकी इस्राएली लोक तैसेरे कंधे तगर पुज़ते थिये।

3 एक्सां कीशेरे गधे हेरोए, तैखन कीशे अपने मट्ठे शाऊले सेइं ज़ोवं, "अक नौकर एप्पु सेइं साथी ने ते गधे तोपतां आन।" 4 तैखन तै एप्रैमेरे पहाड़ी प्रदेश ते शलीशा प्रदेशे मांमेइं भोइतां जेव, पन तैन्न गधे न मैल्हे। फिरी तैना शालीम नंव्वेरे प्रदेशे मांमेइं भी भोइतां जे, ते तैड़ी भी गधे न मैल्हे। फिरी बिन्यामीन प्रदेशे मां जे, पन गधे तैड़ी भी न मैल्हे।

5 ज़ैखन तैना सूफ नंव्वेरे प्रदेशे मां आए, तैखन शाऊले अपने नौकरे सेइं ज़ोवं, ज़ै तैस सेइं साथी थियो, "एई, अस वापस च़लम, एरू न भोए कि मेरो बाजी गधां केरि फिक्र छ़ेडतां इश्शी फिक्र केरने लगे।" 6 पन नौकरे तैस सेइं ज़ोवं, "शुन, एस नगरे मां परमेशरेरो अक मैन्हु आहे, ज़ेसेरी लोक बड़ी इज़्ज़त केरतन; किजोकि ज़ैन किछ तै ज़ोते तैन ज़रूर पूरू भोते। एल्हेरेलेइ हुनी अस तैस कां च़लम, भोइ सकते कि तै असन ज़ोए कि अस गधे कोड़ि तोपम।" 7 पन शाऊले अपने नौकरे सेइं ज़ोवं, "शुन, अगर अस तैस मैन्हु कां गाम त तैस जो कुन नेम? हेर, इश्शे थेलन मां रोट्टी भी मुक्‍की जेवरिन ते भेंट देनेरे काबल कोई चीज़ अथ्थी नईं, ज़ै अस परमेशरेरे तैस मैन्हु देम। अस तैस कुन देइ सकतम?" 8 फिरी सेवके शाऊले सेइं ज़ोवं, "मीं कां त चैंदरो अक चौथाई सिक्‍कोए,* तैए अवं तैस परमेशरेरे मैन्हु देइलो, कि तै असन सेइं ज़ोए कि असां गधे कोड़ि तोपतम।" 9 (पुराने ज़माने मां इस्राएले मां ज़ैखन कोई परमेशरे करां किछ पुछ़ने गातो थियो तैखन एरू केरतो थियो, "च़ला, अस देर्शी कां गाम।" किजोकि ज़ैस जो अज़ काल नबी ज़ोतन तैस जो पुराने ज़माने मां दर्शी ज़ोते थिये।) 10 तैखन शाऊले अपने नौकरे सेइं ज़ोवं, "तीं ठीक ज़ोवरूए; अस च़लम।" फिरी तैना तैस नगरे जो च़ले ज़ैड़ी परमेशरेरो मैन्हु थियो।

11 तैस नगरेरी चड़ैई पुड़ च़ढ़ते बार तैस बेड़ि कुइयां मैल्ही ज़ैना पानी भरने जो च़ेलोरी थी; तैनेईं तैन पुछ़ू, "कुन दर्शी इड़ी आहे?" 12 तैनेईं जुवाब दित्तो, "हाँ; हेरा, तै तुश्शे सामने। हुनी तुस लूश केरा; अज़ पहाड़ेरे वेदी पुड़ लोक बलि च़ाढ़ेले, एल्हेरेलेइ तै अज़ नगरे मां एवरोए। 13 ज़ेरे तुस नगरे मां पुज़ेले तेरहो तै तुसन उच्‍ची ठारी पुड़ रोट्टी खाने करां पेइले मैल्हेलो। किजोकि ज़ांतगर तै न पुज़्ज़े तांतगर लोक रोट्टी न खाएले, किजोकि बेलरे लेई तैए परमेशरेरू शुक्र केरते; फिरी तैसेरां बाद कुजेवरे लोक रोट्टी खातन। एल्हेरेलेइ तुस हुन्ना तैड़ी गाथ, इस्से वक्ते तै तुसन मैल्हेलो।" 14 त शाऊल ते तैसेरे सेवक नगरे मां च़ेढ़ी जे ते ज़ेरे नगरे मां पुज़्ज़े तेरहो शमूएल उच्‍ची ठारी पुड़ च़ढ़नेरे लेई तैन केरे सामने एज्जी राहोरो थियो।

15 शाऊलेरे एजने करां अक दिहाड़ी पेइले यहोवाए शमूएले सेइं इन ज़ोवरू थियूं, 16 "कालां इस्से वक्ते अवं तीं कां बिन्यामीन प्रदेशेरो अक मैन्हु भेज़ेलो, तैस्से तू मेरे इस्राएली लोकां केरो प्रधान भोने लेई अभिषेक केरां। ते तैए मेरे लोकन पलिश्ती लोकां केरे हथ्थेरां छुटालो; किजोकि मीं अपने लोकन पुड़ दयारी नज़र कियोरीए, एल्हेरेलेइ कि तैन केरि मद्दतरे लेई बिनती मीं तगर पुज़ोरीए।" 17 फिरी ज़ैखन शमूएले शाऊल लाव, तैखन यहोवा तैस सेइं ज़ोवं, "ज़ैस मैन्हेरे बारे मां मीं तीं सेइं ज़ोवरू थियूं तै ईए; मेरे लोकन पुड़ ईए हुकूमत केरेलो।" 18 तैखन शाऊल नगरेरे फाटके पुड़ शमूएले कां नेड़े गेइतां पुछ़ू, "मीं सेइं ज़ो कि दर्शी एरू घर कोड़िए?" 19 शमूएले जुवाब दित्तो, "दर्शी त अवं आई; मीं करां अग्री-अग्री उच्‍ची ठारी पुड़ जो च़ेलि गा, किजोकि अज़्ज़ेरे दिहाड़े तू मीं सेइं साथी रोट्टी खालो, ते ज़ैन किछ तेरे दिले मां भोल्हु सब किछ अवं तीं सेइं ज़ोइतां झ़ेझ़ां भेज़ेलो। 20 ते तेरी गधन ज़ैन हेरोरे ट्लाई दिहाड़े भेवरेन तैन केरि किछ भी फिक्र न केरां, किजोकि तैना मैल्ही जेवरिन। ते इस्राएले मां ज़ैन किछ मन पसंदे तैन केसेरूए? ते अवं इन ज़ोनेरे लेई इड़ी एवरोईं कि तीं ते तेरे टब्बरे पुड़ इस्राएलेरी उमीदे?" 21 शाऊले जुवाब देइतां ज़ोवं, "कुन अवं सारे इस्राएली गोट्लन मां सेभन करां निकड़े बिन्यामीनी गोट्ले मरां नईं? ते कुन मेरू कुल बिन्यामीनेरे मतलब इस्राएलेरे गोट्लां केरे सारे कुले मां निकड़ू नईं? एल्हेरेलेइ तू मीं सेइं एरी गल्‍लां किजो ज़ोतस?"

22 तैखन शमूएले शाऊल ते तैसेरो नौकर कमरे मां ने ते कुजेवरे लोकन, ज़ैना सारे लगभग 30 मैन्हु थिये, तैना तैस खास जगाई पुड़ बिशाले। 23 फिरी शमूएले रोट्टी बनानेबाले सेइं ज़ोवं, "ज़ै मासेरो टुक्ड़ो मीं तीं रखनेरे लेई दित्तोरो थियो, तैस इरां आन।" 24 तैखन रोट्टी बनानेबाले तैन मास शाऊलेरे सामने रख्खू; तैखन शमूएले ज़ोवं, "ज़ैन रखोरू थियूं तैस हेर, ते अपने सामने रेखतां खा; किजोकि तैन तेरे लेई असेईं सही वक्ते तगर, ज़ेसेरे बारे मां मीं इन लोकन धाम ज़ोइतां रखोरूए।"

शाऊले तैस दिहाड़े शमूएले सेइं साथी रोट्टी खाई। 25 तैखन तैना उच्‍ची ठारी पुड़ेरां ओस्तां नगरे मां वापस आए, ते शमूएले तै अपने घरे नेव, ते तैनी अपने घरेरी छती पुड़ शाऊले सेइं गल्‍लां की।*

26 एग्री दिहाड़े झ़ेझ़ां तैना सुबेले खड़े उठे, ते लौ भोंते शमूएले शाऊले जो ज़ोवं, "उठ, अवं तीं भेज़ेलो।" तैखन शाऊल खड़ो उठो, ते तै ते शमूएल दूईये बेइर च़ले जे। 27 ते नगरेरे उतरैई मां च़लते-च़लते शमूएले शाऊले सेइं ज़ोवं, "अपने नौकरे असन करां अग्रोवं गानेरो हुक्म दे, (तै अग्रोवं च़लो जेव) पन तू हेजू खड़ो रह कि अवं तीं परमेशरेरो सन्देश शुनेईं।"