1 "फिरी ज़ैखन तेरो परमेशर यहोवा तीं तैस मुल्खे मां पुज़ाए ज़ेसेरो अधिकारी भोनेरे लेई तू गाने बालोस, ते तेरे सामनेरां हित्ती, गिर्गाशी, एमोरी, कनानी, परिज्जी, हिब्बी, ते यबूसी नंव्वेरी बेड़ि कौमन मतलब तुसन करां बड्डी ते ताकतबर सत्ते कौमन केढां, 2 ते तेरो परमेशर यहोवा तैन्न तेरे ज़िरिये हाराए, ते तू तैन पुड़ ज़ींत हासिल केरस; तैखन तैन्न पूरे तरीके सेइं नाश केरां; तैन सेइं न करार केरनो, ते न तैन पुड़ दया केरनि। 3 ते न तैन सेइं ड्लाह बनेइयथ, न त अपनि कुई तैन केरे मट्ठे जो ड्लेइयथ, ते न तैन केरि कुई अपने मट्ठे सेइं ड्लेइयथ। 4 किजोकि तैना तेरे मट्ठे मीं पत्ती च़लने करां दूर केरेली, ते देबतां केरी सेवा करावाएली; ते इस वजाई सेइं यहोवारो कोप तुसन पुड़ भड़केलो, ते तै तेरो लूशी सत्यानाश केरेलो। 5 तैन लोकन सेइं एरहो बर्ताव केरनो, कि तैन केरि वेदी डोली छ़ेडथ, ते तैन केरे बुत्तन ट्लोड़थ, तैन केरि अशेरा नंव्वेरे देबरी मूरतन केट्टी-केट्टी बिछ़ोड़थ, ते तैन केरि घेड़ोरि मूरतन अग्गी मां फुकथ। 6 किजोकि तू अपने परमेशर यहोवारी पवित्र प्रजा आस; यहोवा धेरतरे सारे मुल्खां केरे लोकन मरां तू च़ुनोरोस कि तू तैसेरी प्रजा ते विरासत ठहरस। 7 यहोवा ज़ै तुसन सेइं प्यार केरतां तुसां च़ुनोरेथ, इसेरी वजा ई न थी कि तुस गिनती मां ते सब मुल्खां केरे लोकन मरां जादे थिये, बल्के तुस त सब मुल्खां केरे लोकन मरां गिनती मां थोड़े थिये; 8 यहोवा ज़ैनी तुस ताकतबर हथ्थेरे ज़िरिये गुलैमरे घरे मरां, ते मिस्रेरे राज़े फ़िरौनेरे हथ्थे मरां छुटेइतां केढतां आने, इसेरी ईए वजाए कि तै तुसन सेइं प्यार केरते, ते तैस कसमी भी पूरी केरनी चाते ज़ै तैनी तुश्शे सियानन सेइं खेवरी थी। 9 एल्हेरेलेइ याद रख, कि तेरो परमेशर यहोवा ही परमेशरे, तै भरोसेरे काबल परमेशरे; ज़ैना तैस सेइं प्यार केरतन ते तैसेरे हुक्मन मनतन तैन सेइं तै हज़ार पीढ़न तगर अपनो करार मन्ते, ते तैन पुड़ दया केरतो रहते; 10 ते ज़ैना तैस सेइं बैर रखतन, तै तैन केरे हेरते तैन सेइं बदलो नेइतां नाश केरि छ़डते; अपने दुश्मनेरे बारे मां तै च़िर न केरेलो, तैसेरे हेरते तैस करां बदलो नेलो। 11 एल्हेरेलेइ इन हुक्मन, विधन, ते नियमन, ज़ैना अवं अज़ तीं देताईं, मन्ने मां एतिहात केरां।"

12 "ते तुस ज़ैना इन नियमन शुन्तां मन्नेले ते इन केरे मुताबिक च़लेले, त तेरो परमेशर यहोवा भी तैस दयाई बालो करार मन्नेलो ज़ै तैनी तेरे सियानन सेइं कसम खेइतां कियोरो थियो; 13 ते तै तीं सेइं प्यार केरेलो, ते तीं बरकत देलो, ते गिनती मां बधालो; ते ज़ै मुल्ख तैनी तेरे सियानन सेइं कसम खेइतां तैन देनेरे लेई ज़ोवरोए तैस मां तै तेरे बच्‍चन पुड़, ते अन्न, नंव्वो दाछ़रो रस, ते ज़ैतूनेरो तेल वगेरा, धेरतरी फसली पुड़ बरकत देलो, ते तेरां गोरू-गब्बां बधालो। 14 तू सब मुल्खां केरे लोकन करां जादे धन भोल्हो; तेरे दरमियाने मां न मड़द न कौन्शां बेऔलाद भोल्ही, ते तेरे जानबरन मां भी एरहो कोई न भोल्हो। 15 ते यहोवा तीं करां हर किसमेरे रोग दूर केरेलो; ते मिस्रेरी बुरी-बुरी बिमैरी ज़ैन तू ज़ानतस तैन मरां कोन्ची भी तीं लग्गने न देलो, इना सब तेरे दुश्मन्न लग्गेली। 16 ते मुल्खे-मुल्खेरे ज़ेत्रे लोकन तेरो परमेशर यहोवा तेरे कब्ज़े मां केरेलो, तू तैन सेब्भन सत्यानाश केरां; तैन पुड़ तरस न केरां, ते न तैन केरे देबतां केरि सेवा केरां, नईं त तू फंदे मां फेसी गालो।

17 "अगर तू अपने मने मां सोचस, कि तैना कौमां ज़ैना मीं करां जादेन; त अवं तैन्न केन्च़रे मुल्खे मरां केढी सकेलो? 18 फिरी भी तैन करां न डेरथ, ज़ैन किछ तेरे परमेशर यहोवा फ़िरौने सेइं ते सारे मिस्र मुल्खे सेइं कियूं तैस रोड़ेच़ारे याद रेखथ। 19 ज़ैना बड्डां-बड्डां अज़मैइशरां कम्मां तीं अपने एछ़्छ़न सेइं हेरां, ते ज़ैन निशान, ते चमत्कार, ते ज़ैस ताकतबर हथ्थे, ते अग्रोवं कियोरे पाखड़रे ज़िरिये तेरो परमेशर यहोवा तू केढतां आनोरोस, तैन केरे मुताबिक तेरो परमेशर यहोवा तैन सब लोकन सेइं भी ज़ैन करां तू डरतस केरेलो। 20 इस करां जादे तेरो परमेशर यहोवा तैन मां ट्लड़ाल* भी भेज़ेलो, इड़ी तगर कि तैन मरां ज़ैना बेच़तां छ़पेले तैना भी तेरे सामनेरां नाश भोइ गाले। 21 तैन करां न डेरां; किजोकि तेरो परमेशर यहोवा तेरे दरमियाने मां आहे, ते तै महान ते डरेरे काबल परमेशरे। 22 तेरो परमेशर यहोवा तैन कौमन तीं अगरां बल्हे-बल्हे कढेलो; त तू अकदम तैन केरो अन्त न केरि सकेलो, नईं त जंगली जानबर बेद्धतां तेरो नुकसान केरेले। 23 फिरी भी तेरो परमेशर यहोवा तैन्न तीं करां हारालो, ते ज़ांतगर तैन केरो सत्यानाश न भोइ गाए तांतगर तैन्न बड़ो परेशान केरतो रालो। 24 ते तै तैन केरे राज़न तेरे हथ्थे मां केरेलो, ते तू तैन केरू भी नवं धेरती पुड़ेरां मिटेई छ़डेलो; तैन मरां कोई भी तेरे सामने खड़ो न रेइ बटेलो, ते आखरी मां तू तैन केरो सत्यानाश केरेलो। 25 तैन केरे देबतां केरि बनेवरी मूरती तुस अग्गी मां फुकथ; ज़ैन चाँदी या सोन्नू तैन पुड़ पलैटोरू भोल्हु तैसेरू लालच़ केरतां तैन न नेइयथ, नईं त तू तैसेरे वजाई सेइं फंदे मां फसेलो; किजोकि एरी चीज़ां तुश्शे परमेशर यहोवारी नज़री मां भिट्टी आन। 26 इन मरां कोई भी मूरती अपने घरे मां ऐनथ, नईं त तू भी तैसेरो ज़ेरो तबाह भोइ गानेरी चीज़ ठहरेलो; तैस सत्यानाश भोनेरी चीज़ बुझ़तां तैस सेइं नफरत केरां ते तैस कधे न सुखेइयां; किजोकि तै भिट्टी चीज़े।"